ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការកើនឡើងយ៉ាងច្រើន នៃអ្នកដាក់ពាក្យប្រឡង នៅពេលមានការជ្រើសរើសមន្រ្តីរាជការម្តងៗ ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា លើកឡើងថា វាបានបញ្ជាក់ពីការជឿទុកចិត្តទៅលើប្រព័ន្ធរបស់រាជរដ្ឋាភិបាល ប្រកបដោយសុក្រឹត្យភាព។
ក្នុងពិធីបិទវគ្គឆ្នាំ២០២៣ និងបើកវគ្គបណ្តុះបណ្តាលឆ្នាំ២០២៤ របស់សាលាភូមិន្ទរដ្ឋបាល នាព្រឹកថ្ងៃទី១០ មិថុនា សម្តេចធិបតី ហ៊ុន ម៉ាណែត មានប្រសាសន៍ថា នៅអាណត្តិទី៧នេះ រាជរដ្ឋាភិបាលបានរៀបចំការប្រឡងជ្រើសរើសមន្រ្តីសរុបចំនួន៦វគ្គរួមមកហើយ និងកំពុងត្រៀមប្រឡង១វគ្គទៀត ដែលជាវគ្គទី៧ នៅពេលខាងមុខឆាប់ៗនេះ។ សម្តេចធិបតីបន្តថា ការប្រឡងវគ្គទី១ គឺប្រឡងជ្រើសរើសមន្រ្តីកសិកម្ម នៅឆ្នាំ២០២៣ ដោយរើសមន្រ្តីចំនួនត្រឹមតែ ២៥០នាក់ ប៉ុន្តែអ្នកដាក់ពាក្យមានរហូតដល់ ១២៧០០នាក់ ហើយចម្រាញ់នៅត្រឹម ៣៣០០នាក់។ ចំណែកការប្រឡងវគ្គទី៦ ដែលជាការប្រឡងជ្រើសរើសគ្រូបង្រៀនអនុវិទ្យាល័យ គឺមានអ្នកដាក់ពាក្យប្រឡងរហូតដល់ទៅ ៥១ ៨៤៩នាក់ ហើយអ្នកដែលមានសិទ្ធិប្រឡងគឺមានចំនួនជាង ៣៣ ០០០នាក់ ខណៈតម្រូវការ គឺមានត្រឹមតែ ៤៤១នាក់ប៉ុណ្ណោះ។ ហើយសម្រាប់ការប្រឡងវគ្គទី៧នាពេលខាងមុខ គឺការប្រឡងជ្រើសរើសគ្រូបឋមសិក្សា គឺមានអ្នកដាក់ពាក្យរហូតដល់ ៦៧០០០នាក់ និងត្រូវបានចម្រាញ់នៅត្រឹម ៣៨០០០នាក់ ខណៈក្រសួងជ្រើសរើសត្រឹមតែ ១៣៤៧នាក់។
តាមរយៈទិន្នន័យ នៃអ្នកដាក់ពាក្យប្រឡងនេះ សម្តេចនាយករដ្ឋមន្រ្តីបានធ្វើការកត់សម្គាល់ថា មនុស្សកាន់តែច្រើនឡើងបានដាក់ពាក្យប្រឡង ដែលបញ្ជាក់ពីការជឿទុកចិត្តទៅលើប្រព័ន្ធប្រឡងជ្រើសរើសមន្រ្តី ដែលផ្អែកទៅលើ គុណាធិបតេយ្យ យុត្តិធម៌ សុក្រឹត្យភាព បរិយាបន ពោលគឺ អ្នកចេះ គឺជាប់ដោយមោទនៈភាព ហើយអ្នកដែលមិនជាប់ គឺមិនជាប់ដោយអស់ចិត្ត។
យ៉ាងណាក៏ដោយ សម្តេចធិបតីក៏មិនភ្លេចរំលេចទេថា សម្រាប់កិច្ចការមួយនេះ គឺមិនមែនកើតឡើងដោយភាពចៃដន្យនោះទេ ពោលគឺវាអាចកើតឡើងដោយឆន្ទៈ ការប្តេជ្ញាចិត្តខ្ពស់របស់ថ្នាក់ដឹកនាំ និងមន្រ្តីអនុវត្តន៍ នៃគណៈកម្មការប្រឡង និងក្រសួងស្ថាប័នពាក់ព័ន្ធទាំងអស់ នៅក្នុងការអនុវត្តកិច្ចការដោយហ្មត់ចត់របស់គណៈកម្មការតាក់តែង និងគ្រប់គ្រងវិញ្ញាសា។ ក្នុងនោះសម្តេចធិបតីក៏បានអំពាវនាវដល់គណៈកម្មការ និងបងប្អូនទាំងអស់ សូមចូលរួមដើម្បីជំរុញការបង្កើនសុក្រឹត្យភាព និងធានាសុក្រឹត្យភាព ដើម្បីធានានូវភាពជឿជាក់ ធានាបាននូវសមត្ថភាពរបស់មន្រ្តី។
សម័យឥឡូវមិនមែនសម័យដែលប្រឡងមិនជាប់មន្រ្តីដាច់ពោះនោះទេ យើងមានជម្រើសផ្សេងច្រើននៅក្នុងការងារ ។ អញ្ចឹងត្រូវធ្វើយ៉ាងម៉េចរួមគ្នាឱ្យប្រព័ន្ធមួយនេះជោគជ័យ។ ហើយជាពិសេសសុំការចូលរួមពីបេក្ខជន និងក្រុមគ្រួសារតែម្តង…
សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា
ជាមួយគ្នានេះ សម្តេចធិបតី ក៏បានធ្វើការព្រមានផងដែរ ដោយថា មន្រ្តីដែលចូលបម្រើរដ្ឋ គឺត្រូវវិនិយោគកម្លាំងចិត្ត កម្លាំងកាយ ខិតខំប្រឹងប្រែងរៀនសូត្រ ដោយមិនត្រូវវិនិយោគរកខ្សែ រកថវិកាដើម្បីសូកប៉ាន់នោះទេ ។ សរុបជារួម សម្តេចនាយករដ្ឋមន្រ្តីបញ្ជាក់ថា ការខិតខំប្រឹងប្រែងធានាដើម្បីសុក្រឹត្យភាព និងភាពត្រឹមត្រូវនៅពេលប្រឡង ជាកិច្ចការធំសម្រាប់ការផ្តល់ការលើកទឹកចិត្តដល់កូនខ្មែរ ដែលចង់ក្លាយទៅជាមន្រ្តីបម្រើរាស្រ្ត៕
