ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រោយការប្រកួតជជែកវែកញែកលើប្រធានបទជាច្រើនតំណាក់កាល ទីបំផុតគេបានរកឃើញក្រុម “ពុទ្ធនារីឬទ្ធិ” ដែលមានសមាជិក៤នាក់ ជាប់ជ័យលាភីលេខ១ ក្នុងកម្មវិធីប្រកួតជជែកដេញដោលទស្សនៈយុវជន វគ្គផ្ដាច់ព្រ័ត្រ រដូវកាលទី៥ ពាក់ព័ន្ធប្រធានបទស្រ្តី និងយេនឌ័រ។
យុវតី ឈាង ម៉ីនាង ជានិស្សិតឆ្នាំទី១ ជំនាញវិស្វករ នៃវិទ្យាស្ថានបច្ចេកវិទ្យាកម្ពុជា និងជាតំណាងក្រុម និយាយថា ការចូលរួមកម្មវិធីប្រកួតជជែកដេញដោលទស្សនៈយុវជននេះ ព្រោះចង់អភិវឌ្ឍជំនាញទន់ ជាពិសេសមត្ថភាពនិយាយឱ្យកាន់តែពូកែ។ លើសពីនេះ ចង់បានឱកាសចូលរួមកម្មវិធីប្រកួតនានា ដើម្បីមានអាទិភាពក្នុងការដាក់ពាក្យអាហារូបករណ៍ទៅសិក្សានៅក្រៅប្រទេស។
យុវតី ម៉ីនាង បញ្ជាក់បន្ថែមថា នៅពេលចូលរួមប្រកួតដំបូងក្រុមរបស់ខ្លួនមិនរំពឹងថាអាចជាប់ជ័យលាភីក្នុងកម្មវិធីនេះទេ តែក្រោយពេលបានស្គាល់សមាជិកក្រុម និងបានពិភាក្សាគ្នារួច ក្រុមក៏រំពឹងថា នឹងខំប្រឹងរួមគ្នាឱ្យអស់ពីសមត្ថភាពដើម្បីយកជ័យលាភីឱ្យបាន។ ម៉ីនាង បន្តថា នៅពេលបានជាប់ជ័យលាភីលេខ១នេះ ក្រុមរបស់ខ្លួនសប្បាយចិត្តជាខ្លាំង ដោយសារការខិតខំប្រឹងប្រែងរបស់ក្រុមរយៈពេល២ខែ ទទួលបានលទ្ធផលល្អ។
តំណាងក្រុម “ពុទ្ធនារីឬទ្ធិ” លើកឡើងថា ក្រុមរបស់ខ្លួនបានឈានមកដល់ការប្រកួតវគ្គផ្ដាច់ព្រ័តនេះ ជាក្រុមបដិសេធ លើប្រធានបទ «ចំណាកស្រុកជាកត្តាជំរុញឱ្យស្រ្តីមានការអភិវឌ្ឍខ្លួន គ្រួសារ និងសង្គមជាតិ»។ យុវតី ឈាង ម៉ីនាង បន្តថា កត្តាដែលជំរុញឱ្យក្រុមទទួលបានជោគជ័យលើការប្រកួត ដោយសារក្រុមរបស់ខ្លួនបានបដិសេធទៅប្រធានបទថា គឺមានតែការសិក្សាពេញមួយជីវិតទេ ដែលជាកត្តាជំរុញឱ្យស្រ្តីមានការអភិវឌ្ឍខ្លួន គ្រួសារ និងសង្គមជាតិបានល្អ។ ស្រ្តីត្រូវតែមានការសិក្សារៀនសូត្រនូវចំណេះ ជំនាញជាមុនសិន ហើយបើទោះជាចង់ចំណាកស្រុកក៏ស្រ្តីមានជំនាញខ្ពស់ ដើម្បីទទួលបានប្រាក់ខែខ្ពស់ និងធានាសុខុមាលភាព។
យុវតី ឈាង ម៉ីនាង បន្ថែមថា ក្រុមរបស់ខ្លួនក៏បានលើកអំណះអំណាងចំនួន៣ ដើម្បីគាំទ្រគំនិតការសិក្សាពេញមួយជីវិតសម្រាប់ស្រ្តី រួមមាន ទី១. ពន្លឿនការអភិវឌ្ឍសមត្ថភាពស្រ្តីឱ្យក្លាយជាជនធានមនុស្ស ទី២. អភិវឌ្ឍជំនាញទន់ និងជំនាញរឹង និងទី៣. ពង្រឹងសុវត្ថិភាព និងសុខុមាលភាពស្រ្តី។
តំណាងក្រុមជ័យលាភីលេខ១ រូបនេះ បន្ថែមទៀតថា បន្ទាប់ពីបានចូលរួមកម្មវិធីប្រកួតជជែកដេញដោលនេះ ក្រុមខ្លួនទទួលបានបទពិសោធន៍ថ្មី មានគ្រូណែនាំ ចេះស្រាវជ្រាវ ស្វែងរកឯកសារយោង ព័ត៌មានថ្មីដែលមានប្រភពច្បាស់លាស់។ លើសពីនេះ ចេះប្រើប្រាស់បណ្ដាញសង្គម សម្រាប់ការស្រាវជ្រាវ ដូចជា ហ្វេសប៊ុក, google, AI និង Chatgpt ជាដើម។
យុវតី ឈាង ម៉ីនាង ក៏បានលើកទឹកចិត្តឱ្យយុវជនដែលជាសិស្សនិស្សិតគួរចូលរួមក្នុងកម្មវិធីប្រកួតប្រជែងនានា ដើម្បីទទួលបានជំនាញទន់ វិធីសាស្រ្តក្នុងការនិយាយ ចំណេះដឹងថ្មីៗ និងឱកាសថ្មីៗដើម្បីអភិវឌ្ឍសមត្ថភាព៕
