ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រុមភ្លេងកាយរឹទ្ធិខេត្តឧត្តមមានជ័យ បានក្លាយជាម្ចាស់ជ័យលាភីលេខ១ ក្នុងការប្រកួតក្រុមភ្លេងកាយរឹទ្ធិថ្នាក់ជាតិលើកទី២ ក្រោយឆ្លងកាត់ការប្រកួតជម្រុះជាច្រើនដំណាក់កាល ខណៈជ័យលាភីលេខ២ បានលើខេត្តកោះកុង និងជ័យលាភីលេខ៣ បានលើខេត្តកណ្ដាល។
ក្រុមភ្លេងកាយរឹទ្ធិដែលបានឈានដល់វគ្គផ្ដាច់ព្រ័ត្រ មានចំនួន៥ក្រុមប៉ុណ្ណោះ គឺក្រុមភ្លេងកាយរឹទ្ធិខេត្តរតនគិរី, ខេត្តកោះកុង, ខេត្តកណ្តាល, រាជធានីភ្នំពេញ និងក្រុមភ្លេងកាយរឹទ្ធិខេត្តឧត្តរមានជ័យ។ ក្រោយការប្រកួតដ៏ស្វាហាប់ ស្មារតីយកចិត្តទុកដាក់ សាមគ្គីភាព បានជំរុញឱ្យក្រុមភ្លេងកាយរឹទ្ធិខេត្តឧត្តរមានជ័យ ក្លាយជាម្ចាស់ជ័យលាភី នៃការប្រកួតក្រុមភ្លេងកាយរឹទ្ធិថ្នាក់ជាតិ លើកទី២ ឆ្នាំ២០២៥។
លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា និងជាអនុប្រធានកាយរិទ្ធិជាតិកម្ពុជា មានប្រសាសន៍ថា ការប្រកួតភ្លេងកាយរឹទ្ធិ ដែលមិនត្រឹមតែជាការប្រកួតប្រជែងសមត្ថភាពប៉ុណ្ណោះទេ ប៉ុន្តែក៏បានផ្ដល់នូវផលប្រយោជន៍ជាច្រើនដល់ក្មួយៗ ទាំងផ្នែករាងកាយ ផ្លូវចិត្ត សង្គម និងផ្នែកអប់រំ។
រដ្ឋលេខាធិការប្រចាំការក្រសួងអប់រំ បញ្ជាក់បន្ថែមថា ការចាញ់ឈ្នះនាពេលនេះ គឺមិនមែនជាចំណុចសំខាន់នោះទេ អ្វីដែលសំខាន់បំផុតគឺបទពិសោធន៍ ការរៀនសូត្រ មិត្តភាព និងស្មារតីសាមគ្គីភាព ដែលក្មួយៗបានទទួលពីការប្រកួតប្រជែងនេះ និងសូមលើកទឹកចិត្តឱ្យបន្តខិតខំអភិវឌ្ឍសមត្ថភាពរបស់ខ្លួនបន្ថែមទៀត ដើម្បីក្លាយជាធនធានមនុស្សដ៏មានតម្លៃសម្រាប់ប្រទេសជាតិ។
ជាមួយគ្នានេះ លោកជំទាវ ស្រូយ សុជាតិ អគ្គលេខាធិការ នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីអភិវឌ្ឍន៍យុវជន មានប្រសាសន៍ថា អស់រយៈពេលជាច្រើនខែមកហើយ ដែលនាយកដ្ឋានសហប្រតិបត្តិការកាយរឹទ្ធិ បានរៀបចំការប្រកួតនេះឡើង ហើយបានធ្វើការប្រកួតជម្រុះជាច្រើនវគ្គជាច្រើនសារ ដើម្បីជ្រើសរើសយកលេខ១ លេខ២ និងលេខ៣ ប៉ុន្តែប្អូនៗកាយរឹទ្ធិគ្រប់កងទាំងអស់បានខិតខំប្រឹងប្រែងអស់ពីកម្លាំងកាយ កម្លាំងចិត្ត ដើម្បីបង្ហាញនូវទេពកោសល្យដ៏ប៉ិនប្រសប់របស់ខ្លួន។
លោកជំទាវ ស្រូយ សុជាតិ បន្ថែមថា គ្មានអ្វីប្រសើរជាងការជោគជ័យរបស់ខ្លួននោះទេ គឺការជោគជ័យដែលបានមកពីការខិតខំប្រឹងប្រែងរបស់ក្រុមភ្លេងកាយរឹទ្ធិរាជធានីខេត្ត។
បើតាម លោកជំទាវ ស្រូយ សុជាតិ សម្រាប់រង្វាន់ដែលទទួលបាន ក្រុមជ័យលាភីលេខ១ ទទួលបានថវិកាចំនួន ២០លានរៀល មេដាយមាស និងដំបងបញ្ជាភ្លេងមាសចំនួន ១។ ជ័យលាភីលេខ២ បានទៅលើក្រុមភ្លេងកាយរឹទ្ធិខេត្តកោះកុង ទទួលបានថវិកាចំនួន ១២លានរៀល និងមេដាយប្រាក់ និងជ័យលាភីលេខ៣ បានទៅលើក្រុមភ្លេងកាយរឹទ្ធិខេត្តកណ្ដាល ទទួលបានថវិកា ៨លានរៀល និងមេដាយប្រាក់។ រីឯ ក្រុមមិនទទួលជ័យលាភី គឺក្រុមភ្លេងកាយរឹទ្ធិខេត្តរតនគិរី និងរាជធានីភ្នំពេញ ក៏ទទួលបានថវិកាលើកទឹកចិត្តចំនួន ២លាន៥សែនរៀល និង ប្រាក់ឧបត្ថម្ភបន្ថែមពីរដ្ឋមន្រ្តីក្រសួងអប់រំ ចំនួន៤លានរៀលផងដែរ។
ការប្រកួតក្រុមភ្លេងកាយរឹទ្ធិថ្នាក់ជាតិ រៀបចំដោយក្រសួងអប់រំ យុវជន និងកីឡា ក្នុងគោលបំណងអភិវឌ្ឍន៍សមត្ថភាពយុវជនកាយរឹទ្ធិ ឱ្យមានសក្ដានុពលពេញលេញ ផ្នែកផ្លូវកាយ ផ្លូវបញ្ញា ផ្លូវសង្គម ផ្លូវចិត្ត ផ្លូវអារម្មណ៍។ លើសពីនេះ ចូលរួមរក្សាក្រុមភ្លេងកាយរឹទ្ធិឱ្យមាននិរន្តរភាព ជាពិសេសលើកទឹកចិត្តដល់យុវជនកាយរឹទ្ធិឱ្យខិតខំប្រឹងប្រែងអភិវឌ្ឍន៍សមត្ថភាព។
គួរជំរាបជូនថា ការប្រកួតក្រុមភ្លេងកាយរឹទ្ធិថ្នាក់ជាតិ លើកទី២ ឆ្នាំ២០២៥ ប្រព្រឹត្តឡើងក្រោមប្រធានបទ «ភ្លេងកាយរឹទិ្ធ ដើម្បីមហាបវរវិបុលភាព» នៅពហុកីឡាដ្ឋានជាតិអូឡាំពិក។ ការប្រកួតក្នុងឆ្នាំ២០២៥នេះ មានក្រុមភ្លេងកាយរឹទ្ធិ ៨ក្រុម ចូលរួម រួមមាន៖ ក្រុមភ្លេងកាយរឹទ្ធិ ខេត្តសៀមរាប, ខេត្តបន្ទាយមានជ័យ, ខេត្តបាត់ដំបង, រាជធានីភ្នំពេញ, ខេត្តរតនគិរី, ខេត្តកោះកុង, ខេត្តកណ្តាល និងក្រុមភ្លេងកាយរឹទ្ធិ ខេត្តឧត្តរមានជ័យ៕
