ក្នុងសម័យកាលដែលមានភាពប្រែប្រួលខ្លាំងក្លានេះ មិនថា នៅសាលា ឬនៅក្នុងសង្គម សុខភាពផ្លូវចិត្តក្លាយជារឿងដែលសំខាន់បំផុត សម្រាប់យុវជនគ្រប់រូប។ យោងតាមទិន្នន័យពី National Library of Medicine បានបង្ហាញថា កាលពីអំឡុងវិបត្តិសកលបានធ្វើឱ្យមនុស្សចាប់ផ្ដើមផ្ដោតខ្លាំងលើការថែទាំខ្លួនឯង រួមទាំងសុខភាពផ្លូវចិត្ត ដែលជាកត្តាពង្រឹងសុខុមាលភាពរស់នៅ។

តើត្រូវចាប់ផ្ដើមពីចំណុចណា? ចម្លើយគឺ ការបណ្តុះ “ចិត្តសន្តោសប្រណី”!

អ្វីទៅជា “ចិត្តសន្តោសប្រណី” ?

ការសន្តោសប្រណីមានន័យថា ការយល់ដឹងពាក់ព័ន្ធអំពីការប្រាស្រ័យទាក់ទង ការរាប់អានមនុស្សជុំវិញខ្លួន ការបណ្តុះទឹកចិត្តឱ្យចេះអាណិតអាសូរមនុស្សជុំវិញខ្លួន រីករាយនឹងភាពជោគជ័យរបស់អ្នកដទៃ និងការរៀនសូត្រពីគ្នាទៅវិញទៅមក រួមទាំងបណ្តុះទម្លាប់ផ្តល់ក្ដីស្រឡាញ់ដោយមានភាពយុត្តិធម៌ជាដើម។ ហើយការរក្សាចិត្តសន្តោសប្រណី មិនត្រឹមតែបង្កើតបរិយាកាសសុវត្ថិភាពទៅកានមនុស្សជុំវិញខ្លួននោះទេ ប៉ុន្តែជាការកសាងសុខភាពផ្លូវចិត្តចំពោះខ្លួនឯង និងការកសាងភាពធន់ក្នុងការរស់នៅទៀតផង។

៤ ចំណុចសំខាន់ៗ ក្នុងការអនុវត្តនូវទម្លាប់នៃចិត្តសន្តោសប្រណី មានឥទ្ធិពលផ្ទាល់ទៅលើភាពរឹងមាំនៃផ្លូវចិត្តរបស់អ្នក ៖

ការជៀសវាងទម្លាប់ដែលនាំឱ្យប៉ះទង្គិចផ្លូវចិត្ត ៖ ការយកចិត្តទុកដាក់លើចំណេះដឹងមូលដ្ឋានអំពីការថែទាំសុខភាពផ្លូវចិត្ត តាមរយៈការកត់សម្គាល់ និងការអនុវត្តសកម្មភាព ឬឥរិយាបថទាំងឡាយណាដែលរក្សាចិត្តសន្តោសប្រណី វាបានជួយពង្រឹងសុខភាពផ្លូវចិត្តយុវវ័យ និងជាការជៀសពីការប៉ះទង្គិចផ្លូវចិត្ត ឬក៏ការកាត់បន្ថយឱ្យនៅតិចតួច។

ការរំងាប់អារម្មណ៍ ៖ ការធ្វើឱ្យអារម្មណ៍នឹងធឹង កាត់បន្ថយស្រេ្តស បន្ធូរកំហឹង និងការស្ងប់ចិត្ត ត្រូវការឱ្យអនុវត្តន៍សកម្មភាពទាំងឡាយណាដែលពាក់ព័ន្ធនឹងការអប់រំចិត្តច្រើន និងការធ្វើសមាធិជាចាំបាច់! ខណៈការរំងាប់អារម្មណ៍ក៏អាចកើតមានបានតាមរយៈយុវជនដែលមានការហ្វឹកហាត់បណ្តុះទឹកចិត្តសន្តោសប្រណី ឬចេះអាណិតអាសូរមនុស្សជុំវិញខ្លួន បានជួយឱ្យពួកគេមានប្រព័ន្ធគាំទ្រខ្លាំង។ កត្តាទាំងនេះហើយបានរួមចំណែកទៅកាន់ការបន្ថយអារម្មណ៍មិនល្អ ជាពិសេសពេលមានកំហឹងកើតមាន។

បន្ថយអាការថប់បារម្ភ ៖ ស្ថានភាពស្ងប់ស្ងាត់ បានដើរតួនាទីជួយស្មារតីស្ថិតក្នុងបច្ចុប្បន្នភាព កាត់បន្ថយពីការបារម្ភជ្រុលចំពោះរឿងដែលមិនទាន់កើតមាន និងមានឥទ្ធិពលក្នុងការជួយឱ្យសិស្សមានសមត្ថភាពក្នុងការប្រឈមជាមួយនឹងសម្ពាធពីសាលាដោយភាពវិជ្ជមាន ដូចជាការជ្រើសយកការប្រាស្រ័យទាក់ទងក្នុងសង្គមមនុស្សដែលនាំទៅរកនូវភាពរីកចម្រើនដល់ការអភិវឌ្ឍន៍សមត្ថភាពក្នុងនាមជាសិស្ស។

ពង្រឹងភាពធន់ ៖ ការដែលមានទម្លាប់ផ្តល់ការអាណិតអាសូរចំពោះខ្លួនឯង និងអ្នកដទៃ តាមរយៈការផ្តល់ពាក្យសរសើរដឹងគុណ និងមានទម្លាប់ហាត់ពត់ផ្លូវចិត្តឱ្យមានភាពរឹងមាំពីមួយពេលទៅមួួយពេល គឺជាជំហានមួយដែលជួយពង្រឹងភាពធន់ទៅកាន់សុខភាពផ្លូវចិត្ត ឬការប្រើប្រាស់អារម្មណ៍ដោយភាពឈ្លាសវៃ និងការសម្រេចចិត្តដែលបណ្តុះឱ្យបុគ្គលិកលក្ខណៈល្អ៕