ក្នុងវេទិកាកម្រិតខ្ពស់សហគមន៍សង្គម-វប្បធម៌អាស៊ានឆ្នាំ២០២៦ នៅទីក្រុងម៉ានីល ប្រទេសហ្វីលីពីន កាលពីថ្ងៃទី៤ ខែមីនា ឯកឧត្តម អ៊ុង បូរាត រដ្ឋលេខាធិការក្រសួងអប់រំ យុវជន និងកីឡា និងជា​តំណាងរដ្ឋមន្រ្តីក្រសួងអប់រំ បានបង្ហាញពីចំណុចអាទិភាព៤ចំណុច ដែលប្រទេស​កម្ពុជា​កំពុងអនុវត្ត​ដើម្បីអភិវឌ្ឍធនធានមនុស្សសម្រាប់អនាគត។

ឯកឧត្តម អ៊ុង បូរាត បានបង្ហាញថា កម្ពុជាមានអាទិភាព៤ចំណុច ក្នុង​ការអភិវឌ្ឍធនធានមនុស្សសម្រាប់អនាគត នោះ ដែលរួមមាន (១) ការពង្រឹងមូលដ្ឋានគ្រឹះនិងសមត្ថភាពផ្នែកឌីជីថល ដោយផ្តោតលើវិធីសាស្ត្របង្រៀនដែលជួយឱ្យសិស្សបង្កើតថ្មី ការផ្តល់ជំនាញយ៉ាងពិតប្រាកដពីគ្រូបង្រៀនទៅកាន់សិស្សគ្រប់រូប ការអនុវត្តកិច្ចការគម្រោង ការគិតបែបស៊ីជម្រៅ និងការដោះស្រាយបញ្ហាជាក់ស្តែង (២)ការបណ្តុះសិស្សានុសិស្សសម្រាប់អនាគតការងារ ដោយផ្តោតលើគន្លងវិជ្ជាជីវៈ សហគ្រិនភាព បច្ចេកវិទ្យាឌីជីថល និងជំនាញស្របតាមទីផ្សារការងារ។

(៣) ការអភិវឌ្ឍប្រព័ន្ធជំនាញ ដោយផ្តោតលើឧស្សាហកម្ម និងផលិតភាពការងារតាមរយៈការបង្កើនជំនាញ ការបណ្តុះបណ្តាលការងារ និងការពង្រឹងជំនាញឡើងវិញ និង (៤) បំណិនផ្នែកឌីជីថល ដោយផ្តោតលើអក្ខរកម្មឌីជីថល ការវាយតម្លៃព័ត៌មាន ការយល់ដឹងអំពីប្រព័ន្ធសុវត្ថិភាពអ៊ីនធឺណិត ការទំនាក់ទំនងប្រកបដោយប្រសិទ្ធភាព ការងារក្រុម ការគិតបែបស៊ីជម្រៅនិងការដោះស្រាយបញ្ហា ភាពធន់ទៅនឹងការប្រែប្រួល តម្លៃនៃវប្បធម៌ចម្រុះ និងការគ្រប់គ្រងខ្លួនឯងនិងពេលវេលា។

សូមជំរាបជូនថា វេទិកាកម្រិតខ្ពស់សហគមន៍សង្គម-វប្បធម៌អាស៊ានឆ្នាំ២០២៦ (ASCC High-Level Forum 2026) មានការចូលរួមពីរដ្ឋមន្ត្រី នៃក្រុមប្រឹក្សាសហគមន៍សង្គម-វប្បធម៌អាស៊ាន អគ្គលេខាធិការរងអាស៊ានទទួលបន្ទុកសហគមន៍សង្គម-វប្បធម៌អាស៊ាន ឧត្តមមន្ត្រី សហគមន៍សង្គម-វប្បធម៌អាស៊ាន គណៈប្រតិភូនៃរដ្ឋសមាជិកអាស៊ាន មន្ត្រីលេខាធិការ ដ្ឋានអាស៊ាន និងបណ្តាប្រទេសដែលជាដៃគូអភិវឌ្ឍ និងដៃគូសន្ទនាអាស៊ានក្នុង​គោលបំណងចំនួន៤ រួមមាន៖ ១.ឆ្លុះបញ្ចាំង និងគិតឡើងវិញចំពោះសមិទ្ធផលនវានុវត្តន៍ និងមេរៀនល្អៗរបស់សហគមន៍សង្គម-វប្បធម៌អាស៊ាន ដែលទទួលបានពីចក្ខុវិស័យឆ្នាំ២០២៥ និងកំណត់ចំណុចគន្លឹះដើម្បីជំរុញការអនុវត្តផែនការយុទ្ធសាស្ត្រ, ២.ផ្តល់អំណាច និងផ្គត់ផ្គង់ដល់ការជំរុញយុទ្ធសាស្ត្រនានា ដែលផ្ដល់អំណាចដល់ប្រជាជនអាស៊ាន ក្នុងការសម្របខ្លួនដឹកនាំ និងមានភាពធន់ចាប់ពីការការពារសង្គម និងការអប់រំ រហូតដល់នវានុវត្តន៍ និងការចូលរួមរបស់ប្រជាពលរដ្ឋ, ៣.ផ្សារភ្ជាប់ និងសហការលើការពង្រឹងការតភ្ជាប់ឆ្លងសសរស្តម្ភ និងឆ្លងវិស័យ ដើម្បីជំរុញកំណើនប្រកបដោយបរិយាបន្ន សន្តិសុខមនុស្ស ការអភិវឌ្ឍ និងស្ថិរភាពសង្គម និង ៤.បំផុសគំនិត និងបង្កើតថ្មីបង្ហាញពីនវានុវត្តន៍ដែលផ្តោតលើប្រជាជន ឧត្តមានុវត្តន៍ដែលជាចក្ខុវិស័យរួមរបស់អាស៊ាន ការផ្តល់សិទ្ធិអំណាចដល់ប្រជាជន និងភាពធន់ជាសមូហភាព៕