ក្រោយការប្រកួតជម្រុះជាច្រើនវគ្គ ទីបំផុតគណៈកម្មការបានរកឃើញម្ចាស់ជ័យលាភីឆ្នើមចំនួន ៥ក្រុម ក្នុងនោះគម្រោងជ្រោយសុវណ្ណភូមិ បានក្លាយជាម្ចាស់ជ័យលាភីលេខ១ ក្នុងការប្រកួតប្រជែងស្នាដៃរៀបចំឧទ្យានកោះនរា ក្រោមប្រធានបទ “បេះដូងរាជធានី” កាលពីថ្ងៃទី៦ ខែវិច្ឆិកា ឆ្នាំ២០២៦។

លោក លី ប៊ុនវឌ្ឍ ជាសមាជិកក្រុមជ័យលាភីលេខ១ បានប្រាប់ AMS ថា ការរៀបចំឱ្យមានកម្មវិធីប្រកួតប្រជែងស្នាដៃរៀបចំឧទ្យានកោះនរានេះ គឺជាកម្មវិធីមួយល្អបំផុត ដែលផ្ដល់ដល់យុវជន​ចូលរួមបញ្ចេញគំនិតក្នុងការរចនាទីក្រុងឱ្យកាន់តែមានភាពទាក់ទាញ។

លោក ប៊ុនវឌ្ឍ បន្ថែមថា ក្រុមរបស់លោកបានខិតខំប្រឹងប្រែងអស់ពីសមត្ថភាព ដើម្បីយកជ័យជម្នះមួយនេះ។ លី ប៊ុនវឌ្ឍ បន្តថា ក្រុមរបស់ខ្លួនធ្លាប់រំពឹងថា នឹងអាចយកជ័យលាភីលេខ១ ក្នុងការប្រកួតនេះ ពីព្រោះគំនិត និងការរចនារបស់ក្រុមខ្លួនមានភាពខុសប្លែកពីគេ (Unique) ដោយគម្រោងមិនមែនត្រឹមតែជាការរចនាផ្ដោតទៅលើរូបសំណាកនោះទេ ប៉ុន្តែគឺជាការរចនាទៅលើបរិស្ថានជុំវិញទាំងមូល។

សម្រាប់ លោក ស្តារៀ អាប្រាហាម ដែល​ជាសមាជិកក្រុមជ័យលាភីលេខ១ និយាយថា នេះជាការចូលរួមប្រកួតលើកទីមួយរបស់លោកនៅក្នុងប្រទេសកម្ពុជា។ លោក ស្តារៀ អាប្រាហាម បានបង្ហាញអារម្មណ៍សប្បាយរីករាយជាខ្លាំង ចំពោះការខិតខំរបស់ក្រុមខ្លួន រហូតទទួលបានជ័យលាភីលេខ១នេះ។

សមាជិកក្រុម​ម្នាក់ទៀត គឺលោក លី ប៊ុនធន បន្ថែមថា ចំពោះចំណុចពិសេស ដែលធ្វើឱ្យក្រុមខ្លួនអាចជាប់ជ័យលាភីលេខ១ ក្នុងកម្មវិធីនេះ គឺគំនិតរចនា។ ប៊ុនធន បន្តថា ក្រុមរបស់ខ្លួនបានចំណាយពេលវេលាច្រើន ដើម្បីបង្កើតគំនិតរចនាគម្រោងជ្រោយសុវណ្ណភូមិ ឱ្យមានលក្ខណៈធំទូលាយ ថ្មីគ្រប់គ្រាន់ និងសាមញ្ញ ដែលប្រជាជនខ្មែរគ្រប់រូប គ្រប់ជំនាន់ គ្រប់វ័យ ងាយយល់ និងមានអារម្មណ៍ផ្សារភ្ជាប់ជាមួយគំនិតរចនានោះ។ ប៊ុនធន បន្តថា តាមរយៈការចូលរួមកម្មវិធីនេះ ក្រុមរបស់ខ្លួនមានឱកាសក្នុងការបញ្ចេញនូវគំនិត ដើម្បីរួមចំណែកជួយលើកស្ទួយទីក្រុងឱ្យមានសោភ័ណភាពជាងមុខ។

លោកជំទាវ សេរី សូរិយា អនុរដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារ មានប្រសាសន៍ថា កម្មវិធីប្រកួតប្រជែងស្នាដៃរៀបចំឧទ្យានកោះនរា ក្រោមប្រធានបទ “បេះដូងរាជធានី” ​បានសម្រេចលទ្ធផលគួរជាទីមោទនៈ និងបានបង្ហាញពីសារៈសំខាន់នៃការផ្ដល់ឱកាសដល់យុវជន និស្សិត និងអ្នកជំនាញវ័យក្មេង ចូលរួមចំណែកក្នុងការអភិវឌ្ឍទីក្រុងតាមចំណេះដឹង ជំនាញ និងគំនិតច្នៃប្រឌិតខ្ពស់។

បើតាម លោកជំទាវ សេរី សូរិយា ការប្រកួតនេះ ទទួលបានការចាប់អារម្មណ៍ និងការចូលរួមយ៉ាងសកម្ម ពីនិស្សិត និងអ្នកវិជ្ជាជីវៈ ដោយមានក្រុមចុះឈ្មោះសរុបចំនួន ៧៤ក្រុម ស្មើនឹងបេក្ខជន ២៤២រូប។

គួរជម្រាបជូនថា ការប្រកួតប្រជែងស្នាដៃ នៃការ​រចនារង្វង់មូល​ទីក្រុង​កោះនរា ទីក្រុងកោះពេជ្រ និង​រូបសំណាកតំណាង​ទីក្រុងកោះនរា ជា​កិច្ច​សហការ​រួមគ្នារវាង​ក្រសួងរៀបចំដែនដី នគរូបនីយកម្ម​ និងសំណង់ ជាមួយក្រុមហ៊ុន OCIC ក្នុងគោលបំណងរួមចំណែក​ដល់​ការ​លើក​កម្ពស់​សុខភាព​សាធារណៈ ទេសភាព សោភណភាព​ទីក្រុង និង​ផ្តល់នូវនិមិត្តរូបថ្មី​មួយ​បន្ថែមទៀត នៃការ​អភិវឌ្ឍរាជធានីភ្នំពេញ ដោយ​មានចក្ខុវិស័យ​ប្រែក្លាយ​ទីតាំង​ទីក្រុង​កោះនរា ឱ្យ​ទៅជា “បេះដូងរាជធានី”។ សម្រាប់ជ័យលាភីឆ្នើមទាំង៥ក្រុមចុងក្រោយ រួមមាន ជ័យលាភីលេខ១ បានទៅលើ​ក្រុម២២ គម្រោងជ្រោយសុវណ្ណភូមិ, ជ័យលាភីលេខ២ ​បានទៅលើ ក្រុម៧៤ គម្រោងនរា-ចតុរាជ, ជ័យលាភីលេខ៣ បានទៅលើ ក្រុម១១ គម្រោងមរតកកោះនរា, ជ័យលាភីលេខ៤ បានទៅលើក្រុម៤៣ គម្រោងចរន្តអក្សស៊ីនៃមាត់ទន្លេចតុមុខ, និងជ័យលាភីលេខ៥ បានទៅលើ ក្រុម៤០ គម្រោង QUADRAN៕