កណ្ដាល៖ រស់នៅក្នុងភូមិពពាលខែ ឃុំដីឥដ្ឋ ស្រុកកៀនស្វាយ ខេត្តកណ្តាល កញ្ញា វ៉ាន់ ស្រីពេជ្រ បានមើលឃើញពីសារៈសំខាន់នៃការថែរក្សាអនាម័យអំឡុងពេលមករដូវរបស់ក្មេងស្រី និងលើកទឹកចិត្តឱ្យស្រ្តី និងក្មេងស្រីមានភាពក្លាហាននិយាយអំពីបញ្ហាប្រឈមដោយបើកចំហ និងគ្មានភាពខ្មាស់អៀន ។

កញ្ញា វ៉ាន់ ស្រីពេជ្រ ជាបុគ្គលិកក្រុមហ៊ុនឯកជនមួយកន្លែងក្នុងខេត្តកណ្ដាល បានប្រាប់ឱ្យដឹងថា ការថែរក្សាអនាម័យអំឡុងពេលមករដូវ និងការរៀបចំខ្លួនអំឡុងពេលមករដូវដំបូង គឺរូបនាងទទួលការណែនាំពីម្តាយដូចជា ការផ្លាស់ប្តូរសំឡីអនាម័យឱ្យបានញឹកញាប់ ការលាងសំអាត ខោទ្រនាប់ត្រូវតែស្ងួត ងូតទឹកឱ្យបានស្អាត និងទុកដាក់សំឡីអនាម័យដែលប្រើរួចឱ្យបានត្រឹមត្រូវ។

យុវតីវ័យ២៤ឆ្នាំរូបនេះ បន្ថែមថា កង្វះទឹកស្អាតប្រើប្រាស់ ជាបញ្ហាប្រឈមសម្រាប់រូបនាងអំឡុងពេលមករដូវ ជាពិសេសអំឡុងពេលប្រើប្រាស់អណ្ដូងស្នប់ ខ្វះទឹកប្រើប្រាស់ គឺត្រូវកាត់បន្ថយទឹកប្រើប្រាស់ក្នុងការលាងសម្អាត និងមិនបានដឹងទូលំទូលាយទាក់ទងនឹងផលប៉ះពាល់នៃការប្រើប្រាស់ទឹកមិនស្អាត។ ស្រីពេជ្រ បន្តថា ដោយសារជីវភាពជួបការលំបាក រូបនាង​ក៏បានប្រើប្រាស់ទឹកអណ្ដូងដើម្បីដោះទាល់ ខណៈទឹកអណ្ដូងដែលធ្លាប់ប្រើច្រើនមានពណ៌លឿង និងសម្បូរជាតិបារ៉ត គ្មានអនាម័យ។

កញ្ញា វ៉ាន់ ស្រីពេជ្រ

“ខ្ញុំមានអារម្មណ៍ធុញទ្រាន់ពេលជិតអស់ទឹកប្រើប្រាស់ ព្រោះត្រូវបូម ហើយពេលរដូវប្រាំងម្ដងៗបូបទឹកមិនចេញ ទឹកមិនមានអនាម័យ ហើយត្រូវចំណាយថវិកាច្រើនទៀត”

ក្រោយមក នៅឆ្នាំ២០១៧ ទើបក្រុមគ្រួសាររបស់ ស្រីពេជ្រ ភ្ជាប់បណ្តាញទឹកស្អាតពីក្រុមហ៊ុនឯកជនក្នុងភូមិ ហើយឈប់ប្រើប្រាស់អណ្ដូងស្នប់ និងប្រើប្រាស់ទឹកភ្លៀងសម្រាប់ងូត និងបោកសម្អាតសម្លៀកបំពាក់ប៉ុណ្ណោះ។ ស្រីពេជ្រ និយាយថា ការត្រឡប់មកប្រើប្រាស់ទឹកស្អាត គឺមានភាពងាយស្រួល និងមានអនាម័យខ្ពស់ មិនមានផលប៉ះពាល់ដល់សុខភាព។

យុវតីមកពីស្រុកកៀនស្វាយ ខេត្តកណ្តាលរូបនេះ បានបញ្ជាក់បន្ថែមថា ចំពោះបញ្ហាប្រឈមរបស់ស្រ្តី និងក្មេងស្រីនៅពេលកង្វះអនាម័យអំឡុងពេលមករដូវ រួមមាន ទី១. មិនហ៊ានចេញទៅខាងក្រៅ ខ្មាស់អៀនច្រើន ដោយសារអត់អនាម័យនាំឱ្យមានក្លិន និងខ្វះទំនុកចិត្តចំពោះខ្លួនឯង។ ទី២.ទាក់ទងនឹងសុខភាពរបស់ខ្លួនឯងផ្ទាល់ កាលណាអត់មានអនាម័យ ទ្វារមាសងាយមានមេរោគ ឬបាក់តេរី ហើយនៅពេលមិនបានលាងសម្អាតឱ្យបានត្រឹមត្រូវ នឹងប្រឈមជម្ងឺផ្សេងៗ ប៉ះពាល់ដល់សុខភាពបន្តពូជ ឬអាចអត់មានកូននៅថ្ងៃអនាគត។

កញ្ញា វ៉ាន់ ស្រីពេជ្រ បន្តថា កត្តាការអប់រំ គឺជាផ្នែកមួយសំខាន់ដែលធ្វើឱ្យរូបនាងហ៊ាននិយាយពីបញ្ហាអនាម័យ និងការប្រើប្រាស់ទឹកស្អាតក្នុងពេលមករដូវជាសាធារណៈ។ ទន្ទឹមគ្នានេះ ស្រ្តី ឬក្មេងស្រីដែលទទួលបានការយល់ដឹងតាមរយៈការអាន និងការអប់រំនៅស្ថាប័នរដ្ឋ និងឯកជន ឬអង្គការជាដើម ពួកគាត់មានការយល់ដឹង មានភាពក្លាហាន ដឹងព័ត៌មានច្រើន ដូច្នេះ ពួកគាត់ហ៊ាននិយាយដោយបើកចំហពីរឿងបញ្ហារបស់ស្រី ធ្វើឱ្យពួកគាត់មានដំណោះស្រាយ និងមានចំណេះដឹងសម្រាប់ខ្លួនគាត់។

ជាមួយគ្នានេះ កញ្ញា រឹមផាត បុប្ផាភួង ជាមន្រ្តីកម្មវិធីតស៊ូមតិនិងបណ្ដាញ នៃអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) និយាយថា កន្លងមកអង្គការ GADC បានបញ្ជ្រាបចំណេះដឹងដល់ក្មងស្រីផ្ដោតសំខាន់ទៅលើការថែរក្សាសុខភាពពេលមករដូវ ឱ្យក្មេងស្រីចេះថែរក្សាអនាម័យ  ការត្រៀមខ្លួនមុនពេលមករដូវ ការផ្លាស់ប្តូរសំឡីអនាម័យជាប្រចាំដើម្បីការពារពីការកើតមេរោគ និងលើកទឹកចិត្តដល់ក្មេងស្រីទៅពិនិត្យសុខភាពនៅគ្លីនិកជំនាញដើម្បីតាមដានពីបញ្ហារបស់ខ្លួននៅពេលមករដូវ ឬបញ្ហារោគស្រ្តីផងដែរ។

មន្រ្តីកម្មវិធីតស៊ូមតិនិងបណ្ដាញ នៃអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) បញ្ជាក់បន្ថែមថា ទឹកស្អាតពិតជាមានភាពចាំបាច់ណាស់សម្រាប់ផ្តល់ឱ្យក្មេងស្រីប្រើប្រាស់ក្នុងការថែទាំអនាម័យកំឡុងពេលមករដូវ និងក្រោយពេលមករដូវ។ ការផ្តល់ទឹកស្អាតសម្រាប់ប្រើប្រាស់ដល់ក្មេងស្រីគឺជាការពង្រឹងសិទ្ធិអំណាចមួយដែលផ្តល់ឱកាសឱ្យក្មេងស្រីបានចូលរួមយ៉ាងពេញលេញនៅក្នុងសាលា និងសហគមន៍។

កញ្ញា រឹមផាត បុប្ផាភួង

“ការថែរក្សាអនាម័យពេលមករដូវរបស់ក្មេងស្រីពិតជាសំខាន់ណាស់ព្រោះវាបានការពារក្មេងស្រីពីការកើតមេរោគផ្សេងៗ ក្រៅពីនេះក្មេងស្រីអាចមានភាពក្លាហានក្នុងការនិយាយប្រាប់ទៅមនុស្សជុំវិញខ្លួនដើម្បីទទួលបានការគាំទ្រផ្សេងៗដូចជា សម្ភារៈសំឡីអនាម័យ បង្គន់អនាម័យ ទឹកស្អាត សាប៊ូ ជាដើម”

លោក ហង់ ហ៊ីប៊ុណ្ណា អ្នកឯកទេសទឹកស្អាត និងអនាម័យនៃអង្គការភ្លែនអន្តរជាតិកម្ពុជា មានប្រសាសន៍ថា បើផ្អែកតាមការស្រាវជ្រាវមួយបានបង្ហាញថា ស្ត្រីម្នាក់អាចមករដូវរហូតដល់៣ពាន់ថ្ងៃក្នុងមួយជីវិត ឬស្មើនឹងរយៈពេល ០៨ឆ្នាំ ហើយបើគិតជាសំណល់សំឡីអនាម័យដែលស្រ្តីប្រើប្រាស់រួចរាល់មានចំនួនច្រើនលើសលប់។ លោកបន្តថា ការបញ្រ្ជាបចំណេះដឹងក្នុងការថែរក្សាអនាម័យអំឡុងពេលមករដូវរបស់ក្មេងស្រី និងអប់រំឱ្យក្មេងស្រីឱ្យ​ចេះទុកដាក់សំឡីអនាម័យបានត្រឹមត្រូវ គឺជារឿងដែលគួរចូលរួមយកចិត្តទុកដាក់ពីគ្រប់ភាគីពាក់ព័ន្ធទាំងអស់ ដើម្បីឆ្លើយតបទៅនឹងសកម្មភាពក្នុងគោលដៅអភិវឌ្ឍន៍ប្រកបដោយចីរភាពដែលរាជរដ្ឋាភិបាលកម្ពុជាកំពុងអនុវត្តន៍ ។

គួរជម្រាបជូនថា នៅក្នុងគោលដៅអភិវឌ្ឍន៍ប្រកបដោយចីរភាព គោលដៅទី៦ (SDG6) ចំណុច ៦.២ ត្រឹមឆ្នាំ២០៣០ សម្រេចនូវការទទួលបានគ្រប់គ្រាន់ និងសមធម៌នូវអនាម័យសម្រាប់ប្រជាជនគ្រប់រូប និងបញ្ចប់ការ​បន្ទោបង់ពាសវាលពាសកាល ផ្ដោតការយកចិត្តទុកដាក់លើតម្រូវការរបស់ស្ត្រី និងកុមារី និងប្រជាជនដែលរស់នៅក្នុងស្ថានភាពងាយរងគ្រោះ។ ក្នុងន័យនេះ សំដៅគិតដល់បញ្ហាអនាម័យពេលមករដូវរបស់ស្រ្តីនិងក្មេងស្រីឱ្យកាន់តែប្រសើរជារឿងសំខាន់ដែលគ្រប់គ្នាចូលរួមដោះស្រាយ៕