ភ្នំពេញ – ធ្លាប់តែជាសិស្សដែលខ្សោយផ្នែកភាសាអង់គ្លេស និងខ្វះភាពក្លាហានក្នុងការនិយាយជាសាធារណៈ លោក ង៉ែត ឆៃយ៉ា បានខិតខំប្រឹងជំនះភាពភ័យខ្លាចទាំងនេះ ដោយសារមានការជំរុញលើកទឹកចិត្ត និងការណែនាំពីគ្រូបង្រៀនរហូតក្លាយជាអ្នកនិយាយជាសាធារណៈដ៏ឆ្នើមម្នាក់។ បច្ចុប្បន្នលោក ង៉ែត ឆៃយ៉ា ជាប្រធានកម្មវិធីពង្រឹងសមត្ថភាពយុវជនសម្រាប់ការអប់រំនៃ PUC-ELI និងជាស្ថាបនិកគម្រោង។

លើកឡើងនៅក្នុងកម្មវិធីសិក្ខាសាលាស្ដីពី សិល្បៈនៃការនិយាយជាសាធារណៈរដូវកាលទី៣ រៀបចំឡើងដោយសាកលវិទ្យាល័យបញ្ញាសាស្ត្រកម្ពុជា កាលពីថ្ងៃទី០៨ ខែកក្កដា ឆ្នាំ២០២៣កន្លងទៅ លោក ង៉ែត ឆៃយ៉ា បានប្រាប់ឱ្យដឹងថា លោកធ្លាប់បរាជ័យក្នុងការប្រកួតនិយាយជាសាធារណៈ ប៉ុន្តែលោកមិនបោះបង់ក្ដីស្រមៃឡើយ គឺបន្តពង្រឹងសមត្ថភាពបន្ថែមដោយចូលរៀនក្នុងវគ្គពង្រឹងការនិយាយជាសាធារណៈនៅ PUC Toastmasters Club។

លោក ង៉ែត ឆៃយ៉ា បន្ថែមថា ដោយនៅ PUC Toastmasters Club មានការកម្មវិធីប្រកួតនិយាយជាសាធារណៈលក្ខណៈអន្តរជាតិដែលមានការចូលរួមពីនិស្សិតមកពីបណ្ដាប្រទេសផ្សេងៗដូចជា ប្រទេសថៃ វៀតណាម ហ្វីលីពីន និងប្រទេសជាច្រើនទៀត លោកក៏សាកល្បងចូលរួមប្រកួតម្ដងទៀតដោយគិតថាការប្រើប្រាស់ភាសាអង់គ្លេសរបស់ខ្លួនប្រសើរជាងមុន ។ រហូតដល់ចុងឆ្នាំ២០១៩ លោកក៏បានជាប់ជាតំណាងរបស់ PUC Toastmasters Club ទៅប្រកួតនៅប្រទេសថៃ។

លោក ង៉ែត ឆៃយ៉ា បញ្ជាក់បន្ថែមថា លទ្ធផលល្អនេះ បានធ្វើឱ្យលោកមានភាពសប្បាយរីករាយ ប៉ុន្តែដោយសារក្នុងឆ្នាំនោះ ចាប់ផ្ដើមមានការរីករាលដាលជំងកូវីដ-១៩ កម្មវិធីប្រកួតក៏ប្ដូរទៅធ្វើតាមប្រព័ន្ធអនឡាញវិញ។ យ៉ាងណាក៏ដោយ លោកថា កម្មវិធីប្រកួតនិយាយជាសាធារណៈ បានធ្វើឱ្យលោករកឃើញសក្តានុពលរបស់ខ្លួន ដោយ​មានមនុស្សស្គាល់ច្រើន ហើយក៏មានកម្មវិធីផ្សេងៗទាក់ទងលោកឱ្យចូលរួមចែករំលែកបទពិសោធន៍ ធ្វើជាគ្រូដឹកនាំ និងធ្វើជាគណៈកម្មការក្នុងកម្មវិធីប្រកួតនិយាយជាសាធារណៈផងដែរ។

លោក ង៉ែត ឆៃយ៉ា ប្រធានកម្មវិធីពង្រឹងសមត្ថភាពយុវជនសម្រាប់ការអប់រំ នៃ PUC-ELI

“អ្វីដែលខ្ញុំទទួលបានបច្ចុប្បន្ននេះ ខ្ញុំគិតថា១០ឆ្នាំទៀត ទើបខ្ញុំអាចទទួលបាន ប៉ុន្តែដោយសារជំនាញក្នុងការនិយាយជាសាធារណៈ បានជួយខ្ញុំទទួលបានឱកាសជាច្រើន”

ប្រធានកម្មវិធីពង្រឹងសមត្ថភាពយុវជនសម្រាប់ការអប់រំនៃ PUC-ELI រូបនេះ មានប្រសាសន៍ថា មិនថាតែសិស្ស និងនិស្សិត បុគ្គលិកក្រុមហ៊ុន និងអ្នកដឹកនាំ ចាំបាច់ត្រូវតែមានជំនាញនិយាយជាសាធារណៈ ព្រោះជំនាញនេះពិតជាសំខាន់សម្រាប់បម្រើឱ្យជីវភាពរស់នៅប្រចាំថ្ងៃ ក្នុងការចរចារ ធ្វើបទបង្ហាញ បង្កើតបណ្ដាញទំនាក់ទំនង និងការប្រាស្រ័យទាក់ទងគ្នាប្រកបដោយប្រសិទ្ធភាព។ លោកបន្ថែមថា ដោយសារតែជំនាញនិយាយជាសាធារណៈបានធ្វើឱ្យថ្នាក់ដឹកនាំនៃសាកលវិទ្យាល័យបញ្ញាសាស្រ្តកម្ពុជា ចាប់អារម្មណ៍ ព្រមទាំងផ្ដល់ឱកាសឱ្យលោកក្លាយជាអ្នករៀបចំកម្មវិធី ជាអ្នកបណ្ដុះបណ្ដាលការនិយាយជាសាធារណៈទាំងយុវជន ទាំងបុគ្គលិកក្រុមហ៊ុនរហូតដល់ថ្នាក់ដឹកនាំកំពូលផងដែរ៕