ប្រធានាធិបតីនៃសាធារណរដ្ឋបារាំង លោក អេម៉ានុយអែល ម៉ាក្រុង បានបង្ហាញបំណងចង់ឱ្យកម្ពុជាពង្រីកការបង្រៀនភាសាបារាំងឱ្យកាន់តែទូលំទូលាយនៅក្នុងប្រព័ន្ធអប់រំកម្ពុជា ចាប់ពីកម្រិតបឋមសិក្សា មធ្យមសិក្សា ឧត្តមសិក្សា រហូតដល់ការសិក្សាជាន់ខ្ពស់។
លោក ម៉ាក្រុង បានលើកឡើងពីបំណងនេះ ក្នុងជំនួបទ្វេភាគីជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នាថ្ងៃទី១៥ ខែវិច្ឆិកា ឆ្នាំ២០២៦។
ការជំរុញឱ្យមានការបង្រៀនភាសាបារាំងកាន់តែទូលំទូលាយនៅកម្ពុជា ត្រូវបានមើលឃើញថា ជាផ្នែកមួយនៃការពង្រឹងទំនាក់ទំនងប្រវត្តិសាស្ត្រ និងវប្បធម៌រវាងកម្ពុជា និងបារាំង ព្រមទាំងការលើកកម្ពស់កិច្ចសហប្រតិបត្តិការក្នុងវិស័យអប់រំ និងការស្រាវជ្រាវ។
លោកបណ្ឌិត សំអោរ អង្គារតន៍ អគ្គនាយករងគោលនយោបាយ និងផែនការនៃក្រសួងអប់រំ យុវជន និងកីឡា បានប្រាប់ AMS ថា ការចេះភាសាបរទេសច្រើន មិនត្រឹមតែជួយដល់ការទំនាក់ទំនងប៉ុណ្ណោះទេ ប៉ុន្តែថែមទាំងជួយឱ្យសិស្ស និងនិស្សិតស្គាល់វប្បធម៌ អរិយធម៌ និងរបៀបគិតផ្សេងៗគ្នា ដែលអាចយកមកសំយោគសម្រាប់ការអភិវឌ្ឍប្រទេស។
លោកបន្តថា ភាសាបារាំងនាពេលបច្ចុប្បន្ន មិនគួរត្រូវបានមើលឃើញត្រឹមតែជាឧបករណ៍សម្រាប់ស្វែងយល់ពីវប្បធម៌ និងអរិយធម៌បារាំងប៉ុណ្ណោះទេ ប៉ុន្តែថែមទាំងមានសារៈសំខាន់សម្រាប់ការស្រាវជ្រាវវិទ្យាសាស្ត្រ និងការតភ្ជាប់រវាងសាកលវិទ្យាល័យ និស្សិត និងគ្រូបង្រៀន ជាពិសេសក្នុងវិស័យសុខាភិបាល និងវិស័យជំនាញផ្សេងៗ។

បើតាមលោកបណ្ឌិត សំអោរ អង្គារតន៍ ការចេះភាសាបារាំងបន្ថែមមួយទៀត នឹងជួយឱ្យយុវជនកម្ពុជាមានឱកាសកាន់តែច្រើនក្នុងការប្រកួតប្រជែងនៅក្នុងទីផ្សារការងារ។
លោកបានអំពាវនាវដល់សិស្ស និងនិស្សិតកម្ពុជា ឱ្យសិក្សាភាសាបារាំងបន្ថែម ដោយសារកម្ពុជាមានវត្តមានវិនិយោគិនបារាំង និងសភាពាណិជ្ជកម្មបារាំង-ខ្មែរ ដែលអាចបង្កើតឱកាសការងារ និងកិច្ចសហប្រតិបត្តិការសម្រាប់អ្នកមានជំនាញភាសាបារាំង។
តាមរបាយការណ៍របស់អង្គការអន្តរជាតិហ្វ្រង់កូហ្វូនី (OIF) ស្តីពី «ភាសាបារាំងនៅលើពិភពលោក ឆ្នាំ២០២៦» អ្នកនិយាយភាសាបារាំងនៅទូទាំងពិភពលោកមានប្រមាណ ៣៩៦លាននាក់ ដែលធ្វើឱ្យភាសាបារាំងក្លាយជាភាសាដែលមានអ្នកនិយាយច្រើនជាងគេលំដាប់ទី៤ នៅលើពិភពលោក។

សម្រាប់កម្ពុជា របាយការណ៍ដដែលបង្ហាញថា មានប្រជាជនប្រមាណ ៤៦៣,០០០នាក់ ឬប្រមាណ ៣ភាគរយ នៃប្រជាជនសរុប ១៧.៧លាននាក់ ដែលនិយាយភាសាបារាំង។
ការជំរុញឱ្យពង្រីកការបង្រៀនភាសាបារាំងនៅកម្ពុជា ត្រូវបានរំពឹងថា នឹងរួមចំណែកដល់ការពង្រឹងកិច្ចសហប្រតិបត្តិការកម្ពុជា-បារាំង លើវិស័យអប់រំ វិទ្យាសាស្ត្រ សុខាភិបាល និងការអភិវឌ្ឍធនធានមនុស្ស ព្រមទាំងបង្កើនឱកាសសិក្សា និងការងារសម្រាប់យុវជនកម្ពុជា៕












































































