ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្មេងស្រីនៅវ័យកុមារភាគច្រើនបានកាត់បន្ថយការរៀបការនៅវ័យកុមារក្រោយមានការផ្សព្វផ្សាយ និងបានស្វែងយល់ពីផលលំបាកនៃការរៀបការនៅវ័យកុមារ។ នេះជាការលើកឡើងរបស់ កញ្ញា ញើ ស្អែន ជនជាតិដើមភាគតិច ព្រៅ និងជាសមាជិកម្នាក់ក្នុង «ក្លឹបកុមារ» នៃស្រុកតាវែង ខេត្តរតនគិរី។
យុវតី ញើ ស្អែន បានប្រាប់ឱ្យដឹងថា «ក្លឹបកុមារ» ជាក្រុមយុវជនក្នុងសហគមន៍ធ្វើការងារស្ម័គ្រចិត្តចុះអប់រំក្នុងភូមិនីមួយៗនៃស្រុក ដោយការផ្សព្វផ្សាយនឹងណែនាំដល់ប្រជាពលរដ្ឋឱ្យស្វែងយល់អំពីបញ្ហាធំចំនួន២ គឺ ការរៀបការវ័យកុមារ និងការមករដូវមិនទៀងទាត់។
យុវតី ស្អែន បន្តថា ក្នុងរយៈពេលជិត៣ឆ្នាំដែលបានធ្វើជាអ្នកស្ម័គ្រចិត្តនេះ កញ្ញាមើលឃើញមានការថយចុះនូវការរៀបការវ័យកុមាររបស់ក្មេងប្រុសស្រីជនជាតិដើមភាគតិចបានច្រើន និងការចេះរក្សាអនាម័យរបស់ក្មេងស្រីកំឡុងពេលមករដូវ ព្រោះពួកគាត់បានស្វែងយល់ពីការចុះសហគមន៍របស់ក្រុមក្លឹបកុមារនៅក្នុងសហគមន៍។
កញ្ញា ញើ ស្អែន បន្ថែមថា ការផ្សព្វផ្សាយនេះបានធ្វើឡើងព្រោះមានការគាំទ្រ និងចូលរួមសហការណ៍រវាងអាជ្ញាធរមូលដ្ឋានផ្ទាល់ ពីអង្គការភ្លែនអន្តរជាតិកម្ពុជា ការចូលរួមពីសំណាក់ឪពុកម្ដាយរបស់ក្មេងៗក្នុងភូមិ និងជាពិសេសការចូលរួមរបស់យុវជនខ្លួនឯងផ្ទាល់។
ជនជាតិដើមភាគតិចព្រៅ រូបនេះបានបង្ហាញពីមូលហេតុដែលក្មេងស្រី និងក្មេងប្រុសរៀបការនៅវ័យកុមារថា កាលពីមុនអាចមកពីកត្តាទំនៀមទម្លាប់រស់នៅរបស់ឪពុកម្ដាយ ឬក្នុងគ្រួសារ ប៉ុន្តែបច្ចុប្បន្នអាចមកពីកត្តាខ្លួនឯងផ្ទាល់ផងដែរ ព្រោះពួកគាត់មិនបានយល់ដឹងពីផលលំបាកនៃការរៀបការនៅវ័យកុមារ ការអនាម័យខ្លួនប្រាណនៅពេលមករដូវជាដើម។
ក្នុងនាមជាអ្នកធ្វើការងារស្ម័គ្រចិត្ត និងជាប្រជាពលរដ្ឋម្នាក់ក្នុងសហគមន៍តែមួយ កញ្ញាពិតជាសប្បាយរីករាយនៅពេលដែលបានឃើញប្រជាពលរដ្ឋបានយល់ដឹងអំពីបញ្ហានេះ និងមានចំនួនកាត់បន្ថយនៃការរៀបការនៅវ័យកុមាររបស់ក្មេងស្រីក្នុងស្រុកផងដែរ។
គួរបញ្ជាក់ផងដែរថា នៅក្នុងឆ្នាំ២០២៤នេះ ស្អែន បានដកឃ្លាខ្លះពីការងារស្ម័គ្រចិត្តក្នុងសហគមន៍ព្រោះជាឆ្នាំត្រូវប្រឡងថ្នាក់ទី១២ ហើយក្រោយពេលប្រឡងចប់នឹងនៅតែបន្តការងារនេះប្រសិនបើនាងមិនទាន់បានទៅបន្តការសិក្សានៅថ្នាក់ឧត្ដមសិក្សា ហើយនៅតែបន្តចូលរួមផ្សព្វផ្សាយនៅក្រោយពេលត្រឡប់មកសហគមន៍វិញ៕
