ការនិយាយទៅកាន់ខ្លួនឯង ជាភាសាមួយដែលមនុស្សភាគច្រើនបានឮដើម្បីដាស់តឿនស្មារតី ការស្វែងយល់ពីសក្ដានុពល បង្កើនភាពជឿជាក់ ផ្តោតលើគោលដៅ និងកាត់បន្ថយនូវសម្ពាធផ្លូវចិត្តផងដែរ។

កញ្ញា យឹម សាលីនដា បច្ចុប្បន្នជាអ្នកផលិតមាតិកា បានលើកឡើងក្នុងឱកាស​ធ្វើជាវាគ្មិននៅក្នុងកម្មវិធី RYL Talks 12 ថា ការនិយាយទៅកាន់ខ្លួនឯង ជាចំណុចមួយដែលនាង តែងតែប្រាប់ខ្លួនឯង ប៉ុន្តែអ្វីដែលអ្នកគ្រប់គ្នាបានឮតាមរយៈនាងបកស្រាយនេះ ទោះបីជាស្តាប់មួយរយដង ក៏មិនស្មើនឹងអ្នកទាំងអស់គ្នា ប្រាប់ខ្លួនឯងត្រឹមតែមួយដងនោះទេ។

សាលីនដា បន្តថា គ្រប់គ្នាតែងតែមានក្ដីស្រមៃ មិនថាធំ ឬក៏តូចទេ គឺមានទៅតាមការគិតរៀងៗខ្លួន ក្ដីស្រមៃខ្លះក៏បានសម្រេចតាមគោលដំណង​ ក្ដីស្រមៃខ្លះទៀតដើរៗក៏ជ្រុះបាត់តាមផ្លូវក៏មាន ដោយឡែកមានក្ដីស្រមៃមួយ​ចំនួន យុវជនមិនទាន់ហ៊ានសាកល្បងសូម្បីមួយជំហាន។ តើមានមូលហេតុអ្វីខ្លះ ឬកត្តាអ្វីដែលបណ្តាយឱ្យបញ្ហាបែបនេះកើតមាន? ការសាកល្បង ជឿជាក់លើសមត្ថភាពខ្លួនឯង ហើយកុំបារម្ភនឹងដៃគូរប្រកួតប្រជែងមិនថា ខ្លាំង ឬខ្សោយ អ្វីដែលគួរផ្តោតគឺខ្លួនឯង ក្នុងការដុសខាត់សមត្ថភាព ហ៊ានសាកល្បងដើម្បីបញ្ចៀសពីការបាត់បង់ឱកាស ម្តងហើយ ម្តងទៀត។

ក្នុងដំណាក់កាល ស្វែងរកការងារធ្វើ មិនថាខ្ញុំ ឬក៏អ្នកទាំងអស់គ្នាទេ ចង់បានការងារមួយដែលល្អ ប្រាក់ខែខ្ពស់ មានមុខដំណែងតួនាទីខ្ពស់។ ប៉ុន្តែ ប្រសិនបើយើងអត់ជឿជាក់លើខ្លួនឯង តើនៅពេលដែលសម្ភាសន៍ការងារ យើងអាចនិយាយអ្វីខ្លះពីខ្លួនឯងបាន ដើម្បីឱ្យគេជ្រើសយក យើងទៅធ្វើការជាមួយគេ។ ជួនកាលសមត្ថភាពរបស់យើងខ្លាំងជាងបេក្ខជនដទៃទៀត ប៉ុន្តែយើងបាត់បង់ការងារមួយហ្នឹង ដោយសារតែមិនជឿជាក់លើមត្ថភាពខ្លួនឯង។ ខ្ញុំជឿថាម្នាក់ៗ មានមូលហេតុរៀងៗខ្លួន អាចជាស្ថានភាពគ្រួសារ ការរស់នៅ ប៉ុន្តែមូលហេតុចម្បងគឺ ការសង្ស័យលើសមត្ថភាពរបស់ខ្លួនឯង។

កញ្ញា យឹម សាលីនដាបច្ចុប្បន្នជាអ្នកផលិតមាតិកាពេញម៉ោង

តាមរយៈបទពិសោធន៍ធ្វើជាអ្នកផលិតមាតិកាដំបូង សាលីនដា ប្រាប់ពីអារម្មណ៍របស់នាងថា គឺប្រៀបដូចជាគេយកនាងទៅបោះចោលកណ្តាលសមុទ្រ មើលមិនឃើញកោះត្រើយ អត់មានទិសដៅ រួមទាំងមិនមានការណែនាំថា គួរមានវិធីសាស្រ្តបែបណា ឬផ្លូវមួយណាទើបឆាប់ដល់ត្រើយនោះទេ។ ប៉ុន្តែ លីនដា នៅតែជ្រើសរើសចាប់យកក្ដីស្រមៃមួយនេះ ដោយការផ្តល់ទំនុកចិត្តលើខ្លួនឯង។ “ប្រសិនបើខ្ញុំ មិនជឿជាក់លើខ្លួនឯង តើមាននរណាគេមកជឿជាក់លើខ្ញុំ?”។

សាលីនដា បន្ថែមទៀតថា ការងាររបស់កញ្ញាផ្ទាល់ ហាក់មិនខុសនឹងការងារផ្សេងទេ គឺទទួលរងការវាយតម្លៃ ការរិះគន់ និងការមិនពេញចិត្តពីទស្សនិកជន ហើយអ្វីដែលជំរុញឱ្យនាងកាន់តែឈឺចាប់ គឺការងារដែលបានធ្វើចេញពីក្ដីស្រឡាញ់ និងបេះដូង ប៉ុន្តែបែរជាមិនទទួលបានការផ្តល់តម្លៃ និងការពេញចិត្តទៅវិញ។ តែយ៉ាងណា អ្វីដែល សាលីនដា តែងតែប្រាប់ខ្លួនឯងគឺ ការយល់ពីគុណតម្លៃរបស់ខ្លួនឯង ជឿជាក់ខ្លួនឯង អាចប្រឈមមុខ នឹងបញ្ហាផ្សេងៗបាន ហើយនៅតែបន្តចាប់ក្ដីស្រមៃមួយនេះ ព្រោះវាបានផ្តល់អត្ថន័យចំពោះដំណើរជីវិត ហើយមិនអាចបោះបង់បាន។ ការចាប់ផ្តើមជឿជាក់លើខ្លួនឯង មិនត្រឹមតែជាសារ ដែលចង់ផ្តល់ទៅកាន់អ្នកដទៃប៉ុណ្ណោះទេ ប៉ុន្តែជាអ្វី ដែលនាងតែងរឮកខ្លួនឯងជារឿយៗដូចគ្នា។

សាលីនដា បង្ហើបឱ្យដឹងថា មានថ្ងៃខ្លះ នាងក៏មានពេលមិនជឿជាក់លើខ្លួនឯងដែរ សង្ស័យលើសមត្ថភាពរបស់ខ្លួនឯង បន្ទោសខ្លួនឯងច្រើនជាងនរណាទាំងអស់ដែលនៅជុំវិញខ្លួន។ ជាចុងក្រោយ លីនដា សង្កត់ធ្ងន់ថា ទោះបីមានមនុស្សជុំវិញខ្លួនជឿជាក់លើខ្លួនក៏ដោយ ប្រសិនបើយើង មិនជឿជាក់លើខ្លួនឯង ប្រហែលជាយើងឱ្យឱកាសល្អៗដែលចូលមកជីវិតយើង បាត់បង់ទៅ! តើ​​​ចង់ឱ្យឱកាសបាត់បង់ដល់ពេលណាទៀត? ចម្លើយមួយនេះ មានតែខ្លួនឯងប៉ុណ្ណោះ ដែលអាចបកស្រាយបាន៕