និស្សិតបច្ចុប្បន្នត្រូវការប្រើបណ្តាញអ៊ឺនធឺណិតជាចាំបាច់ តាមរយៈឧបករណ៍បច្ចេកវិទ្យាដូចជាកុំព្យូទ័រ ឬទូរស័ព្ទ ដើម្បីប្រើកម្មវិធីធ្វើបទបង្ហាញ, ការចូលទៅអាន និងជ្រើសទិន្នន័យដើម្បីយកមកអះអាងគំនិតផ្ទាល់ខ្លួនជាដើម ដែលចំណុចទាំងនេះ ហើយសុទ្ធសឹងតែពាក់ព័ន្ធនឹងបណ្តាញអ៊ឺនធឺណិត ដូច្នេះប្រសិនបើសិស្សមិនមានជំនាញខ្លះៗ ក្នុងការរក្សាសន្តិសុខលើបណ្តាញអ៊ឺនធឺណិតរបស់ពួកគេនោះទេ វាអាចបង្កនូវការគម្រាមគំហែង ការបាត់បង់ទិន្នន័យផ្ទាល់ខ្លួន និងប្រើប្រាស់អ៊ឺនធឺណិតដែលគ្មានសុវត្ថិភាព។

តើផលប៉ះពាល់ទាំងអស់នេះ អាចជំរុញឱ្យផលិតភាពនៃការសិក្សាអាចធ្លាក់ចុះដែរឬទេ? តិចឬច្រើន វានឹងជះផលអវិជ្ជមានក្នុងរយៈពេលខ្លីនិងវែង! តាមរយៈ Cisco បានឱ្យដឹងថា រាល់អ្នកប្រើប្រាស់បណ្តាញអ៊ឺនធឺណិត និងកម្មវិធីឌីជីថលទាំងអស់ ចាំបាច់ត្រូវតែឈ្វេងយល់ និងដឹងពីរបៀបនៃការការពារទិន្នន័យជាមូលដ្ឋាន និងសុវត្ថិភាពឯកជនភាពរបស់ខ្លួន។

សារៈសំខាន់សម្រាប់និស្សិតជាទូទៅ ៖ ត្បិតកិច្ចការរបស់សិស្សនិស្សិតទូទៅ ឬនិស្សិតក្នុងកម្រិតមូលដ្ឋានគ្រឹះ មិនមានភាពសំខាន់ខ្លាំងក្នុងទាក់ទាញអ្នកវាយប្រហារតាមរយៈអ៊ឺនធឺណិត បើធៀបទៅនឹងទិន្នន័យក្រុមហ៊ុននានា ឬក៏ប្រធានបទរសើបៗក្នុងសង្គម! ប៉ុន្តែកាលដែលនិស្សិតមានចំណេះដឹងក្នុងការការពារខ្លួនពីការវាយប្រហារពីមជ្ឈដ្ឋានណាមួយ គឺអាចកាត់បន្ថយហានិភ័យនៃការវាយប្រហារតាមអ៊ីនធឺណិត និងការបណ្តុះទម្លាប់នៃការប្រើប្រាស់អ៊ឺនធឺណិតឱ្យកាន់តែមានប្រសិទ្ធភាព ក៏ដូចជាការត្រៀមខ្លួនរក្សាព័ត៌មានផ្ទាល់ខ្លួន និងមនុស្សជុំវិញខ្លួនឱ្យបានសុវត្ថិភាព នៅក្នុងបរិបទនៃការប្រែប្រួលឥតឈប់ឈររបស់បច្ចេកវិទ្យាថ្មីៗ។

និស្សិត និងបណ្តាញអ៊ឺនធឺណិត ៖ ជាទូទៅការយកចិត្តទុកដាក់លើការប្រើប្រាស់អ៊ឺនធឺណិតឱ្យមានសុវត្ថិភាព​ ពេញនិយមនិងមានតម្រូវការខ្ពស់ចំពោះអ្នកធ្វើការលើទិន្នន័យ អ្នកសរសេរប្រធានបទរសើបក្នុងសង្គម អ្នកផលិតមាតិការតាមបណ្តាញសង្គម ឬអ្នកដែលធ្វើការផ្ទាល់លើបណ្តាញសង្គមជាប្រចាំ ប៉ុន្តែកុំភ្លេចថា និស្សិតក៏ជាតួអង្គមួយដែលរងឥទ្ធិពលពីបណ្តាញអ៊ឺនធឺណិត និងមានភាពចាំបាច់ក្នុងការប្រើប្រាស់មាតិកា ក៏ដូចជាការតាមដានព្រឹត្តិការណ៍ជាតិ និងអន្តរជាតិជាប្រចាំ ហើយមិនអាចកាត់ផ្តាច់ទាំងស្រុងពីបណ្តាញអ៊ឺនធឺណិតនោះទេ។

ជៀសវាងពីការគម្រាមគំហែង ៖ សិស្សនិស្សិត ជាអនាគតនៃអ្នកធ្វើការដែលមានវិជ្ជាជីវៈ និងជាតួអង្គដ៏សំខាន់ក្នុងការពង្រឹងភាពលូតលាស់នៅតាមសហគមន៍ ជាងនេះទៅទៀតសិស្សនិស្សិតមួយចំនួន កំពុងតែធ្វើការបណ្តើរនិងរៀនបណ្តើរ! ការ​ពង្រឹង​សន្តិសុខ​តាម​អ៊ីនធឺណិត មិនត្រឹមតែផ្តល់មូលដ្ឋានគ្រឹះលើការប្រើប្រាស់អ៊ឺនធឺណិតទៅកាន់សិស្សនិស្សិតប៉ុណ្ណោះទេ ប៉ុន្តែវាជួយឱ្យសិស្សអាចការពារ ការវាយប្រហារនៅពេលចូលទៅអាននិងស្រាវជ្រាវឯកសារយោង នៅពេលធ្វើកិច្ចការសាលា ជាងនេះទៅទៀត វាក៏ជាផ្នែកមួយ ក្នុងការបង្កើនទំនុកចិត្តប្រើប្រាស់បណ្តាញសង្គមដោយទំនុកចិត្ត កាត់បន្ថយកង្វល់ពាក់ព័ន្ធនឹងការបាត់បង់ទិន្នន័យផ្ទាល់ខ្លួន និងការបន្ថយការគម្រាមគំហែងជាដើម។ ដូច្នេះការសិក្សាស្វែងយល់បន្ថែមអំពីសន្តិសុខលើបណ្តាញអ៊ឺនធឺណិត ត្រូវការឱ្យស្វ័យសិក្សាជាប្រចាំ ឬគួរតែជាមេរៀនមួយដាក់ឱ្យសិក្សានៅឆ្នាំមូលដ្ឋានគ្រឹះដើម្បីពង្រឹងគុណភាពសិក្សាឱ្យកាន់តែមានប្រសិទ្ធភាព៕