រីករាយនឹងជីវិតខ្លួនឯងមានការវិវឌ្ឍន៍ទៅតាមដំណាក់កាលនីមួយៗ រួមទាំងមានវិធីសាស្រ្តចម្រុះក្នុងការពង្រឹង និងអនុវត្តន៍ជាប្រចាំ ដើម្បីបំពេញអត្ថន័យជីវិត។ ភាពរីករាយមិនគួរត្រូវបានដាក់ដែនកំណត់នោះទេ តែយ៉ាងណាហាក់ដូចជាមិនមានមនុស្សច្រើនទេដែលដាក់សំណួរចោទមកកាន់ខ្លួនឯងថា តើភាពរីករាយរបស់ខ្លួនមានភាពសមល្មមដែរទេ ឬក៏គ្រាន់តែធម្មតាៗក៏ខ្លួនមានអារម្មណ៍គ្រប់គ្រាន់ហើយ ? បើក្នុងករណីមិនទាន់ពេញចិត្ត ហើយចង់បំពេញ ឬបង្កើនភាពរីករាយជាមួយនឹងជីវិតខ្លួនឯង ក្នុងអត្ថបទនេះ យើងមានគន្លឹះមួយចំនួនដើម្បីឆ្លើយតបនឹងសំណួរទាំងនេះ។

មុននឹងចូលទៅចំណុចសំខាន់ៗ សូមបកទៅសំណួរមួយដែរថា តើដំណាក់កាលណាខ្លះដែលអាចធ្វើឱ្យជីវិតរបស់មនុស្សសប្បាយរីករាយ និងមានភាពប្រសើរជាងមុន ? តាមការបកស្រាយបែបអ្នកចិត្តសាស្រ្តបានឱ្យដឹងថា ជាដំបូងមនុស្សត្រូវបំពេញតម្រូវការមូលដ្ឋានគ្រឹះសំខាន់ៗសម្រាប់ខ្លួនឯងជាមុនសិន ដូចជា មានអាហារបរិភោគគ្រប់គ្រាន់ ឬចំណីល្អទ្រទ្រង់សុខភាព មានសម្លៀកបំពាក់ មានទីស្នាក់អាស្រ័យ មានឱសថថ្នាំសង្កូវ និងរបស់ទ្រព្យចាំបាច់នានាដែលមនុស្សត្រូវការប្រើប្រាស់ប្រចាំថ្ងៃដោយមិនអាចខ្វះបាន។ ប្រសិនបើក្នុងករណីមិនទាន់មានគ្រប់គ្រាន់ សូម្បីតម្រូវការមូលដ្ឋានសំខាន់ៗ ដែលបានរៀបរាប់ខាងលើ នោះគេមិនអាចមានពេលមកគិតអំពីសុភមង្គល ឬពិបាកក្នុងការបង្កើនភាពរីករាយជាមួយនឹងជីវិតខ្លួនឯង។

លុះត្រាណាតែតម្រូវការនៃមូលដ្ឋានគ្រឹះរបស់មនុស្សត្រូវបានបំពេញជាមុនសិន ទើបពួកគេអាចគិតគូរអំពីការស្វែងរកសុភមង្គល ឬការបំពេញន័យជីវិតបន្ថែមដូចជា ទំនាក់ទំនងក្នុងសង្គម ទំនាក់ទំនងដៃគូ ការបន្សល់ស្នាដៃ បង្កើនសមិទ្ធផល ការទួលស្គាល់ពីសង្គម ការស្វែងរកសក្តានុពល ចាប់ផ្តើមធ្វើការងារស្របនឹងចំណង់ចំណូលចិត្ត និងការតភ្ជាប់ខ្លួនទៅក្នុងមជ្ឈដ្ឋានដែលកំពុងរស់នៅ។ ទោះបីជាការដេញតាមតម្រូវការទាំងនេះមើលទៅសុទ្ធសឹងតែជារបស់ក្រៅខ្លួនហើយផ្តល់សុភមង្គមក្នុងរយៈពេលខ្លីពិតមែន ប៉ុន្តែវាក៏ជាចំណែកដែលពាក់ព័ន្ធនឹងក្ដីសុខក្នុងរយៈពេលវែងដូចគ្នាដែរ ហើយដើម្បីពង្រឹងបន្ថែមក្នុងការរក្សាភាពរីករាយជាមួយនឹងជីវិតខ្លួនឯងឱ្យមានតុល្យភាព ឬក្នុងពេលវែងសូមអនុវត្តន៍៥ចំណុចខាងក្រោម។

១. ផ្តោតលើសមិទ្ធផលខ្លួនឯង និងមិនប្រៀបធៀបជាមួយអ្នកផ្សេង ៖ វិនិយាគពេលវេលាលើការបង្កើនសមិទ្ធផលផ្ទាល់ខ្លួន គិតអំពីអ្វីដែល​ធ្វើឱ្យខ្លួនឯងមានសត្ថភាពប្រសើរជាងកាលពីអតីតកាល ប្រៀបធៀបខ្លួនឯងរវាងពេលពីមុន និងពេលពេលបច្ចុប្បន្ន សូមជៀសវាងការប្រៀបជាមួយអ្នកដទៃ ព្រោះដំណើររស់នៅ និងលទ្ធភាពដែលមានស្រាប់របស់មនុស្សម្នាក់ៗមិនមានភាពស្មើរគ្នាឡើយ។ ដូច្នេះការប្រៀបខ្លួនឯងជាមួយអ្នកដទៃពុំមានអ្វីចំណេញក្រៅពីបង្កក្ដីមន្ទិល ឬបាក់ទឹកចិត្តនោះទេ។ សូមផ្តោតទៅលើការធ្វើឱ្យខ្លួនឯងកាន់តែប្រសើរជាងមុន។

២. ញញឹមឱ្យច្រើន ៖ តាមរយៈការសិក្សារបស់ Association for Psychological Science បានបង្ហាញថា ការញញឹមឬឈរអង្គុយឱ្យត្រង់ខ្លួន ជះផលវិជ្ជមានទៅកាន់សុខភាពផ្លូវចិត្ត។ ហើយការញញឹមទៀតសោត ក៏​ជួយកាត់បន្ថយអាការស្រ្តេស បន្ថយភាពសោកសៅ និងបង្កើនអារម្មណ៍រីករាយ។

៣. រុករកបទពិសោធន៍ល្អៗជំនួសឱ្យរកតែថវិកា ៖ គុណសម្បត្ដិដែលមានតម្លៃបន្ថែមនោះ គឺបទពិសោធន៍ល្អៗ ពីព្រោះចំណុចនេះគឺជាចំណែកក្នុងការបង្កើនសុភមង្គល។ ចំពោះបទពិសោធន៍ទៀតសោតមិនមែនមានតែនៅកន្លែងការងារមួយមុខនោះទេ គេអាចទាញបានតាមរយៈ ដំណើរកម្សាន្ត រៀនជំនាញថ្មីៗ ទស្សនាសារមន្ទីរ និងសកម្មភាពនានានៅខាងក្រៅផ្ទះ។

៤​. កាត់បន្ថយពេលលើបណ្តាញសង្គម ៖ ការកាត់បន្ថយពេលវេលានៅលើបណ្តាញសង្គម មិនត្រឹមតែកាត់ចោលនូវភាពខ្ជះខ្ជាយនៃពេលវេលាប្រចាំថ្ងៃ និងបង្កើនសុខដុមរមនាក្នុងជីវិតពិតប៉ុណ្ណោះទេ ប៉ុន្តែវាបានរួមចំណែកយ៉ាងសំខាន់ក្នុងការបង្កើនភាពរីករាយ។

៥. រម្លឹករឿងល្អៗ ៖ ការរំលឹក ​និងចងចាំរឿងល្អៗ ឬពេលវេលាដ៏រីករាយ ជាចំណែកក្នុងការពង្រឹងកម្លាំងចិត្តឱ្យមានភាពវិជ្ជមានពីខាងក្នុង។  សុភមង្គលឬភាពរីករាយមិនអាចមានគ្រប់ពេលនោះទេ ប៉ុន្តែវាជាចំណែកមិនអាចខ្វះបាន ហើយគ្រប់គ្នាសមនឹងទទួលបាន៕