ភ្នំពេញ- យុវសិស្ស ឱក ធន់ម្នីច័ន្ទមករា ជាសិស្សនិទ្ទេស A ឆ្នាំ២០២២ នៃសាលា អេស អូ អេស ហ័រម៉ាន់ ម៉ៃន័រ ក្រោយបញ្ចប់ជីវិតជាសិស្សវិទ្យាល័យ រូបគេគ្រោងបន្តចាប់យកជំនាញស្ថាបត្យកម្មនៅសាកលវិទ្យាល័យខេមតិច ក្នុងពេលឆាប់ៗខាងមុខនេះ។

សិស្សនិទ្ទេស A ឆ្នាំ២០២២ រូបនេះ បញ្ជាក់បន្ថែមថា សម្រាប់រូបគេផ្ទាល់ការទទួលបាននិទ្ទេស A ពិតជាសំខាន់ខ្លាំងណាស់ ពីព្រោះសាលាដែលរូបគេរៀនទើបមានសិស្សនិទ្ទេសម្នាក់កាលពី៥ឆ្នាំមុន ទើបធ្វើឱ្យរូបគេប្តេជ្ញាចិត្តថា នៅពេលចូលរៀនថ្នាក់ទី១២ នឹងយកនិទ្ទេស A ជូនសាលាឱ្យបាន។ ហើយ​នៅទីបំផុតតាមរយៈការខិតខំប្រឹងប្រែងសិក្សារៀនសូត្រ ធន់ម្នីច័ន្ទមករា ក៏ទទួលបាននិទ្ទេស A ដូចបំណង ដែលធ្វើឱ្យរូបគេសប្បាយចិត្ត ជាពិសេសឪពុកម្ដាយរបស់គេចាប់ផ្ដើមមានជំនឿជឿជាក់ចំពោះរូបគេ។

យុវសិស្ស ឱក ធន់ម្នីច័ន្ទមករា ជាសិស្សនិទ្ទេសA ឆ្នាំ២០២២

“ប៉ាម៉ាក់របស់ខ្ញុំបានលះបង់ជាច្រើនសម្រាប់ខ្ញុំ ហើយការដែលខ្ញុំទទួលបាននិទ្ទេសA មានន័យថា ខ្ញុំបានលះបង់ពេលវេលា ខិតខំរៀនឱ្យទទួលបានលទ្ធផលល្អ ដើម្បីឱ្យប៉ាម៉ាក់សប្បាយចិត្ត នេះជាគោលដៅរបស់ខ្ញុំ”

ចំពោះការ​សម្រេចចិត្តជ្រើសរើសយកជំនាញស្ថាបត្យកម្ម យុវសិស្ស ឱក ធន់ម្នីច័ន្ទមករា បញ្ជាក់ថា ក៏ព្រោះតែរូបគេ​មើលឃើញថា ជំនាញមួយនេះ មានបូកបញ្ចូលជាមួយបច្ចេកវិទ្យាដែលអាចរៀនទាំងជំនាញផ្នែកបច្ចេកវិទ្យា និងបានទាំងការរៀនគូសប្លង់ដែលខ្លួនស្រឡាញ់។ ទន្ទឹមគ្នានេះ ធន់ម្នីច័ន្ទមករា ជាមនុស្សម្នាក់ដែលស្រឡាញ់ខាងវប្បធម៌ ប្រពៃណី និងសំណង់របស់ប្រទេសកម្ពុជាផងដែរ។

យុវសិស្ស ឱក ធន់ម្នីច័ន្ទមករា

“ខ្ញុំចង់ឱ្យសំណង់ទាំងអស់នោះប្រើប្រាស់ជាមួយបច្ចេកវិទ្យា បច្ចេកទេសល្អមួយ ដើម្បីធ្វើឱ្យប្រទេសកម្ពុជាមានសំណង់ណាមួយ ឬអាគារណាមួយពិតជាអស្ចារ្យខ្លាំង ឬហៅថា សំណង់សហសម័យ”

ដោយ​ឡែក​ចំពោះការជ្រើសរើសជំនាញសិក្សានេះដែរ ធន់ម្នីច័ន្ទមករា បញ្ជាក់ថា ជាការ​ជ្រើសរើសរបស់ខ្លួនគេផ្ទាល់ ព្រោះឪពុកម្ដាយរបស់គេបា​ន​អនុញ្ញាតិឱ្យរូបគេ​រៀនជំនាញដែលខ្លួនស្រឡាញ់ និងចង់រៀន ។ ហើយ​ទៅថ្ងៃអនាគត ធន់ម្នីច័ន្ទមករា រំពឹងទុកថា រូបគេនឹងក្លាយជាស្ថាបត្យករកម្ពុជាដ៏មានកេរ្តិ៍ឈ្មោះល្បីមួយរូប ដោយសារមានក្ដីស្រមៃជាច្រើន ដោយចង់លើកស្ទួយមុខមាត់ប្រទេសកម្ពុជាឱ្យកាន់តែខ្ពស់ឡើង។ បច្ចុប្បន្ននេះ រូបនេះរៀបចំគោលដៅរៀនជំនាញស្ថាបត្យកម្ម ដោយយកគំរូតាមលោក វណ្ណ ម៉ូលីវណ្ណ ដែលជាបិតានៃស្ថាបត្យកម្មកម្ពុជា។

យុវសិស្ស ឱក ធន់ម្នីច័ន្ទមករា ក៏បានផ្ដាំទៅដល់សិស្សានុសិស្សដើម្បីទទួលបានលទ្ធផលសិក្សាល្អ គឺចំពោះការរៀននៅសាលាព្យាយាមធ្វើដោយខ្លួនឯង និងស្វែងរកអត្ថន័យដោយខ្លួនឯង ហើយសម្រាប់សិស្សត្រៀមប្រឡងបាក់ឌុប គឺ ទី១.មានវិន័យ ព្រោះវិន័យជាទ្រព្យសម្បត្តិមួយដ៏សំខាន់បំផុតសម្រាប់យើង ទី២. ឥរិយាបទ ទី៣. ត្រូវតែមានក្ដីសង្ឃឹមជានិច្ចក្នុងជីវិត ប្រសិនបើមនុស្សយើងអស់ក្ដីសង្ឃឹមក្នុងជីវិតហើយ គឺយើងប្រៀបដូចជារស់នៅក្នុងសំបក។ សម្រាប់ការរើសជំនាញនៅសាកលវិទ្យាល័យ ប្រសិនបើសិស្សានុសិស្សមិនទាន់ស្គាល់ខ្លួនឯងទេ គួរចំណាយពេលស្វែងរកខ្លួនឯងជាមុនសិន ដោយកុំប្រញាប់ចូលរៀននៅសាកលវិទ្យាល័យទាំងមិនច្បាស់ក្នុងចិត្ត។ លើសពីនេះ ជ្រើសរើសជំនាញតាមអ្វីដែលខ្លួនឯងចង់ធ្វើ និងស្រឡាញ់ ព្រោះកាលណាមនុស្សចង់ធ្វើអ្វីដែលខ្លួនឯងស្រឡាញ់ គឺមិនគិតពីទ្រព្យសម្បត្តិ កិតិ្តយស និងអំណាច ធ្វើអ្វីមួយដោយក្ដីសុខ ហើយនៅថ្ងៃអនាគតយើងនឹងជោគជ័យ៕