និស្សិតកម្ពុជាដែលកំពុងសិក្សាឆ្នាំទី៣ និងទី៤ ចំនួន៤រូប ទទួលបានឱកាសទៅធ្វើ​កម្មសិក្សា​ និងផ្លាស់ប្តូរការសិក្សា រយៈពេល៥ខែ នៅប្រទេសហូឡង់ ដើម្បីដកស្រង់បទពិសោធន៍បច្ចេកវិទ្យា ក្រោមកិច្ចសហប្រតិបត្តិការនៃសាកលវិទ្យាល័យខេមតិច និងសាកលវិទ្យាល័យ Windesheim University of Applied Sciences។

និស្សិតកម្ពុជា ៤រូប ដែលទទួលបានឱកាសទៅចុះកម្មសិក្សា និងផ្លាស់ប្ដូរការសិក្សា រយៈពេល៥ខែ នៅប្រទេសហូឡង់ បានចេញដំណើរ​កាលពីថ្ងៃទី២៦ ខែមករា ឆ្នាំ២០២៦ រួមមាន លោក អឿន វីរៈយុទ្ធ និស្សិតឆ្នាំទី៤ ជំនាញវិស្វកម្មសូហ្វវែរ,​ លោក វិសាល ភូមិន្ទ សិក្សាឆ្នាំទី៤ ជំនាញវិស្វកម្មរ៉ូបូតនិងស្វ័យប្រវត្តិកម្ម, កញ្ញា អាន ស៊ាវលី និស្សិតឆ្នាំទី៤ ជំនាញសន្តិសុខតាមប្រព័ន្ធអ៊ីនធឺណែត និងកញ្ញា អ៊ីវ ម៉ីថេង និស្សិតឆ្នាំទី៣ ជំនាញបញ្ញាធុរកិច្ច និងគ្រប់គ្រងហានិភ័យ។

កញ្ញា ណយ ឆវិន ប្រធានផ្នែកកិច្ចការនិស្សិត និងអ្នកសម្របសម្រួលផ្នែកការផ្លាស់ប្តូរការសិក្សា​ នៃសាកលវិទ្យាល័យខេមតិច មានប្រសាសន៍ថា និស្សិតនៃសាកលវិទ្យាល័យខេមតិច មានជំនាញទន់​ ជំនាញរឹង និងអន្តរវប្បធម៌រួចជាស្រេច។ កញ្ញា ណយ ឆវិន បន្តថា ការសម្រេចជ្រើសរើសនិស្សិតឆ្នាំទី៣ និងទី៤ ចំនួន៤រូបនេះ ឱ្យទៅចុះកម្មសិក្សា និងផ្លាស់ប្តូរការសិក្សារយៈពេល៥ខែ នៅប្រទេសហូឡង់ គឺដើម្បីឱ្យពួកគេត្រៀមខ្លួនក្នុងការសិក្សា និងធ្វើការងារជាមួយនិស្សិតអន្តរជាតិដទៃទៀត។

ប្រធានផ្នែកកិច្ចការនិស្សិត និងអ្នកសម្របសម្រួលផ្នែកការផ្លាស់ប្តូរការសិក្សា​នៃសាកលវិទ្យាល័យខេមតិច រូបនេះ បញ្ជាក់ថា និស្សិតខេមតិចទាំងបួនរូបនេះ ជានិស្សិតឆ្នើមលើគម្រោងហាត់ការនៅសាកលវិទ្យាល័យ និងការសិក្សា។ ស្របគ្នានេះ ពួកគេនឹងទៅសិក្សាជាមួយនិស្សិតអន្តរជាតិ និងចុះហាត់ការដោយផ្ទាល់ជាមួយក្រុមហ៊ុនផ្នែកបច្ចេកវិទ្យា និងឧស្សាហកម្មរ៉ូប៉ូត នៅក្នុងប្រទេសហូឡង់។

កញ្ញា ណយ ឆវិន សង្ឃឹមថា និស្សិតខេមតិច​ទាំង៤រូបនេះ​ នឹងរៀនបានពីវប្បធម៌ហូឡង់ របៀបនៃការធ្វើការអន្តរវប្បធម៌ បច្ចេកវិទ្យាថ្មីៗដែលក្រុមហ៊ុនកំពុងប្រើប្រាស់ និងអភិវឌ្ឍន៍ជាដើម ហើយជឿជាក់ថា ការផ្លាស់ការសិក្សា និងការហាត់ការនេះ នឹងជំរុញឱ្យនិស្សិតកម្ពុជាក្លាយជាពលរដ្ឋសកល និងនាំមកនូវបច្ចេកវិទ្យាថ្មីៗមកប្រទេសកម្ពុជាផងដែរ៕