តាមរយៈក្រសួងអប់រំ យុវជន និងកីឡា និងក្រសួងការបរទេស និងសហប្រតិបត្តិការអន្តរជាតិ សហការជាមួយមន្ទីរអប់រំ នៃតំបន់ស្វយ័តជនជាតិជាំងក្វាងស៊ី នៃសាធារណរដ្ឋប្រជាមានិតចិន បានផ្ដល់អាហារូបករណ៍ចំនួន៨កន្លែង ដល់សិស្ស និស្សិត មន្ត្រីរាជការកម្ពុជា ទៅសិក្សានៅសាកលវិទ្យាល័យមួយចំនួននៅប្រទេសចិន។ ការជ្រើសរើសបេក្ខជនដើម្បីទទួលបានអាហារូបករណ៍ គឺជ្រើសរើសតាមការប្រឡងប្រជែងដែលរៀបចំដោយក្រសួងអប់រំ យុវជន និងកីឡា។

សាកលវិទ្យាល័យដែលអាហារូបករណ៍ផ្ដល់ជូនសម្រាប់ការសិក្សា​ថ្នាក់បរិញ្ញាបត្ររួមមាន ៖ សាកលវិទ្យាល័យ Guangxi, សាកលវិទ្យាល័យ Guangxi Normal, សាកលវិទ្យាល័យបច្ចេកវិទ្យា Guilin, សាកលវិទ្យាល័យ Nanning Normal, សាកលវិទ្យាល័យវេជ្ជសាស្ត្រ Youjiang, សាកវិទ្យាល័យវេជ្ជសាស្ត្រ Guilin, សាកលវិទ្យាល័យ Yulin Normal ដោយក្នុងមួយសាកលវិទ្យាល័យនឹងជ្រើសរើសម្នាក់។ ដោយឡែកសម្រាប់អាហារូបករណ៍ថ្នាក់បរិញ្ញាបត្រជាន់ខ្ពស់ សិក្សានៅសាកលវិទ្យាល័យ Guangxi Minzu ចំនួន១កន្លែង។

លក្ខខណ្ឌនៃការចុះឈ្មោះ ៖ សម្រាប់ការស្នើពាក្យប្រឡងថ្នាក់បរិញ្ញាបត្រជាន់ខ្ពស់ បេក្ខជនទាំងពីរភេទត្រូវមានសញ្ជាតិខ្មែរ មានអាយុមិនលើសពី៣៥ឆ្នាំ មានសញ្ញាបត្រថ្នាក់បរិញ្ញាបត្រ មានចំណេះដឹងភាសាចិន​ ឬអង់គ្លេសជ្រៅជ្រះ មានសុខភាពល្អបរិបូរណ៍ទាំងកាយសម្បទា សតិបញ្ញា និងមិនធ្លាប់ទទួលបានអាហារូបករណ៍របស់សាធារណរដ្ឋប្រជាមានិតចិនពីមុនមក។ សម្រាប់អ្នកដែលស្នើពាក្យថ្នាក់បរិញ្ញាបត្រ បេក្ខជនទាំងពីរភេទត្រូវមានសញ្ជាតិខ្មែរ មានអាយុមិនលើសពី២២ឆ្នាំ មានសញ្ញាបត្រមធ្យមសិក្សាទុតិយភូមិ ឬសញ្ញាបត្រដែលមានតម្លៃស្មើ មានចំណេះដឹងភាសាចិន ឬអង់គ្លេសជ្រៅជ្រះ មានសុខភាពល្អបរិបូរណ៍ទាំងកាយសម្បទា សតិបញ្ញា និងមិនធ្លាប់ទទួលបានអាហារូបករណ៍របស់សាធារណរដ្ឋប្រជាមានិតចិនពីមុនមក។

បេក្ខជនដែលចង់ស្នើពាក្យអាហារូបករណ៍ ត្រូវបំពេញពាក្យ និងភ្ជាប់សំណុំឯកសារមួយចំនួនដូចជា បង្កាន់ដៃទទួលពាក្យប្រឡង១ច្បាប់ ពាក្យសុំអាហារូបករណ៍១ច្បាប់ ជីវប្រវត្តិសង្ខេប១ច្បាប់ រូបថត៤គុណ៦ ចំនួន៤សន្លឹក (ផ្ទៃខាងក្រោយពណ៌ស ថតថ្មី) សញ្ញាបត្រមធ្យមសិក្សាទុតិយភូមិ (ច្បាប់ចម្លង)១ច្បាប់ សម្រាប់បេក្ខជនថ្នាក់បរិញ្ញាបត្រ និង ភ្ជាប់សញ្ញាបត្រថ្នាក់បរិញ្ញាបត្រ (ច្បាប់ចម្លង) សម្រាប់បេក្ខជនស្នើថ្នាក់បរិញ្ញាបត្រជាន់ខ្ពស់។ ជាមួយគ្នានេះ បេក្ខជនត្រូវភ្ជាប់ជាមួយនូវច្បាប់ដើម ដើម្បីពិនិត្យ និងផ្ទៀងផ្ទាត់ ដូចជា លិខិតបញ្ជាក់ពីគ្រឹះស្ថានសិក្សា/អត្តសញ្ញាណបណ្ណនិស្សិត (ថតចម្លង ១ច្បាប់) ចំពោះបេក្ខជនជានិស្សិត ឬ លិខិតបញ្ជាក់ពីអង្គភាពចំពោះបេក្ខជនជាមន្ត្រីរាជការ។

ការជ្រើសរើសបេក្ខជន នឹងត្រូវប្រឡងលើវិញ្ញាសា វប្បធម៌ទូទៅ ៩០នាទី និងភាសាអង់គ្លេស ៩០នាទី សម្រាប់ថ្នាក់បរិញ្ញាបត្រជាន់ខ្ពស់។ ចំពោះ ថ្នាក់បរិញ្ញាបត្រ នឹងត្រូវប្រឡងលើវិញ្ញាសា គណិតវិទ្យា ៩០នាទី និង ភាសាអង់គ្លេស ៩០នាទី។ កាលបរិច្ឆេទនៃការប្រឡងនាថ្ងៃទី០៤ ខែឧសភា ឆ្នាំ២០២៥។

ចាប់ទទួលពាក្យចុះឈ្មោះ ពីថ្ងៃផ្សាយដំណឹងរហូតដល់ថ្ងៃទី២៣ ខែមេសា ឆ្នាំ២០២៥ ម៉ោង៤រសៀល នៅនាយកដ្ឋានសហប្រតិបត្តិការអន្តរជាតិ និងកិច្ចអាស៊ាន ដែលមានអាសយដ្ឋាន អគារលេខ២៣ ផ្លូវលេខ៣៦០ សង្កាត់បឹងកេងកង រាជធានីភ្នំពេញ (ខាងកើតស្ថានីយទូរទស្សន៍អប្សរាប្រហែល៥០ម៉ែត្រ)៕