អង្គការដើម្បីភាពញញឹមនៃកុមារ (PSE) កំពុងប្រកាសជ្រើសរើសសិស្សានុសិស្សដែលមកពីគ្រួសារក្រីក្រ ចូលរៀនអាហារូបករណ៍ក្នុងកម្មវិធីអប់រំសម្រាប់ឆ្នាំសិក្សា២០២៥-២០២៦។ កម្មវិធីផ្ដល់ជូនកម្មវិធីបណ្ដុះបណ្ដាលជំនាញវិជ្ជាជីវៈ កម្មវិធីអប់រំចំណេះទូទៅ និងថ្នាក់ចំណេះទូទៅតាមសាលារដ្ឋ។

ដើម្បីរួមចំណែកក្នុងវិស័យអប់រំ PSE ផ្ដល់ការសិក្សានៅវិទ្យាស្ថាន ប៉េ អេស អឺ-កម្មវិធីបណ្ដុះបណ្ដាលជំនាញវិជ្ជាជីវៈ (PSE-Institute) សម្រាប់សិស្សមកពីរាជធានីភ្នំពេញ និងបណ្ដាខេត្តនានា ដោយមានលក្ខខណ្ឌដូចជា ៖ មានអាយុចាប់ពី១៥ឆ្នាំឡើងទៅ កម្រិតវប្បធម៌ទាបបំផុតជាប់ថ្នាក់ទី៧ ជាសិស្សមកពីគ្រួសារក្រីក្រ សិស្សតម្រូវចូលរៀនចាប់ពីម៉ោង៦:៣០ រហូតដល់ ៥រសៀល គោរពតាមគោលនយោបាយរបស់អង្គការ និងផ្ដល់អាទិភាពដល់ក្មេងស្រី។ ជាមួយគ្នានេះ PSE មានអាហារពេលព្រឹក ថ្ងៃត្រង់ និងអាហារសម្រន់។

សម្រាប់កម្មវិធីអប់រំចំណេះទូទៅ-ថ្នាក់ពន្លឿនខាងក្នុងមណ្ឌល (CR-PSE) សម្រាប់តែសិស្សមកពីរាជធានីភ្នំពេញ ត្រូវជាសិស្សដែលមានអាយុយ៉ាងតិច១២ឆ្នាំ ជាសិស្សរៀនយឺតជាងកម្មវិធីសិក្សាយ៉ាងតិច២ឆ្នាំ ជាសិស្សក្រីក្រ ឬមកពីគ្រួសារក្រីក្រ គោរពតាមគោលនយោបាយរបស់អង្គការ សិស្សត្រូវចូលរៀនចាប់ពីម៉ោង៦:៣០ រហូតដល់ ៥រសៀល។ ជាមួយគ្នានេះ PSE មានអាហារពេលព្រឹក ថ្ងៃត្រង់ និងអាហារសម្រន់។

ចំពោះកម្មវិធីសិក្សា ថ្នាក់ចំណេះដឹងទូទៅតាមសាលារដ្ឋ (EE-SCHOOLS) ផ្ដល់សម្រាប់តែបេក្ខជនដែលមកពីរាជធានីភ្នំពេញ ដែលជាសិស្សរៀននៅតាមសាលារដ្ឋនានាចាប់ពីថ្នាក់ទី១ ដល់ទី១២ ជាសិស្សក្រីក្រ ឬមកពីគ្រួសារក្រីក្រ គោរពតាមគោលនយោបាយរបស់អង្គការ និង អាណាព្យាបាលមានឆន្ទៈខ្ពស់ក្នុងការជំរុញឱ្យកូនទៅរៀនទៀងទាត់។

ដោយឡែក ថ្នាក់ជំនាញវិជ្ជាជីវៈ (PSE–Institute) ផ្ដល់ជំនាញសិក្សា នៅសាលាបដិសណ្ឋារកិច្ច សាលាមេកានិក សាលាសំណង់ សាលាពាណិជ្ជសាស្ត្រ និង សាលាភាពយន្ត ដែលមានជំនាញសិក្សាជាច្រើនដូចជា ការិយាល័យជួរមុខ ផលិតកម្មម្ហូបអាហារ សេវាកម្មម្ហូបអាហារ និងភេសជ្ជៈ រចនាម៉ូតសក់និងសម្ភស្ស គេហកិច្ច ការថែទាំជួសជុលរថយន្ត ការដំឡើងបណ្ដាញអគ្គិសនីក្នុងអគារ ការដំឡើងបណ្ដាញបំពង់ទឹក និងសេវាកម្មបរិក្ខាត្រជាក់ ការថែទាំអគារ ថតភាពយន្ត ការកាត់តភាពយន្ត គណនេយ្យ ការគ្រប់គ្រងធនធានមនុស្ស និងជំនាញជាច្រើនទៀត។

បេក្ខជនដែលមានចំណាប់អារម្មណ៍ក្នុងការដាក់ពាក្យសិក្សា អាចទៅកាន់ការិយាល័យនាយកដ្ឋានអប់រំ និងសង្គម ដោយផ្ទាល់ដែលមានទីតាំងនៅ ភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ពីថ្ងៃច័ន្ទ-សុក្រ ម៉ោង៧:៣០ព្រឹក ដល់ ៥:៣០ល្ងាច។ សម្រាប់ព័ត៌មានបន្ថែមអាចទំនាក់ទំនងទៅកាន់ ០៩២ ២៩ ៥០ ៥២​ ។

ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី២៩ ខែកញ្ញា ឆ្នាំ២០២៥៕