ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កិច្ចប្រជុំកំពូលសម្ព័ន្ធប្រតិបត្តិករកម្មវិធីផ្តល់អាហារនៅសាលារៀនតំបន់អាស៊ីអាគ្នេយ៍ ត្រូវបានរៀបចំធ្វើឡើងនៅខេត្តសៀមរាប ប្រទេសកម្ពុជា កាលពីដើមសប្តាហ៍នេះ (១៨ វិច្ឆិកា) ក្រោមកិច្ចសហការរវាងក្រសួងអប់រំ យុវជន និងកីឡា រដ្ឋាភិបាល នៃសាធារណរដ្ឋហ្វីលីពីន និងរដ្ឋាភិបាលនៃសាធារណរដ្ឋកូរ៉េ និងមានការចូលរួមពីសំណាក់ថ្នាក់ដឹកនាំជាន់ខ្ពស់នៃស្ថាប័នពាក់ព័ន្ធដែលអញ្ជើញមកពីបណ្តាប្រទេសក្នុងតំបន់អាស៊ីអាគ្នេយ៍ ប្រទេសចិន និងប្រទេសជប៉ុន ដើម្បីជំរុញការអភិវឌ្ឍន៍មូលធនមនុស្ស និងបរិវត្តកម្មប្រព័ន្ធស្បៀងអាហារ។
ថ្លែងក្នុងឱកាសនោះ ក្នុងនាមក្រសួងអប់រំ យុវជន និងកីឡា ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានគូសបញ្ជាក់ពីតួនាទីយ៉ាងសំខាន់របស់កម្មវិធីផ្តល់អាហារនៅតាមសាលារៀនក្នុងការកាត់បន្ថយភាពក្រីក្រ ការជំរុញការអភិវឌ្ឍន៍សេដ្ឋកិច្ចក្នុងមូលដ្ឋាន ការលើកកម្ពស់សុខភាពសិស្ស និងសុខុមាលភាពកុមារ ព្រមទាំងការគាំទ្រប្រព័ន្ធសុវត្ថិភាពសង្គម ជាពិសេសសាលារៀនគោលដៅដែលស្ថិតនៅតំបន់ក្រីក្រ។
បើតាមប្រសាសន៍របស់ ឯកឧត្តម ហង់ជួន ណារ៉ុន រាជរដ្ឋាភិបាលកម្ពុជា ជាពិសេសក្រសួងអប់រំ យុវជន និងកីឡា បាននិងកំពុងខិតខំប្រឹងប្រែង និងយកចិត្តទុកដាក់ខ្ពស់ក្នុងការបណ្តុះមូលធនមនុស្ស ការជំរុញកំណើនសេដ្ឋកិច្ច និងការធានាសុខុមាលភាពនៃកុមារ តាមរយៈការអនុវត្តកម្មវិធីផ្តល់អាហារនៅសាលារៀនដោយប្រើប្រាស់កសិផលសហគមន៍ ក៏ដូចជាការអនុវត្តកម្មវិធីអាហារូបករណ៍ជាសាច់ប្រាក់ជូនសិស្សានុសិស្សមកពីគ្រួសារក្រីក្រចាប់ពីកម្រិតបឋមសិក្សាដល់មធ្យមសិក្សា។
ព្រះរាជាណាចក្រកម្ពុជាគឺជាប្រទេសមួយក្នុងចំណោមប្រទេសចំនួន ៤៩ ដែលបានបញ្ជូនការប្តេជ្ញាចិត្តថ្នាក់ជាតិកាលពីខែមីនា ឆ្នាំ២០២២។ ការប្តេជ្ញាចិត្តទាំងនេះបានគូសបញ្ជាក់អំពីចក្ខុវិស័យរបស់ព្រះរាជាណាចក្រកម្ពុជាក្នុងការបង្កើតគោលនយោបាយអាហារនៅសាលារៀន បង្កើនមូលនិធិអាហារសាលារៀន កែលម្អកម្មវិធី និងអនុវត្តកញ្ចប់នៃអន្តរាគមន៍បំពេញបន្ថែម បង្កើតក្របខ័ណ្ឌត្រួតពិនិត្យ ដើម្បីវាស់វែងការអនុវត្តកម្មវិធី និងបង្កើតបណ្តាញសហគមន៍នៃឧត្តមានុវត្តន៍។
កិច្ចប្រជុំកំពូលសម្ព័ន្ធប្រតិបត្តិករកម្មវិធីផ្តល់អាហារនៅសាលារៀនតំបន់អាស៊ីអាគ្នេយ៍ ប្រព្រឹត្ដទៅចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០២៤ ដោយផ្តោតលើកិច្ចពិភាក្សាសំខាន់ៗ រួមមាន ស្ថានភាពនៃការផ្តល់អាហារនៅតាមសាលារៀននៅតំបន់អាស៊ីអាគ្នេយ៍ គោលនយោបាយ, ការតាក់តែងច្បាប់ និងអភិបាលកិច្ចសម្រាប់ការបង្កើនគុណភាពនៃការផ្តល់អាហារនៅតាមសាលារៀន, ការផ្តល់ហិរញ្ញប្បទានប្រកបដោយនិរន្តរភាពសម្រាប់ការផ្តល់អាហារដល់សាលារៀន, បរិវត្តកម្មប្រព័ន្ធស្បៀងអាហារតាមរយៈការផ្តល់អាហារតាមសាលារៀន និងភាពជាដៃគូសម្រាប់ភាពជោគជ័យដ៏ល្អប្រសើរ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កិច្ចប្រជុំកំពូលសម្ព័ន្ធប្រតិបត្តិករកម្មវិធីផ្តល់អាហារនៅសាលារៀនតំបន់អាស៊ីអាគ្នេយ៍ ជាការបញ្ជាក់ពីកិច្ចសហប្រតិបត្តិការដ៏ចាំបាច់បំផុតដែលស្ថាប័នពាក់ព័ន្ធទាំងអស់នៃបណ្តាប្រទេសក្នុងតំបន់អាស៊ីអាគ្នេយ៍ នឹងត្រូវរួមសហការលើគោលនយោបាយ ដែលមានគោលដៅលើកកម្ពស់សុខភាព ការអប់រំ និងសក្តានុពលនាថ្ងៃអនាគតសម្រាប់កុមារ តាមរយៈនិរន្តរភាពនៃកម្មវិធីផ្តល់អាហារនៅសាលារៀន។ លោកជំទាវបន្តថា កិច្ចប្រជុំនេះ មានគោលបំណងធានាឱ្យបានកាន់ច្បាស់លាស់ថា កុមារនៅបណ្តាប្រទេសក្នុងតំបន់អាស៊ីអគ្នេយ៍ និងតំបន់ផ្សេងៗទៀត នឹងទទួលបានអាហារនៅសាលារៀនប្រកប ដោយអាហារូបត្ថម្ភខ្ពស់ និងសុខភាពប្រសើរ នៅត្រឹមបំណាច់ឆ្នាំ២០៣០។
បើតាមអ្នកនាំពាក្យក្រសួងអប់រំ នាពេលបច្ចុប្បន្ននេះ រាជរដ្ឋាភិបាលកម្ពុជាតាមរយៈក្រសួងអប់រំ យុវជន និងកីឡា បានអនុវត្តកម្មវិធីផ្តល់អាហារនៅសាលារៀនដោយប្រើកសិផលសហគមន៍ ដោយមានវិសាលភាពលើសាលាបឋមសិក្សាគោលដៅប្រមាណ២ភាគ៣ ជាមួយនឹងការប្តេជ្ញាចិត្តក្នុងការសម្រេចបានការគ្របដណ្តប់ផ្នែកថវិកាអនុវត្តកម្មវិធីឱ្យបានដល់សាលាបឋមសិក្សាចំនួន១១១៤ និងផ្តល់អាហារជូនដល់កុមារឱ្យបាន៣០០ពាន់នាក់ នៅអំឡុងឆ្នាំ២០២៨។ កម្មវិធីនេះ ក៏បានអនុវត្តទន្ទឹមគ្នាជាមួយកម្មវិធីអាហារូបករណ៍ជាសាច់ប្រាក់ ដែលផ្តល់ជូនសិស្សានុសិស្សមកពីគ្រួសារក្រីក្រពីកម្រិតបឋមសិក្សាដល់មធ្យមសិក្សាទុតិយភូមិប្រមាណ៦៥ម៉ឺននាក់។
គួរជម្រាបជូនថា កិច្ចប្រជុំកំពូលសម្ព័ន្ធប្រតិបត្តិករកម្មវិធីផ្តល់អាហារនៅសាលារៀនតំបន់អាស៊ីអាគ្នេយ៍ ជាវេទិកាដ៏ពិសេសមួយដែលរដ្ឋាភិបាល និងដៃគូអភិវឌ្ឍអាចប្រមូលផ្តុំគ្នាផ្តោះប្តូរឧត្តមានុវត្តន៍ និងបញ្ជាក់សារជាថ្មីនូវការប្តេជ្ញាចិត្តក្នុងការផ្តល់អាហារដែលប្រកបដោយអាហារូបត្ថម្ភដល់កុមារ ដែលជាការតម្កល់ភាពចាំបាច់នៃកម្មវិធីផ្តល់អាហារនៅសាលារៀនជាឧបករណ៍មួយនៃកម្មវិធីជាតិគាំពារសង្គម។ កិច្ចប្រជុំនេះនឹងគូសបញ្ជាក់ពីបំណងប្រាថ្នារបស់កម្ពុជាចំពោះការបណ្តុះមូលធនមនុស្ស ការជំរុញកំណើនសេដ្ឋកិច្ច និងការធានាសុខមាលភាពកុមារ៕
