ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សាថ្មីមួយដែលចុះផ្សាយក្នុងទស្សនាវដ្ដី Pediatric Research រកឃើញថា ការចិញ្ចឹមសត្វដូចជាឆ្កែ ឆ្មា នៅក្នុងគ្រួសារផ្ដល់អត្ថប្រយោជន៍ដល់ការអភិវឌ្ឍខួរក្បាល អារម្មណ៍ និងអត្តចរិតកុមារតូច។ ការស្រាវជ្រាវបង្ហាញថា កុមារតូច ដែលជួយគ្រួសារថែទាំ និងចិញ្ចឹមសត្វឆ្កែ ឬឆ្មា ភាគច្រើនយល់ថា ពួកគេជាផ្នែកមួយសំខាន់ក្នុងគ្រួសារ។ ជាពិសេស សកម្មភាពនេះ ធ្វើឱ្យពួកគេមានអារម្មណ៍ថា មានថាមពល នៅពេលដែលពួកគេមានឱកាសទទួលខុសត្រូវ មើលថែ និងចិញ្ចឹមសត្វ។
ការស្រាវជ្រាវបានបង្ហាញពីអត្ថប្រយោជន៍សំខាន់ៗចំនួន ៦ ដែលកុមារទទួលបានពីការចិញ្ចឹមសត្វឆ្កែ ឬឆ្មា ៖
១. បង្កើនទំនួលខុសត្រូវ ៖ សត្វឆ្កែ ឬឆ្មា គឺជាសត្វមានតម្រូវការច្រើន មិនថាអ្នកជ្រើសរើសពូជអ្វីនោះទេ។ ពួកវាត្រូវការអ្នកលេង និងដើរជាមួយវា ការផ្ដល់ចំណី និងលាងសម្អាតខ្លួនវារាល់ថ្ងៃ។ អ្វីដែលពិសេស កិច្ចការទាំងនេះ សុទ្ធសឹងតែជា កិច្ចការសាមញ្ញ ដែលកុមារអាចធ្វើបាន ឬពួកគេអាចធ្វើកិច្ចការទាំងនេះជាមួយមនុស្សធំដែរ។
២. ការកំណត់អត្តសញ្ញាណ និងអារម្មណ៍ឯករាជ្យ ៖ នៅពេលកូនរបស់អ្នកធំឡើងជាមួយសត្វចិញ្ចឹម កូននោះច្បាស់ជាអាចភ្ជាប់ទំនាក់ទំនងអារម្មណ៍ជាមួយសត្វចិញ្ចឹមទាំងនោះបាន ព្រមទាំងមានភាពឈ្លាសវៃផ្នែកអារម្មណ៍ (EQ) ដែលជួយឱ្យពួកគេងាយស្រួលកំណត់សញ្ញាណអារម្មណ៍ និងមានឯករាជ្យភាពចំពោះខ្លួនឯង។
៣. សេចក្ដីស្រឡាញ់ និងភាពស្មោះត្រង់ដែលគ្មានលក្ខខណ្ឌ ៖ ជាធម្មតាមិនមានសត្វចិញ្ចឹមច្រើនទេ ដែលស្មោះត្រង់ដូចឆ្កែ ឬឆ្មា។ កូនរបស់អ្នកនឹងឃើញសកម្មភាពនេះជាញឹកញាប់នៅក្នុងអាប្បកិរិយាសត្វចិញ្ចឹមរបស់គេ ហើយជាលទ្ធផល កុមារក៏អាចមានអត្តចរិតរបៀបនេះផងដែរ។
៤. ពង្រឹងការគោរព និងឱ្យតម្លៃខ្លួនឯង ៖ ការសិក្សាបង្ហាញថា សត្វឆ្កែ ឬឆ្មា មិនមានភាពភ័យខ្លាច និងព្រួយបារម្ភអំពីការបដិសេធនោះទេ។ អត្តចរិតនេះ គឺសំខាន់សម្រាប់កុមារ ហើយពួកគេអាចរៀនសូត្រពីសត្វចិញ្ចឹមរបស់បាន ព្រោះវាអាចជួយឱ្យកុមារ មានភាពក្លាហាន និងឱ្យតម្លៃខ្លួនឯងខ្ពស់។
៥. មានការយល់ចិត្តខ្ពស់ ៖ សត្វចិញ្ចឹមជាពិសេស សត្វឆ្កែ អាចបង្ហាញទាំងអារម្មណ៍សប្បាយរីករាយ និងកើតទុក្ខ ទៅតាមកាលៈទេសៈ និងពេលវេលាដែលពួកវាជួបប្រទះ។ ការនៅក្បែរ និងចំណាយពេលវេលាជាមួយសត្វចិញ្ចឹម អាចជួយឱ្យកុមារយល់ច្បាស់ពីអារម្មណ៍ និងបញ្ញាផ្នែកអារម្មណ៍ខ្ពស់។
៦. មានសកម្មភាពរាងកាយច្រើន ៖ យោងតាមការសិក្សាបង្ហាញថា នៅពេលដែលកុមារមានសត្វចិញ្ចឹម ជាពិសេសឆ្កែ នឹងជំរុញឱ្យពួកគេមានសកម្មភាពរាងកាយច្រើនជាងមុន ព្រោះពួកគេត្រូវចំណាយពេលវេលា និងដើរលេងជាមួយឆ្កែ។ ដូច្នេះកុមារដែលរស់នៅក្នុងគ្រួសារចិញ្ចឹមឆ្កែ ទទួលបានអត្ថប្រយោជន៍ជាច្រើន ជាពិសេសការបង្កើនសកម្មភាពរាងកាយ ការអភិវឌ្ឍជំនាញសង្គម និងបញ្ញាផ្នែកអារម្មណ៍៕
