ក្រសួងអប់រំ យុវជន និងកីឡា គ្រោងពង្រីកវិសាលភាពអនុវត្តស្ដង់ដាសាលាគរុកោសល្យគំរូ​ទៅ​កាន់សាលា​គរុកោសល្យផ្សេងៗ​ទៀត ដើម្បីពង្រឹងគុណភាពបណ្ដុះបណ្ដាលគ្រូ។ នេះបើតាមការបញ្ជាក់របស់ លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា។

លោកជំទាវ ឃួន វិច្ឆិកា មានប្រសាសន៍ថា ទាក់ទងទៅនឹងការលើកកម្ពស់វិស័យអប់រំនៅកម្ពុជា ត្រូវបានបែងចែកជាផ្នែក២ធំៗ រួមមាន ទី១. ការអប់រំនៅកម្រិតមធ្យមសិក្សាចំណេះទូទៅ គឺរាប់តាំងពីកម្រិតមត្តេយ្យសិក្សារហូតដល់ សញ្ញាបត្រមធ្យមសិក្សាទុតិយភូមិ (ថ្នាក់ទី១២) ទី២. កម្រិតឧត្តមសិក្សា គឺក្រោយបញ្ចប់កម្រិតមធ្យមសិក្សាទុតិយភូមិរហូតដល់ថ្នាក់បណ្ឌិត ឬថ្នាក់ក្រោយបណ្ឌិត។

ក្នុងអាណត្តិទី៧នេះ បើតាម​ប្រសាសន៍​របស់លោកជំទាវ ឃួន វិច្ឆិកា ការ​លើក​កម្ពស់វិស័យអប់រំ គឺផ្ដោតសំខាន់ក្នុងកម្រិតសាលារៀន ដោយក្រសួងអប់រំបានដាក់ចេញស្តង់ដាសាលារៀនគំរូ ដែលបាននិងកំពុងអនុវត្តទាំងសាលារៀននៅតាមកម្រិតមត្តេយ្យសិក្សា និងមធ្យសិក្សាចំណេះទូទៅផងដែរដើម្បីធានាថា ការអប់រំនៅតាមសាលារៀនដំណើរការស្របតាមស្តង់ដាដែលបានកំណត់។

អ្នកនាំពាក្យ​ក្រសួងអប់រំ បញ្ជាក់បន្ថែមថា ពាក់ព័ន្ធជាមួយស្តង់ដាសាលារៀនគំរូនេះ ក្រសួងអប់រំ បានអនុវត្តនៅតាមសាលារៀនចំណេះទូទៅរួចហើយ ដោយគ្រោងពង្រីកវិសាលភាពសាលាគរុកោសល្យនានា ដើម្បីជំរុញធ្វើយ៉ាងណាឱ្យការបណ្ដុះបណ្ដាលគ្រូកាន់តែមានគុណភាពប្រសើរឡើង ឆ្លើយតបទៅនឹងតម្រូវការនាសតវត្សទី២១ និងស្របតាមស្តង់ដាសាលារៀនគំរូដែលកំពុងអនុវត្តនៅកម្រិតចំណេះទូទៅ។

តាមការបញ្ជាក់របស់ លោកជំទាវ ឃួន វិច្ឆិកា ចំណុចអាទិភាពដែលក្រសួងអប់រំ យុវជន និងកីឡា កំពុងអនុវត្តក្នុងនីតិកាលទី៧ ក្នុងការលើកកម្ពស់គុណភាពអប់រំនោះ មានគន្លឹះ ៨ចំណុចដែលត្រូវអនុវត្ត រួមមាន ១. ពង្រឹងអភិបាលកិច្ចសាលារៀន ២. ពិនិត្យកែសម្រួលរៀបចំកម្មវិធីសិក្សា កម្មវិធីក្រៅម៉ោងសិក្សាឱ្យស្របតាមចំណេះដឹង វិន័យ សីលធម៌របស់សិស្ស ៣. យកចិត្តទុកដាក់សុខភាពសិស្សតាមរយៈការផ្ដល់អាហារូបត្ថម្ភ ការពិនិត្យសុខភាពកុមារ និងការត្រួតពិនិត្យចំណីអាហារនៅតាមសាលារៀន ៤. ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ ក្នុងការគាំទ្រការរៀន និងបង្រៀន ស្របតាមពាក្យស្លោក “ភាពជាដៃគូរដ្ឋដើម្បីការអប់រំ” ៥. ការអប់រំឌីជីថល ៦. ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា ៧. ការកសាងប្រព័នន្ធនៃការអភិវឌ្ឍសមត្ថភាព និង៨. ការអភិវឌ្ឍការអប់រំកាយ និងកីឡា។

គួររំលឹកថា នៅក្នុងកិច្ចប្រជុំ ស្តីពីស្តង់ដាសាលាគរុកោសល្យគំរូ កាលពីថ្ងៃទី២៩ ខែឧសភា កន្លងទៅដែល​មានការ​ចូលរួមពី​ឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និង​កីឡា បានកំណត់ស្តង់ដាសាលាគរុកោសល្យគំរូដូចជា ៖ ផ្តល់ជាផែនទីបង្ហាញផ្លូវក្នុងការអភិវឌ្ឍសាលាគរុកោសល្យឱ្យមានលក្ខណៈទំនើប និងមានលទ្ធភាពគ្រប់គ្រាន់ក្នុងការបណ្តុះបណ្តាលគរុសិស្ស គរុនិស្សិតប្រកបដោយគុណភាពខ្ពស់ បង្កើនប្រសិទ្ធភាព និងគុណភាពនៃការបណ្តុះបណ្តាល និងវិក្រឹតការគ្រូបង្រៀនឱ្យឆ្លើយតបនឹងបរិវត្តកម្មការអប់រំ ដែលដាក់ចេញដោយក្រសួងអប់រំ យុវជន និងកីឡា ជាខ្នាតសម្រាប់វាស់វែងពីកម្រិតគុណភាព និងប្រសិទ្ធភាពនៃការបណ្តុះបណ្តាលគ្រូបង្រៀន និងធានាបាននូវនិរន្តរភាពនៃដំណើរការគ្រឹះស្ថាន។

សរុបជារួម ការអនុវត្ត​ស្តង់ដាសាលាគរុកោសល្យគំរូនេះ មានគោលបំណងពង្រឹងស្វ័យគ្រប់គ្រងសាលាគរុកោល្យ និងផ្តល់ការបណ្តុះបណ្តាលគ្រូបង្រៀនប្រកបដោយគុណភាព សមធម៌ បរិយាបន្ន ប្រសិទ្ធភាព និងចីរភាព ដោយផ្តល់ឱ្យគរុសិស្ស គរុនិស្សិតទទួលបាននូវបំណិនវិជ្ជាជីវៈជាគ្រូបង្រៀនពេញលេញ មុននិងក្រោយពេលចេញទៅបម្រើការងារជាគ្រូបង្រៀននៅតាមសាលារៀនគោលដៅ៕