ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការថែទាំសុខភាពគឺមិនត្រឹមតែជាការវិនិយោគលើជីវិតប៉ុណ្ណោះទេ ប៉ុន្តែវាក៏ជាមធ្យោបាយឆ្លាតវៃក្នុងការសន្សំប្រាក់ផងដែរ។ ការប្រកាន់យកទម្លាប់រស់នៅល្អ ដូចជាការរក្សាសកម្មភាពរាងកាយ កាត់បន្ថយទម្លាប់មិនល្អ និងចំណាយពេលបរិភោគអាហារនៅផ្ទះ អាចជួយឱ្យអ្នកសន្សំសំចៃប្រាក់យ៉ាងច្រើន រីឯសុខភាពក៏កាន់តែរឹងមាំថែមទៀតផង។
តាមរយៈគេហទំព័រ Discover បានបង្ហាញទម្លាប់រស់នៅចំនួន៣ ដែលនឹងជួយលោកអ្នកឱ្យទទួលបានសុខភាពល្អផង និងរួមចំណែកដល់ការសន្សំប្រាក់ផង៖
១. ភាពសកម្មនៃរាងកាយ ៖ ភាពរឹងមាំនៃហិរញ្ញវត្ថុ និងភាពធន់នៃសុខភាពរាងកាយ មានភាពស្រដៀងគ្នា! ព្រោះបើកាលណាចាប់ផ្តើមគិតអំពីសុខភាព នោះការចំណាយលើការទទួលទានរបស់មិនល្អក៏ត្រូវបានកាត់បន្ថយទៅតាមនោះដែរ យ៉ាងណាមិញ ការធ្វើឱ្យសកម្មនៃរាល់គ្រប់ផ្នែកនៃរាងកាយបានជាប់លាប់ គឺជាកត្តាជំរុញឱ្យកាន់តែចង់ថែទាំសុខភាពខ្លួនឯងបានមួយកម្រិតទៀត ដែលមូលហេតុនេះហើយជាការកាត់បន្ថយការកើតជំងឺ និងការបង្កើនអារម្មណ៍ស្រស់បស់។
២. កាត់ទម្លាប់មិនល្អយ៉ាងហោចណាស់ឱ្យបានមួយ ៖ ស្ថិតក្នុងដំណាក់កាលត្រូវការចាប់ផ្តើមសន្សំលុយ ប្រសិនបើមិនក្រឡេកមើលទម្លាប់ដែលអវិជ្ជមាននោះទេ វាក៏ពិបាកនឹងជំរុញការសន្សំឱ្យមានប្រសិទ្ធភាពដែរ ព្រោះទម្លាប់ដែលប៉ះពាល់ចំពោះសុខភាព ទោះចង់ឬមិនចង់ អាចបង្កភាពឈឺចាប់ដល់រាងកាយ ហើយនៅពេលសុខភាពត្រូវការថែទាំ ពិតណាស់គឺត្រូវការចំណាយ មិនថាផ្លូវចិត្ត ឬផ្លូវកាយនោះទេ។ ហើយការស្វែងរកទម្លាប់ដែលត្រូវកាត់ចោលទៀតសោត គឺអាស្រ័យលើបុគ្គលខ្លួនឯងផ្ទាល់ ជាឧទាហរណ៍ការកាត់បន្ថយទម្លាប់ញ៉ាំអាហារដែលមិនចម្រើនដល់សុខភាពជាដើម។
៣. បង្កើនទម្លាប់បរិភោគអាហារនៅផ្ទះ ៖ ការបរិភោគនៅខាងក្រៅផ្ទះ គឺជាការចំណាយយ៉ាងច្រើនសន្ធឹក ជាពិសេសប្រសិនបើមិនចាប់អារម្មណ៍អំពីការកត់ត្រា និងការបូកបញ្ជីមើលជាប្រចាំនោះទេ។ ក្នុងករណីចាំបាច់ ប្រសិនបើមិនអាចកាត់ផ្តាច់បានទាំងស្រុងទេ យ៉ាងហោចណាស់កាត់បន្ថយមួយថ្ងៃមួយពេល ជាពិសេសនៅពេលល្ងាច ដែលជាពេលត្រូវត្រឡប់មកសម្រាកនៅឯផ្ទះវិញស្រាប់ ហើយទម្លាប់ធ្វើអាហារដោយខ្លួនឯងយូរៗទៅ វានឹងកាន់តែបន្សាំខ្លួនឱ្យមានភាពងាយស្រួល រួមទាំងការចំណាយពេលតិចជាងមុនក្នុងការអនុវត្ត នេះក៏ដោយសារតែភាពស្ទាត់ជំនាញដែលបានពីការហ្វឹកហាត់ជាប្រចាំ៕
