ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងវេទិកាថ្នាក់ជាតិលើកទី១៣ ស្តីពីការអប់រំបរិយាបន្ន ក្រោមប្រធានបទ “ ការអភិវឌ្ឍសមត្ថភាពគ្រូបង្រៀន និងគ្រប់អ្នកពាក់ព័ន្ធ ដើម្បីជួយដល់កុមារមានពិការភាពគ្រប់ប្រភេទ ទទួលបានការអប់រំប្រកបដោយគុណភាព និងបរិយាបន្ន” ឯកឧត្តម ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា វេទិកាថ្នាក់ជាតិ ស្តីពីការអប់រំបរិយាបន្ន គឺឆ្លុះបញ្ចាំងពីការលើកកម្ពស់វិស័យអប់រំ ជាពិសេសការអប់រំបរិយាបន្ន ដើម្បីធានាថា “គ្មាននរណាម្នាក់ត្រូវបានទុកចោលឡើយ” ។
ដើម្បីសម្រេចបាននូវចក្ខុវិស័យនេះ ឯកឧត្តមបានផ្តល់នូវអនុសាសន៍សំខាន់ៗចំនួន ៣ ចំណុច ដែលនឹងចូលរួមចំណែកយ៉ាងសកម្មក្នុងការជួយដល់កុមារមានពិការភាពគ្រប់ប្រភេទ ទទួលបានការអប់រំប្រកបដោយគុណភាព និងបរិយាបន្ន ដែលរួមមាន ៖
ទី១. ពង្រឹងយន្តការបណ្តុះបណ្តាលគ្រូគរុកោសល្យ ៖ ត្រូវបង្កើត និងពង្រឹងកម្មវិធីបណ្តុះបណ្តាលបន្ត និងការបណ្តុះបណ្តាលមុនចូលបម្រើការងារដល់គ្រូទាំងអស់ ទាំងគ្រូអប់រំទូទៅ និងគ្រូអប់រំពិសេស ឱ្យមានចំណេះដឹង និងជំនាញគ្រប់គ្រាន់ក្នុងការកំណត់អត្តសញ្ញាណ និងការបង្រៀនកុមារមានពិការភាពគ្រប់ប្រភេទ។
ទី២. បង្កើនកិច្ចសហការពហុភាគី ៖ ជំរុញការចូលរួមពីមាតាបិតា អាជ្ញាធរដែនដី ក្រុមប្រឹក្សាសកម្មភាពជនពិការ និងអង្គការដៃគូ ដើម្បីបង្កើតប្រព័ន្ធគាំទ្ររួមគ្នានៅថ្នាក់មូលដ្ឋាន និងសាលារៀន។
ទី៣. ជំរុញការប្រើប្រាស់បច្ចេកវិទ្យា និងនវានុវត្តន៍ ៖ ស្រាវជ្រាវ និងអនុវត្តឧបករណ៍ បច្ចេកវិទ្យាជំនួយ និងវិធីសាស្ត្របង្រៀនថ្មីៗ ដើម្បីឱ្យការសិក្សាកាន់តែមានលក្ខណៈបរិយាបន្ន និងសមស្របតាមតម្រូវការរបស់កុមារម្នាក់ៗ។
ជាមួយគ្នានេះ ឯកឧត្តមរដ្ឋលេខាធិការ ក៏បានស្នើឱ្យមន្ត្រីអប់រំគ្រប់លំដាប់ថ្នាក់ទាំងអស់បន្តយកចិត្តទុក ដាក់ពង្រឹងសមត្ថភាពជាប្រចាំ ចេះចែករំលែក ផ្តល់ឱកាសរៀនសូត្រ និងផ្លាស់ប្ដូរបទពិសោធល្អៗពីគ្នាទៅវិញទៅមក ដើម្បីយកទៅអនុវត្តជាក់ស្ដែងក្នុងការបង្រៀនសិស្សមានពិការភាព និងដើម្បីសម្រេចនូវចក្ខុវិស័យរួមរបស់យើង គឺទាំងអស់គ្នាទទួលបានការអប់រំ និងការសិក្សាពេញមួយជីវិត៕
