ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការវិវត្តន៍កាន់តែជឿនលឿននៃបច្ចេកវិទ្យា និងការអភិវឌ្ឍន៍ប្រព័ន្ធស្វ័យប្រវត្តិកម្មក្នុងរោងចក្រឧស្សាហកម្មដើម្បីពង្រឹងផលិតភាព និងកាត់បន្ថយថ្លៃដើម បានធ្វើឱ្យតម្រូវការវិស្វករក្នុងវិស័យរ៉ូបូទិច និងស្វ័យប្រវត្តិកម្ម ក្លាយជាជំនាញមានតម្រូវការខ្ពស់ និងមាននិរន្តរភាព។
វេទិកាសេដ្ឋកិច្ចពិភពលោក (WE Forum) បានប៉ាន់ស្មានថា នៅឆ្នាំ២០២៥ ការងារប្រមាណ ៨៥លានកន្លែង នឹងត្រូវជំនួសដោយប្រព័ន្ធស្វ័យប្រវត្តិកម្ម ប៉ុន្តែបច្ចេកវិទ្យានេះ នឹងបង្កើតតួនាទីថ្មីចំនួន ៩៧លានកន្លែង ដើម្បីសម្របទៅនឹងការគ្រប់គ្រង និងបែងចែកកម្លាំងពលកម្មតាមរបៀបថ្មី រវាងមនុស្ស និងម៉ាស៊ីន។ លើសពីនេះ គេរំពឹងថា ការវិនិយោគជាសកលលើរ៉ូបូទិច និងប្រព័ន្ធស្វ័យប្រវត្តិ នឹងកើនឡើងដល់ ២១០ប៊ីលានដុល្លារអាមេរិកនៅឆ្នាំ២០២៥ ដែលធ្វើឱ្យទីផ្សារការងារ នៃបច្ចេកវិទ្យាស្វ័យប្រវត្តិកម្មកើនឡើងខ្ពស់។
លោក វឿន យ៉ុងអាន ស្ថាបនិក ARM Robotics និងជាគ្រូបង្រៀនជំនាញរ៉ូបូទិច និងស្វ័យប្រវត្តិកម្ម នៅសាកលវិទ្យាល័យខេមតិច បានលើកឡើងថា ក្នុងបរិបទប្រទេសកម្ពុជា តាមរយៈកំណើនរោងចក្រឧស្សាហកម្ម បានធ្វើឱ្យជំនាញរ៉ូបូទិច នឹងមានតម្រូវការខ្ពស់ក្នុងវិស័យផលិតកម្ម កសិកម្ម និងភស្តុភារកម្ម។
តើអ្នកចេះជំនាញវិស្វកម្មរ៉ូបូទិច ត្រូវធ្វើការងារនៅកន្លែងណាខ្លះ?
បើតាមលោក យ៉ុងអាន អ្នកដែលមានជំនាញផ្នែករ៉ូបូទិច និងស្វ័យប្រវត្តិកម្ម អាចធ្វើការនៅរោងចក្រ ឬសហគ្រាសផលិតនានា ក្នុងនាមជាវិស្វករ ឬអ្នកគ្រប់គ្រងផលិតកម្ម, វិស្វករផ្នែកមេកានិច ដែលចូលរួមក្នុងសកម្មភាពរចនា ច្នៃបង្កើតឧបករណ៍ផ្សេងៗ, លើសពីនេះ ពួកគេអាចជាអ្នកសរសេរប្រូក្រាមសម្រាប់រ៉ូបូតឧស្សាហកម្ម និងដ្រូនជាដើម។ លោកបន្តថា និស្សិតដែលបញ្ចប់ការសិក្សាជំនាញនេះ ក៏អាចធ្វើជាវិស្វករអេឡិចត្រូនិច ដែលធ្វើការលើ embaded system និងfirmware ផងដែរ។ ខណៈជំនាញនេះ ជាជំនាញមាននិរន្តភាព ក្នុងសម័យជឿនលឿន ក្រោយបញ្ចប់ការសិក្សានិស្សិតកម្ពុជា អាចទទួលបានចំណូល ចន្លោះពី ៤៥០ ទៅ ៧៥០ដុល្លារក្នុងមួយខែ។
ក្រៅពីឱកាសការងារក្នុងស្រុក អ្នកចេះជំនាញវិស្វកម្មរ៉ូបូទិច និងស្វ័យប្រវត្តិកម្មក៏មានតម្រូវការខ្ពស់ ក្នុងបរិបទអាស៊ាន និងពិភពលោកដែរ ព្រោះអ្នកជំនាញក្នុងវិស័យនេះ អាចទទួលបានឱកាសក្នុងការងារស្រាវជ្រាវ និងអភិវឌ្ឍន៍ (Research & Development) ក្នុងវិស័យទំនើបៗ ដូចជា មនុស្សយន្ត ការអភិវឌ្ឍន៍បញ្ញាសិប្បនិម្មិត (AI) និងប្រព័ន្ធស្វ័យប្រវត្តិ, នេះបើតាមការបញ្ជាក់របស់លោក វឿង យ៉ុងអាន។
ដើម្បីអាចរៀនជំនាញវិស្វកម្មរ៉ូបូទិច តើសិស្សត្រូវមានចំណេះដឹងមូលដ្ឋានអ្វីខ្លះ?
ក្នុងនាមជាគ្រូបង្រៀនជំនាញរ៉ូបូទិច លោក វឿន យ៉ុងអាន មានប្រសាសន៍ថា ដើម្បីចូលរៀនជំនាញវិស្វកម្មរ៉ូបូទិច និងស្វ័យប្រវត្តិកម្ម សិស្សានុសិស្សចាំបាច់ត្រូវឆ្លងកាត់ការប្រឡង ជាក់ស្ដែង ហើយនៅសាកលវិទ្យាល័យខេមតិច ដែលលោកកំពុងបម្រើការ តម្រូវឱ្យសិស្សសម្ភាសន៍ និងឆ្លងកាត់ការប្រឡងលើមុខវិជ្ជាចំនួន ៣ រួមមាន គណិតវិទ្យា តក្កវិទ្យា និងភាសាអង់គ្លេស។ លោកបន្តថា ជំនាញនេះក៏ផ្ដល់អាហារូបករណ៍សម្រាប់សិស្សដែល ក្នុងនោះមាន ១០០%, ៧៥%, ៥០% និង ២៥% ទៅតាមសមត្ថភាពប្រឡងរបស់សិស្ស ខណៈតម្លៃសិក្សាពេញនៅខេមតិចគឺ ៤ពាន់ដុល្លារក្នុងមួយឆ្នាំ។
ដោយឡែកសម្រាប់ការសិក្សាជំនាញរ៉ូបូទិចនៅសាកលវិទ្យាល័យ គេនឹងបង្ហាត់និស្សិតឱ្យមានសមត្ថភាពចម្រុះគ្រប់វិស័យដូចជា ការបង្កើតឧបករណ៍គ្រឿងយន្តមេកានិច អគ្គិសនី អេឡិចត្រូនិច និងការបង្កើតកម្មវិធីកុំព្យូទ័រ ដែលបណ្តុះជំនាញក្នុងការដោះស្រាយបញ្ហាប្រកបដោយភាពច្នៃប្រឌិត និងមានឆន្ទៈធ្វើការងារ ដើម្បីធ្វើឱ្យដំណើរការផ្សេងៗក្នុងផលិតកម្មកាន់តែប្រសើរ។
បើតាមលោក វឿន យ៉ុងអាន សម្រាប់សិស្សានុសិស្សដែលកំពុងរៀនថ្នាក់វិទ្យាល័យ និងទើបតែបញ្ចប់ការសិក្សាថ្នាក់ទី១២ មានបំណងចង់រៀនជំនាញរ៉ូបូទិច គួរមានចំណេះដឹងមូលដ្ឋានគ្រឹះលើមុខវិជ្ជា គណិតវិទ្យា រូបវិទ្យា និងភាសាអង់គ្លេស។ លោកសង្កត់ធ្ងន់ថា ប្រសិនបើសិស្សានុសិស្សមានមានចំណូលចិត្ត ឬមានបទពិសោធន៍ធ្វើគម្រោង STEM ជាមួយគ្រឿងអេឡិចត្រូនិច និងការសរសេរប្រូក្រាមបញ្ជា គឺរឹតតែប្រសើរ៕
