សាលារៀនឯកជនមួយនៅទីក្រុងឡុងដ៍កំពុងបើកថ្នាក់រៀនដំបូងគេក្នុងចក្រភពអង់គ្លេស ដែលបង្រៀនដោយបញ្ញាសិប្បនិម្មិត ជំនួសគ្រូជាមនុស្ស។ នេះបើតាមការចុះផ្សាយរបស់សារព័ត៌មាន Sky News នៃចក្រភពអង់គ្លេស។

សាលា David Game College បានបើកវគ្គសិក្សា ដោយប្រើប្រាស់បញ្ញាសិប្បនិម្មិត (AI) សម្រាប់សិស្ស GCSE ចំនួន ២០នាក់ ចាប់ពីខែកញ្ញា ឆ្នាំ២០២៤តទៅ, ដោយថ្នាក់រៀននេះ នឹងប្រើប្រាស់វេទិកាបញ្ញាសិប្បនិម្មិត (AI) នៅលើកុំព្យូទ័រ និងកាសពិភពពិតក្នុងរូបភាពនិម្មិត (VR) ក្នុងដំណើរការបង្រៀន។ សិស្ស នឹងត្រូវចំណាយប្រាក់ប្រហែល ២៧,០០០ ផោន ក្នុងមួយឆ្នាំ ដើម្បីចូលសិក្សាក្នុងវគ្គសិក្សានេះ។

វេទិកាបញ្ញាសិប្បនិម្មិត (AI) នឹងសិក្សាអំពីអ្វីដែលសិស្សពូកែ និងអ្វីដែលសិស្សត្រូវការពង្រឹងបន្ថែម បន្ទាប់មកបញ្ញាសិប្បនិម្មិត នឹងបង្កើតគម្រោងមេរៀនឱ្យសមស្របតាមសមត្ថភាពរបស់សិស្សម្នាក់ៗ។ មេរៀនសម្រាប់សិស្សម្នាក់ៗនឹងប្រែប្រួលទៅតាមសមត្ថភាពរបស់សិស្ស ដោយមេរៀនពិបាក នឹងត្រូវរៀនក្រោយគេ ចំណែកមេរៀនងាយស្រួល ត្រូវដាក់ឱ្យសិស្សរៀនមុនគេ។ ខណៈផែនការសិក្សាសម្រាប់សិស្សម្នាក់ៗ គឺត្រូវតាមសមត្ថភាពជាក់ស្ដែងរបស់សិស្សម្នាក់ៗ។

លោក John Dalton ដែលជាសហនាយកសាលា David Game College លើកឡើងថា បច្ចុប្បន្ន មានគ្រូបង្រៀនល្អៗជាច្រើន ប៉ុន្តែមនុស្សមិនអាចវាយតម្លៃពីសមត្ថភាពសិស្សម្នាក់ៗបានល្អឥតខ្ចោះនោះទេ។ លោកបន្តថា វាពិតជាលំបាកណាស់សម្រាប់គ្រូបង្រៀនដែលជាមនុស្ស ក្នុងការវាយតម្លៃសមត្ថភាពសិស្សបានដូចទៅនឹងអ្វីដែលបញ្ញាសិប្បនិម្មិត (AI) អាចធ្វើបាន។ លើសពីនេះ ប្រសិនបើ អ្នកចង់ដឹងច្បាស់ថា ហេតុអ្វីបានជាសិស្សមិនរៀន បញ្ញាសិប្បនិម្មិត (AI) អាចបង្ហាញពីហេតុផល មានប្រសិទ្ធភាព និងត្រឹមត្រូវជាង។

អតីតនាយកសាលាចូលនិវត្តន៍ និងជាអតីតទីប្រឹក្សាអង្គភាពគោលនយោបាយ រដ្ឋាភិបាលអង់គ្លេស លោក Chris McGovern បានលើកឡើងថា ទោះបីជាបញ្ញាសិប្បនិម្មិត (AI) អាចមានតួនាទីក្នុងការបង្រៀនក៏ដោយ ប៉ុន្តែវាត្រូវការពេលយូរទៀត ដើម្បីជំនួសគ្រូបង្រៀន។ អ្នកជំនាញរូបនេះ បន្តថា បញ្ហារបស់បញ្ញាសិប្បនិម្មិត និងអេក្រង់កុំព្យូទ័រ គឺ វានៅតែជាម៉ាស៊ីន ហើយវានៅតែអសកម្ម។ ដូច្នេះ ការដាក់ដំណើរការសិក្សាភ្លាមៗ នឹងធ្វើឱ្យបាត់បង់ជំនាញអន្តរកម្មបុគ្គល រវាងសិស្ស និងគ្រូបង្រៀន។

វាគឺជាអនាគតដែលគ្មានព្រលឹង និងមនោសញ្ជេតនា ប្រសិនបើមនុស្សធ្វើតាមអ្វីដែលបញ្ញាសិប្បនិម្មិត (AI) បង្ហាញតែមួយមុខ

គួរបញ្ជាក់ថា នៅក្នុងប្រទេសអង់គ្លេស បញ្ញាសិប្បនិម្មិត (AI) ត្រូវបានដាក់ឱ្យប្រើប្រាស់ទូទាំងប្រទេសរួចទៅហើយ ដោយបច្ចេកវិទ្យានេះ បានជួយសម្រួលក្នុងការស្រាវជ្រាវប្រធានបទផ្សេងៗសម្រាប់ការសិក្សា ព្រមទាំងជួយគ្រូបង្រៀនបង្កើតកិច្ចតែងការបង្រៀនជាដើម៕