ពិធីបុណ្យប្រពៃណីជាតិខ្មែរមានច្រើនណាស់ ដោយឡែកបុណ្យប្រពៃណីធំជាងគេមានពីរគឺ បុណ្យចូលឆ្នាំខ្មែរ និងបុណ្យភ្ជុំបិណ្ឌ ដូចនេះប្រសិនបើអ្នករស់នៅ និងធ្វើការឆ្ងាយគ្រួសារត្រូវវិលត្រឡប់ទៅស្រុកកំណើតដើម្បីជួបជុំបងប្អូន និងត្រូវចំណាយលើការធ្វើដំណើរ ជូនលុយកាក់ដល់ឪពុកម្ដាយ ជូនសាច់ញាតិ ជូនយាយតា និងទៅធ្វើបុណ្យនៅវត្តជាដើម, ដូច្នេះអ្នកគួរមានគម្រោងសន្សំសម្រាប់បុណ្យទានប្រចាំឆ្នាំ និងរៀបចំបែងចែកការចំណាយឱ្យបានត្រឹមត្រូវ។ នេះជាការលើកឡើងរបស់លោក ទិត្យ កំរង ស្ថាបនិក និងជានាយកប្រតិបត្តិក្រុមហ៊ុនឫទ្ធិពល និងអេបកត់លុយ។

លោក ទិត្យ កំរង បានយល់ឃើញថា ក្នុងរដូវបុណ្យទាននេះនឹងធ្វើឱ្យមានការចំណាយច្រើនដូចនេះបុគ្គលគួរតែកត់សម្គាល់ពីការចំណាយប្រចាំខែរបស់ខ្លួនដូចដែលមានជាច្រើនមុខដូចជា ថ្លៃផ្ទះ ថ្លៃទឹកភ្លើង ថ្លៃអាហារ សម្លៀកបំពាក់ ថ្លៃសាំង ឬការបង់ប្រាក់កម្ចីប្រចាំខែ ឬការចំណាយសម្រាប់រៀនសូត្រផងដែរ។ ជាក់ស្ដែងអ្នកដែលមានប្រាក់ចំណូលខ្ពស់អាចនឹងងាយស្រួលក្នុងការបែងចែកការចំណាយ ប៉ុន្តែអ្នកដែលេមានប្រាក់ចំណូលសមរម្យ និងការចំណាយច្រើន ហើយមិនបានប្រុងប្រយ័ត្នក្នុងការចំណាយអាចបង្កជាផលលំបាកដល់ខ្លួនឯងជាច្រើន។

ស្ថាបនិក និងជានាយកប្រតិបត្តិក្រុមហ៊ុនឫទ្ធិពលរូបនេះបន្ថែមថា ដូចនេះប្រសិនបើអ្នកធ្វើការចំណាយមិនបានច្បាស់លាស់នឹងបង្កជាផលលំបាកជាច្រើនដែលមិនអាចមើលឃើញ ជាការប្រសើរអ្នកគួរតែមានគម្រោងសន្សំនិងចំណាយប្រចាំឆ្នាំដើម្បីចៀសវាងការចំណាយថវិការដែលត្រូវចំណាយប្រចាំខែ។ លោក​ ទិត្យ កំរង បានបន្ថែមថា ការចាយវាយដោយខ្ជះខ្ជាយ និងមិនប្រុងប្រយ័ត្នអាចបង្កផលអាក្រក់ដល់បុគ្គលដូចជា សម្រាប់សិស្សនិស្សិតអាចបង្កផលប៉ះពាល់ដល់ការចំណាយលើការសិក្សានិងរស់នៅ ប្រសិនបើអ្នកមានគ្រួសារ និងមានកូនតូចនឹងត្រូវប៉ះពាល់ដល់ការចំណាយផ្សេងៗសម្រាប់កូនផងដែរ។

ជាវិធីសាស្ត្រល្អ ដើម្បីកុំឱ្យមានផលប៉ះពាល់ក្នុងការចំណាយពេលមានបុណ្យទាន ឬកម្មវិធីផ្សេងៗអ្នកគួរតែមានគម្រោងចំណាយប្រចាំឆ្នាំ មានការបែកចែកសម្រាប់បុណ្យទានប្រចាំឆ្នាំឱ្យបានច្បាស់លាស់ ដើម្បីមានកញ្ចប់សម្រាប់ចំណាយក្នុងឱកាសបុណ្យទានផ្សេងៗ៕