ពង្រឹងសុភមង្គល ឬឱបសេចក្ដីឈឺផ្សាចិត្ត គឺជាជម្រើសរបស់មនុស្សម្នាក់ៗ ចំណែកឯការគិតចំពោះរឿងដែលចាំបាច់ ឬចាក់ចោលការគិត ដែលមិនផ្តល់នូវប្រយោជន៍ក៏ជាជម្រើសដូចគ្នាដែរ។

ជារឿងធម្មជាតិនៃរបត់ជីវិតរបស់មនុស្សដែលពេលខ្លះ ទ្រឹងជញ្ជឹងគិតអំពីអ្វីមួយហួសហេតុផុតវិស័យ រហូតក្លាយទៅជាក្ដីបារម្ភគ្មានទីបញ្ចប់ និងបង្កភាពស្មុគស្មាញក្នុងការរស់នៅប្រចាំថ្ងៃឥតដែនកំណត់។ ប៉ុន្តែអ្វីដែលលើសអំពីរឿងរ៉ាវធម្មជាតិនៃមនុស្សនោះ គឺ ការបណ្តោយឱ្យខ្លួនគិតច្រើនចំពោះរឿងដែលមិនចាំបាច់ ដោយមិនបានយកចិត្តទុកដាក់អប់រំចិត្ត ឬក៏ការគ្រប់គ្រងរបៀបគិតឱ្យបានត្រឹមត្រូវនោះទេ វាអាចបង្កជាបញ្ហាចោទចំពោះសុខភាពផ្លូវចិត្ត។ ទាំងនេះហើយ ជាកត្តាដែលយើងត្រូវមកជជែកអំពីដំណោះស្រាយ ថា តើធ្វើយ៉ាងណា ដើម្បីរក្សាការគិតចំពោះរឿងដែលសំខាន់ៗ? ដោយហេតុថា ប្រសិនបើមិនយកចិត្តទុកដាក់លើចំណុចនេះទេ វាជាចំណែកបង្កឱ្យមានក្ដីបារម្ភច្រើនលើសលុប បាត់បង់ការផ្តោត បង្កើនភាពស្រពេចស្រពិល រួមទាំងបង្កនូវការគិតអវិជ្ជមានកាន់តែ ច្រើនទៅៗ ហើយបង្កើតបានទៅជាអាការៈថប់បារម្ភទៀតផង។ យោងតាមគេហទំព័រ Yourtango បានបង្ហាញគន្លឹះ ៤វិធីកាត់បន្ថយការបារម្ភចំពោះរឿងដែលមិនចាំបាច់ ។

១. ថែទាំខ្លួនឯង ៖ ការទុកចន្លោះសម្រាប់ឱ្យខ្លួនឯងមានឱកាសបានសម្រាក និងឆ្លុះបញ្ចាំងរាល់សកម្មភាពប្រចាំថ្ងៃ គឺជារឿងដែលត្រូវធ្វើមុនគេនៅក្នុងចំណុចនេះ។ ចំណាយពេលនៅជាមួយខ្លួនឯង និងកាត់បន្ថយសម្ពាធនៃការគិត, តាមរយៈការកាត់សម្ពាធចេញពីការគិត បានរួមចំណែកជួយឱ្យមនុស្សអនុវត្តន៍ការងារមានប្រសិទ្ធភាព លឿនជាងមុន ថែមទាំងជំរុញឱ្យមានស្មារតីខ្ពស់នៅក្នុងការផ្តោតទៀត។ ចំពោះសកម្មភាពដែលជាជំនួយដល់ការផ្ចង់ជាមួយនឹងខ្លួនឯង គេអាចធ្វើឡើងតាមរយៈការធ្វើសមាធិ ហាត់យូហ្គា ដើរក្នុងទីធ្លាដែលមានធម្មជាតិ ឬសកម្មភាពផ្សេងៗទៀត ដែលធ្វើឱ្យ​មានសុខភាពល្អ និងអារម្មណ៍ស្រស់ស្រាយ។

២. ផ្តោតលើរឿងអ្វីដែលអ្នកអាចគ្រប់គ្រងបាន ៖ គ្រាន់តែបើកភ្នែកភ្លាម មានព័ត៌មានជាច្រើនផុសផុលលើបណ្តាញសង្គម មិនថាអ្វីដែលយើងត្រូវការ ឬមិនត្រូវការនោះទេ វានឹងសាយភាយមកទាំងអស់ចូលក្នុងបណ្តាញគណនីផ្ទាល់ខ្លួន បើយើងគ្មានសមត្ថភាពក្នុងការគ្រប់គ្រងវា។ ការទទួលបានព័ត៌មាន ឬការផ្សាយពាណិជ្ជកម្មដ៏លើសលប់ទាំងនេះ ក៏ជាបុព្វហេតុប៉ះពាល់ដល់ការគ្រប់គ្រងការគិតផងដែរ ហើយដើម្បីជាជំនួយដល់ការផ្តោតលើរឿងអ្វីដែលអ្នកអាចគ្រប់គ្រងបាន ការប្រើប្រាស់ឧបករណ៍បច្ចេកវិទ្យា និងការកំណត់ប្រភេទមាតិកាដែលនាំឱ្យជីវិតផ្ទាល់ខ្លួនរុងរឿង ឬការកំណត់មាតិកាដែលត្រូការចាំបាច់ណាមួយ គឺជាចំណែកក្នុងការផ្តោតសតិអារម្មណ៍។

៣. ធ្វើសកម្មភាពប្រកបដោយក្ដីអំណរ ៖ ដើម្បីអនុវត្តន៍សកម្មភាពដឹងគុណអ្វីមួយ ជាដំបូងអាចអង្គុយសញ្ចឹងគិតបន្តិចទៅដល់វត្ថុ មនុស្ស​ សត្វ​ ឬកាលៈទេសៈ និងស្ថានភាពណាមួយដែលយើងមានមោទនភាពចំពោះរឿងរ៉ាវទាំងនោះ រួមទាំងការមានទស្សនៈពេញចិត្ត ឬចេះអរគុណចំពោះអ្វីៗ ដែលខ្លួនមាន គឺជាចំណែកនាំមនុស្សទៅរកវិថីសុភមង្គល។ ជាដំបូងអ្នកអាចជ្រើសវត្ថុ ឬសកម្មភាពបីយ៉ាងដែលត្រូវអរគុណ ហើយតាមរយៈការរំលឹកដឹងគុណ បានផ្តល់នូវសន្តិភាពចេញពីខាងក្នុងខ្លួន ការបន្តអនុវត្តបែបនេះជារឿយៗ ចំពោះលទ្ធផលនឹងជំរុញបាននូវការផ្លាស់ប្តូរជាវិជ្ជមានក្នុងជីវិត។

៤. បង្កើតគោលដៅគ្រប់គ្រងការគិត ៖ ក្នុងករណីយើងត្រូវការផ្តោតចំពោះការងារអ្វីមួយ កត្តាចម្បងដែលត្រូវធ្វើមុនគេ គឺបង្កើតផែនការ នៃការគិតជាមុនសិន។ គេអាចអនុវត្តន៍សកម្មភាពបែបនេះតាមរយៈ ការយកក្រដាសដែលទទេស្អាត រួចសរសេរអំពីបញ្ហា ឬក្ដីបារម្ភទាំងអស់ដាក់បញ្ចូលទៅក្នុងក្រដាសនោះ បន្ទាប់មកសរសេរដំណោះស្រាយ និងគំនិតដែលមាន បន្ថែមទៅក្នុងក្រដាសនោះ។ ក្រោយអនុវត្តន៍បែបនេះ អ្នកនឹងរកឃើញអំពីចំណោទបញ្ហា រួមទាំងដំណោះស្រាយមកជាមួយគ្នាដែរ។ ក្នុងករណីខ្លះការបារម្ភខ្លាំងពេកអាចជារឿងធម្មតា ប៉ុន្តែបើបណ្តោយយូរៗទៅបង្កបានជា​ឥទ្ធិពលអវិជ្ជមាន។ ដូច្នេះការគ្រប់គ្រងនឹងស្ថានការណ៍ដែលនាំឱ្យការគិតគ្មានរបៀបរៀបរយត្រូវបានកាត់បន្ថយ។ ជំនួសមកវិញនូវការគិតចំពោះរឿងរ៉ាវដែលអាចដោះស្រាយបាន ក៏ដូចជាការជៀសវាងការចំណាយថាមពលលើសលប់ និងការជៀសចាកពីអាការៈថប់បារម្ភ៕