ការសិក្សាពេញមួយជីវិតគឺជាដំណើរការនៃការស្វះស្វែងរកចំណេះដឹង ជំនាញ និងទស្សនៈថ្មីៗពេញមួយជីវិតរបស់អ្នក ទាំងតាមរយៈការអប់រំផ្លូវការ និងមិនផ្លូវការ ។ វាជួយឱ្យអ្នកអាចសម្របខ្លួនទៅនឹងការប្រែប្រួលនៃកាលៈទេសៈចំពោះមុខ ធ្វើឱ្យអនាគតការងារប្រសើរឡើង និងជំរុញឱ្យមានការអភិវឌ្ឍខ្លួនជាប្រចាំ។ ប៉ុន្តែតើគួរធ្វើដូចម្ដេច ដើម្បីធ្វើឱ្យការសិក្សាពេញមួយជីវិតក្លាយទៅជាទម្លាប់ប្រចាំថ្ងៃរបស់អ្នក ដោយមិនមានអារម្មណ៍ថាតានតឹង និងការប្ដេជ្ញាចិត្តខ្ពស់? នេះគឺជាវិធីសាស្ត្រងាយៗចំនួន ៦ ដែលអ្នកអាចបញ្ចូលការសិក្សាពេញមួយជីវិតទៅក្នុងទម្លាប់ប្រចាំថ្ងៃរបស់អ្នក។

១. អានជាប្រចាំ និងឱ្យបានទូលំទូលាយ ៖ វិធីសាស្ត្រដែលសាមញ្ញ ងាយស្រួល និងរីករាយបំផុតមួយ ដើម្បីរៀនសូត្រអ្វីថ្មីៗ គឺការអានជាប្រចាំ និងឱ្យបាន​ទូលំទូលាយ។ ការអានឱ្យបានទូលំទូលាយក្នុងន័យនេះ ចង់សំដៅថា អ្នកអាចអានសៀវភៅ អត្ថបទព័ត៌មាន អត្ថបទចំណេះដឹងទូទៅ ឬផតខាស ដែលជា​ប់ទាក់ទងនឹងប្រធានបទដែលអ្នកចាប់អារម្មណ៍ ឬក៏ចង់ពង្រឹងបន្ថែម។ ក្រៅពីនេះអ្នកក៏អាចអានអត្ថបទប្រលោមលោក កំណាព្យ ឬជីវប្រវត្តបុគ្គលឆ្នើម ដែលអាចជួយឱ្យអ្នកអាចស្វែងយល់បន្ថែមអំពីទស្សនៈ វប្បធម៌ និងបទពិសោធន៍ផ្សេងៗ។ ការអានបានទូលំទូលាយអាចពង្រឹងសមត្ថភាពប្រើប្រាស់ពាក្យ ការគិតបែបត្រិះរិះ និងជំរុញទម្លាប់ចង់ចេះចង់ដឹង។

២. រៀនពីអ្នកដទៃ ៖ វីធីសាស្ត្រមួយទៀតដែលអាចជួយអ្នកបន្តរៀនសូត្រពេញមួយជីវិត​ គឺសង្កេត និងរៀនសូត្រពីអ្នកដទៃ។ អ្នកអាចអនុវត្តវិធីសាស្ត្រនេះ តាមរយៈការសួរសំណួរ ការស្ដាប់ដោយយកចិត្តទុកដាក់នៅពេលអ្នកជំនាញណាម្នាក់និយាយ និងបើកចិត្តទទួលយកមតិកែលម្អពីមនុស្សជុំវិញខ្លួន។ ការរៀនសូត្រពីអ្នកដទៃ អាចជួយអ្នកឱ្យទទួលបានការយល់ដឹង ទស្សនៈ និងជំនាញថ្មីៗ លើសពីនេះអ្នកក៏អាចបង្កើតបណ្ដាញ និងពង្រឹងជំនាញទំនាក់ទំនងផងដែរ។

៣. ហ៊ានសាកល្បងធ្វើរឿងថ្មីៗ ៖ វីធីទីបី ដើម្បីបញ្ចូលទម្លាប់ការសិក្សាពេញមួយជីវិតទៅក្នុងការរស់នៅប្រចាំថ្ងៃ គឺការសាកល្បងធ្វើអ្វីដែលថ្មី។ អ្នកអាចអនុវត្តវិធីសាស្ត្រនេះ តាមរយៈការបង្កើតទម្លាប់ ឬចំណង់ចំណូលចិត្តថ្មី ចូលរៀនវគ្គអនឡាញថ្មីៗ ចូលរួមកម្មវិធីស្ម័គ្រ និងធ្វើដំណើរកម្សាន្តថ្មីៗ។ ការសាកល្បងធ្វើរឿងថ្មីៗ អាចជួយឱ្យអ្នកស្វែងរកឃើញចំណង់ចំណូលចិត្ត ទេពកោលស្យ និងភាពខ្លាំងរបស់ខ្លួនឯង ព្រមទាំងអាចចាកចេញពីតំបន់ស្រណុកសុខស្រួល (Comfort zone) របស់ខ្លួនឯងផងដែរ។

៤. ចំណាយពេលគិត និងឆ្លុះបញ្ចាំងពីអ្វីដែលបានរៀនសូត្រ ៖ ការសរសេរកំណត់ហេតុ អត្ថបទប្លក់នៅលើអ៊ីនធឺណិត ថតវីដេអូ ឬថតសំឡេង គឺជាវិធីសាស្ត្រដ៏មានប្រសិទ្ធភាព ដើម្បីឆ្លុះបញ្ចាំងពីអ្វីដែលបានរៀនសូត្រ។ ការអនុវត្តទម្លាប់នេះ អាចជួយឱ្យអ្នកវាយតម្លៃពីវឌ្ឍនភាពរបស់ខ្លួនឯង ចំណុចខ្វះខាត និងដឹងច្បាស់ពីសមត្ថភាពខ្លួនឯង។ ក្រៅពីចំណេះវិជ្ជមានដែលបានរៀបរាប់ទម្លាប់នេះ ក៏ជួយអ្នកពង្រឹងការចងចាំ បង្កើនភាពច្នៃប្រឌិត និងបង្ហាញគំនិត និងអារម្មណ៍បានល្អ។

៥. ព្យាយាមអនុវត្តនូវអ្វីដែលបានរៀនសូត្រ ៖ ដើម្បីចងចាំបានល្អនូវអ្វីដែលអ្នកបានរៀនសូត្រ និងទាញប្រយោជន៍ និងផលវិជ្ជមានពីចំណេះដឹងទាំងនោះប្រកបដោយប្រសិទ្ធភាព គឺអ្នកត្រូវតែអនុវត្តជាចាំបាច់។ ការអនុវត្តនូវអ្វីដែលបានរៀន គឺជាការធ្វើតេស្តចំណេះដឹង ជំនាញ និងអាកប្បកិរិយារបស់អ្នក ព្រមទាំងបង្កើតឱ្យមាននូវសមិទ្ធផលជាក់ស្ដែង ក្រោយពេលដែលបានរៀនសូត្រ។ ទម្លាប់នេះអាចបង្កើតផលវិជ្ជមានបានច្រើនសម្រាប់ជីវិតអ្នក។

៦. បើកចិត្តទទួលយកការរិះគន់ ក្នុងន័យស្ថាបនា៖ ការអនុវត្តទម្លាប់នេះ ជួយឱ្យអ្នកអាចកំណត់ពីចំណុចខ្លាំង និងចំណុចខ្សោយរបស់ខ្លួនឯងបានច្បាស់ជាងមុន។ ក្រៅពីនេះ វាជួយឱ្យអ្នករៀនសូត្រពីកំហុស អភិវឌ្ឍខ្លួនបានលឿន៕