ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ប្រភេទនៃបុគ្គលិកលក្ខណៈនីមួយៗតែងផ្តល់ផលល្អដូចគ្នា ហើយជំនាញនីមួយៗសុទ្ធតែមានការប្រែប្រួល និងអភិវឌ្ឍន៍បន្ថែមបាន។ បុគ្គលិកលក្ខណៈនិយាយច្រើន គឺជាអ្នកដែលត្រូវបានកត់សម្គាល់ជាមនុស្សមានទំនោរចូលចុះក្នុងសង្គមច្រើន ឬហៅថា extroverted, ក្នុងករណីខ្លះពួកគេមានអត្តចរិតបែបនេះពីធម្មជាតិរួចហើយ ប៉ុន្តែដោយសារតែឥទ្ធិពល ក៏ដូចជាកាតព្វកិច្ចដែលត្រូវជួបជាមួយច្រើន ទើបបណ្តាលឱ្យពួកគេកាន់តែមានទំនោរខ្លាំងទៅរកការផ្សារភ្ជាប់ទំនាក់ទំនងបន្ថែម។
ងាកមកនិយាយអំពីគុណសម្បត្តិរបស់មនុស្សមានបុគ្គលិកលក្ខណៈនិយាយច្រើនវិញ កាលដែលបង្កើនចំណុចនេះឱ្យកាន់តែមានភាពមុតស្រួច បានបង្កភាពងាយស្រួលនៅពេលដែលត្រូវការក្លាយជាអ្នកនិយាយសាធារណៈ អ្នកចង់បង្កើនជំនាញធ្វើកិច្ចសន្ទនា ឬការបង្កើនទំនុកចិត្តជាដើម។ ចំណុចតូចៗទាំងនេះរួមចំណែកអភិវឌ្ឍន៍ទាំងជីវិតឯកជន និងអាជីពវិជ្ជាជីវៈ ក៏ដូចជាការត្រៀមទុកចំពោះកិច្ចសហការនៅពេលខាងមុខ។ យ៉ាងណាក៏ដោយ ប្រសិនបើអ្នកដឹងថា ខ្លួនជាប្រភេទមនុស្ស extrovertd ហើយចង់អភិវឌ្ឍន៍ជំនាញបន្ថែម គេហទំព័រ Better Up បានបង្ហាញជូនអំពីគន្លឹះមួយចំនួន ក្នុងការពង្រឹងបុគ្គលិកលក្ខណៈរបស់ខ្លួន ៖
ចាប់ផ្តើមដំបូងជាមួយមនុស្សដែលស្គាល់គ្នាស្រាប់ ៖ ចំពោះអ្នកដែលចាំបាច់ត្រូវការអភិវឌ្ឍន៍ប្រើប្រាស់ជំនាញនិយាយ ក៏ដូចជាចង់បង្កើនការនិយាយឱ្យបានច្រើនជាងមុន ការចាប់ផ្តើមសាកល្បងជាមួយដែលអ្នកស្គាល់គ្នាស្រាប់ មិនថាមនុស្សក្បែរខ្លួន ឆ្ងាយខ្លួន ព្រោះវាជាឱកាសមួយក្នុងការជំរុញឱ្យមានទំនុកចិត្ត ក៏ដូចជាការចាប់ផ្តើមដោយមិនបង្ខំពេក ទោះនិយាយតិច ឬច្រើនក្ដី កាលដែលនិយាយជាមួយមនុស្សដែលស្គាល់គ្នាស្រាប់បាន ផ្តល់នូវអារម្មណ៍កក់ក្ដៅ និងកាត់បន្ថយសម្ពាធជាដើម។
ជជែកជាមួយក្រុមដែលមានចំណាប់អារម្មណ៍ប្រហាក់ប្រហែលគ្នា ៖ កាលដែលមានក្រុមមនុស្សបង្កើតសកម្មភាពដែលខ្លួនចង់ធ្វើជាមួយគ្នា វាមិនត្រឹមតែបង្កើនបាននូវកិច្ចសន្ទនាប៉ុណ្ណោះទេ ប៉ុន្តែក៏បង្កើតបាននូវភាពរីករាយ ក៏ដូចជាការអនុវត្តន៍បានជាប់លាប់ផងដែរ។ ការចូលរួមជជែកជាមួយប្រធានបទដែលខ្លួនចាប់អារម្មណ៍ ធ្វើឱ្យការសន្ទនាកាន់តែមានភាពប្រទាក់ក្រឡា និងភាពបត់បែននៃការនិយាយមានលក្ខណៈធម្មជាតិ និងមិនមានភាពភ័យខ្លាចនៅពេលចុះចូលក្នុងសង្គម។
មានពេលក្នុងការឆ្លុះបញ្ចាំង ៖ តុល្យភាពនៃការនិយាយក៏ត្រូវមានដែលកំណត់ និងត្រូវការពេលវេលាក្នុងការវិភាគ ក៏ដូចជាមានពេលផ្ទាល់ខ្លួនក្នុងការសម្រាកផងដែរ ហើយពេលវេលាបែបនេះក៏ត្រូវការឱ្យមានកាលវិភាគក្នុងការទុកចន្លោះនៅម្នាក់ឯងបន្ទាប់ពីត្រូវចូលរួមកម្មវិធីណាមួយ ឬក៏បន្ទាប់ពីការជជែកណាមួយ។ សម្រាកគឺដើម្បីសន្សំថាមពលត្រឡប់មកវិញ និងដើម្បីមានកម្លាំងគ្រប់គ្រាន់ក្នុងការបន្តកិច្ចសន្ទនាជាបន្តបន្ទាប់នាពេលខាងមុខ៕
