ក្រសួងអប់រំ យុវជន និងកីឡា បន្តជំរុញឱ្យគ្រឹះស្ថានសាធាណៈត្រូវត្រួតពិនិត្យ ណែនាំ ហាមឃាត់ រាល់ការលក់ចំណីអាហារដែលធ្វើឱ្យប៉ះពាល់សុខភាពអ្នកសិក្សា។ នេះបើតាមសេចក្ដីណែនាំ ស្ដីពីដំណើរការគ្រឹះស្ថានមធ្យមសិក្សាចំណេះដឹងទូទៅសាធារណៈ ឆ្នាំសិក្សា ២០២៤-២០២៥ របស់ក្រសួងអប់រំ យុវជន និងកីឡា ដែលចេញផ្សាយកាលពីសប្តាហ៍​កន្លងទៅនេះ។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា កន្លងមក ដើម្បីអនុវត្តវិធានការសុវត្ថិភាពចំណីអាហារតាមសាលារៀន ក្រសួងអប់រំ បានធ្វើការផ្សព្វផ្សាយយ៉ាងទូលំទូលាយនៅតាមសាលារៀន ក៏ដូចជាជំរុញសាលារៀន ធ្វើការជិតស្និទ្ធជាមួយអ្នកលក់ចំណីអាហារក្នុងសាលារៀន ក៏ដូចជាពិនិត្យប្រភេទអាហារដែលដាក់លក់ផងដែរ។ ជាមួយគ្នានេះ ក្រសួងអប់រំ បានបញ្ចូលព័ត៌មាន និងការពន្យល់លម្អិតទាក់ទងទៅនឹងផលប៉ះពាល់របស់អាហារក្នុងមុខវិជ្ជាអប់រំសុខភាពសិក្សា។ និងទី៣. គណៈគ្រប់គ្រងសាលាតែងធ្វើការងារជិតស្និទ្ធជាមួយឪពុកម្ដាយសិស្ស ឬអាណាព្យាបាលសិស្សឱ្យមានការចូលរួម។

អ្នកនាំពាក្យក្រសួងអប់រំ បញ្ជាក់បន្ថែមថា បន្ទាប់ពីអនុវត្តវិធានការសុវត្ថិភាពចំណីអាហារតាមសាលរៀន ក្រសួងសង្កេតឃើញថា មានសាលាជាច្រើនបានជំរុញធ្វើយ៉ាងណាឱ្យអាណាព្យាបាលសិស្សានុសិស្សរៀបចំយកដបទឹក និងខ្ចប់អាហារមកពីផ្ទះ ដើម្បីជៀសវាងអាហារប៉ះពាល់សុខភាព ឬមិនមានប្រភពច្បាស់លាស់។ លើសពីនេះ ក៏មានសាលាជាច្រើនបានចូលរួមអនុវត្តជំរុញ និងលើកកម្ពស់សាលារៀនស្អាត ដើម្បីការពារបរិស្ថានកម្ពុជា និងចូលរួមដោះស្រាយបញ្ហាកំណើនកម្ដៅនៃភពផែនដី។

បើតាម លោកជំទាវ ឃួន វិច្ឆិកា ចំពោះចំណីអាហារដែលហាមមិនឱ្យលក់នៅតាមគ្រឹះស្ថានសិក្សាមានចំនួន ៦ប្រភេទ រួមមាន ទី១. ចំណីអាហារគ្រប់ប្រភេទដែលហួសកំណត់កាលបរិច្ឆេទប្រើប្រាស់, ទី២. គ្រឿងស្រវឹង និងផលិតផលថ្នាំជក់គ្រប់ប្រភេទ, ទី៣. ចំណីអាហារដែលមិនមានប្រភពច្បាស់លាស់, ទី៤. ភេសជ្ជៈប៉ូវកម្លាំង ភេសជ្ជៈផ្អែម កាហ្វេ ការ៉េម ទឹកស៊ីរ៉ូ គ្រប់ប្រភេទ, ទី៥. ស្ករសូកូឡា ស្ករគ្រាប់និងស្ករកៅស៊ូគ្រប់ប្រភេទ និងទី៦. ចាហួយគ្រប់ប្រភេទ នំដូណាត់ នំផ្អែម តំណាប់ផ្អែមគ្រប់ប្រភេទ។

គួរជម្រាបជូនថា តាមការពិនិត្យទិន្នន័យនៅក្នុងប្រព័ន្ធព័ត៌មានគ្រប់គ្រងអប់រំ នៅដើមឆ្នាំ២០២៤ គឺមានសាលារៀនសាធារណៈចំនួន ៨៧.៤% បានអនុវត្តខ្ជាប់ខ្ជួនក្នុងការអនុញ្ញាតឱ្យលក់ដូរចំណីអាហារដែលមានសុវត្ថិភាព និងចំណីអាហារប្រកបដោយសុខភាពជូនសិស្សានុសិស្ស៕