ភ្នំពេញ- ឱកាសសិក្សានៅអាហារូបករណ៍១០០%នៅវិទ្យាស្ថានតេជោសែន សាធារណការ និងដឹកជញ្ជូនផ្ដល់ចំនួន៥០កន្លែងសម្រាប់ឆ្នាំសិក្សា២០២៣ ។ អាហារូបករណ៍ផ្ដល់ជូនការសិក្សាថ្នាក់បរិញ្ញាបត្រ និងបរិញ្ញាបត្រ+១ ចំនួន២០០កន្លែង ដើម្បីឆ្លើយតបគោលដៅក្នុងការលើកកម្ពស់ការអភិវឌ្ឍធនធានមនុស្សក្នុងវិស័យសាធារណការ និងដឹកជញ្ជូន ។

ជំនាញឯកទេសដែលអាហារូបករណ៍ផ្ដល់ជូនរួមមាន ឯកទេសសំណង់សាធារណការ (ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែកនិងសំណង់កំពង់ផែ) ឯកទេសគ្រប់គ្រងដឹកជញ្ជូន និងភស្តុភារកម្ម (ជំនាញសេដ្ឋកិច្ច និងគ្រប់គ្រងការដឹកជញ្ជូនផ្លូវគោក, ជំនាញគ្រប់គ្រងភស្តុភារកម្ម និងខ្សែច្រវ៉ាក់ផលិតកម្ម និង​ ឯកទេសនាវាទេសចរណ៍ (ជំនាញបើកបរនាវា, ជំនាញម៉ាស៊ីននាវា) ។

លក្ខខណ្ឌក្នុងការដាក់ពាក្យសិស្ស-និស្សិតត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រសមមូល សញ្ញាបត្របណ្តោះអាសន្ន ឬ លទ្ធផលជាប់ជាស្ថារពរដែលប្រកាសដោយក្រសួងអប់រំ យុវជន និងកីឡា(ដោយបេក្ខជនអាចផ្ដល់ជូនសញ្ញាបត្រថតចម្លងនៅពេលក្រោយបាន) និង រូបថត 4 x 6 ។ និស្សិតនឹងទទួលបានបទពិសោធន៍ចុះអនុវត្តការងារផ្ទាល់នៅតាមការដ្ឋានសាងសង់ ផ្លូវ ស្ពាន កំពង់ផែ សហគ្រាសជាតិ និងអន្តរជាតិដែលជាដៃគូរសហការណ៍របស់វិទ្យាស្ថាន ។ និស្សិតនឹងមានសមត្ថភាពខ្ពស់ និងជំនាញច្បាស់លាស់អាចប្រលងចូលបម្រើការងារជាមន្ត្រីក្របខណ្ឌក្រសួង សាធារណការ និងដឹកជញ្ជូន និងក្រសួងស្ថាប័នពាក់ព័ន្ធនានា ។ មានឱកាសទទួលបានអាហារូបករណ៍បន្តការសិក្សានៅក្រៅប្រទេស និងមានឱកាសផ្លាស់ប្ដូរការសិក្សាជាមួយដៃគូសហការណ៍របស់វិទ្យាស្ថាន ។

គួរបញ្ជាក់ដែរថា វិទ្យាស្ថាននឹងធ្វើការជ្រើសរើសនិស្សិតចូលរៀនចំនួន២០០នាក់ក្នុងឆ្នាំសិក្សាជំនាន់ទី៣ ដោយបង់ថ្លៃសិក្សា១៥០នាក់ និង៥០នាក់ដែលបានពិន្ទុច្រើនជាងគេនឹងទទួលបានអាហារូបករណ៍១០០%ពេញលេញ និង៥០%សម្រាប់និស្សិតស្រី ។ លើសពីនេះនិស្សិតអាហារូបករណ៍ទាំងអស់ នឹងទទួលបានអាហារូបករណ៍រយៈពេល៤ឆ្នាំ ឬ៥ឆ្នាំ ទៅតាមជំនាញស្ថិតក្រោមការវាយតម្លៃប្រចាំឆ្នាំនីមួយៗ ។

បេក្ខជន និស្សិតដែលមានចំណាប់អារម្មណ៍ អាចដាក់ពាក្យតាមប្រព័ន្ធ Online បានតាមរយៈ https://exam.tsipwt.edu.kh ឬសម្រាប់ព័ត៌មានលម្អិតអាចទាក់ទងទៅកាន់ ០៩៨ ២១០ ២២១ / ០៧៨ ២១០ ១២១ ។ វិទ្យាស្ថានមានទីតាំងនៅតាមបណ្ដោយផ្លូវ ឯកឧត្ដម ជា សុផារ៉ា) សង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ ។ ទទួលពាក្យពីថ្ងៃផ្សាយដំណឹងនេះរហូតដល់ថ្ងៃទី០១ ខែកុម្ភៈ ឆ្នាំ២០២៣ ៕