អាការ​អស់កម្លាំង​ចិត្ត​កម្លាំងកាយ (Burnout​) ដែលគេដឹងជាទូទៅភាគច្រើនកើតឡើងចំពោះ មនុស្សការធ្វើការហួសកម្លាំង ឬហួសសមត្ថភាព ឬការមិនដោះស្រាយភាពតានតឹងក្នុងរយៈពេលយូរ រួមទាំងសម្ពាធពីការទាមទារនូវភាពល្អឥខ្ចោះជាដើម។ ហើយសញ្ញដែលអាចកត់សម្គាល់ ចំពោះអ្នកដែលមានអាការនេះ មានដូចជា មានអារម្មណ៍ឆាប់ខឹងច្រើន ឆាប់មួរម៉ៅ រួមទាំងលែងរីករាយនូវសកម្មភាព ឬទំនាក់ទំនងដែលធ្លាប់រីករាយពីមុនៗ។ តើធ្វើយ៉ាងណាដើម្បីបង្ការ និងគ្រប់គ្រងអាការអស់កម្លាំងចិត្តកម្លាំងកាយបាន?

ខាងក្រោមនេះ គឺជា​វិធីសាស្រ្ត៤ចំណុច ក្នុងការត្រៀមខ្លួន ឬក៏បន្ធូរបន្ថយអាការ Burnout​ ៖

ផ្តល់អាទិភាពទៅលើការសម្រាក ឬដើរកម្សាន្ត ៖ ការដោះស្រាយនឹងអាការអស់កម្លាំងចិត្តកម្លាំងកាយ (Burnout) ដំបូងៗ គឺការផ្តល់ពេលវេលាឱ្យខ្លួនបានសម្រាក ដកខ្លួនពីបន្ទុកមួយចំនួន មិនថាការងារផ្ទាល់ខ្លួន ឬអាជីពវិជ្ជាជីវៈ​ រួមទាំងពីក្នុងគ្រួសារផងដែរ ការផ្តល់អាទិភាពទៅលើការសម្រាក ឬការកម្សាន្តដោយប្តេជ្ញាយ៉ាងណាដាក់ជាកាលវិភាគក្នុងរយៈពេលណាមួយ ឱ្យដូចជាការកំណត់ពេលប្រជុំសំខាន់ៗ។

វាស់វែងពីសមត្ថភាព និងទំនួលខុសត្រូវការងារឡើងវិញ ៖ ការងារ ឬបន្ទុកនៅត្រង់នេះ គឺសំដៅជារួម មិនថា កិច្ចការនៅក្នុងផ្ទះ ឬនៅកន្លែងការងារនោះទេ ត្រូវការផ្ទៀងផ្ទាត់ឡើងវិញដើម្បីរកឱ្យឃើញថា ប្រភេទសកម្មភាពអ្វីដែលពុំចាំបាច់ ឬក៏អ្វីដែលអាចរួមចំណែកក្នុងការសម្រាលបន្ទុករបស់ខ្លួនឯង។ ធ្វើយ៉ាងណាឱ្យមានពេលសម្រាក វិស្សមកាល និងការគេងបានគ្រប់គ្រាន់។

ចែករំលែកកិច្ចការដោយមិនស្ទាក់ស្ទើរ ៖ ស្ថិតក្នុងដំណាក់កាលនេះ គួរគិតត្រឡប់មកវិញថា ការងារជាផ្នែកសំខាន់ ប៉ុន្តែគ្រាន់តែជាមួយផ្នែកនៃជីវិត ប្រើប្រាស់ដើម្បីទ្រទ្រង់ស្ថេរភាពការរស់នៅ សេចក្តីរីករាយ និងសុភមង្គល ប្រសិនបើធ្វើការហើយ តែការរស់នៅប្រចាំថ្ងៃបែរជាមិនទទួលបានសូម្បីសន្តិភាពផ្លូវចិត្ត គួរតែសុំជំនួយដើម្បីសម្រាលបន្ទុក ជាពិសេសក្នុងស្ថានភាពមិនប្រក្រតី នៃស្ថានភាពផ្លូវចិត្ត។

ដោះស្រាយជាមួយអ្នកជំនាញ ៖ ត្បិតមានវិធីជាច្រើន ដែលបានចែករំលែក និងផ្សព្វផ្សាយ ប៉ុន្តែការប្រឹក្សានៅកន្លែងដែលមានអ្នកចិត្តសាស្រ្ត ដើម្បីជួយវាស់វែងដាក់ពិន្ទុ កំណត់ពីកម្រិត នៃស្ថានភាពផ្លូវចិត្តនីមួយៗ គឺជាការបង្កើនប្រសិទ្ធភាពនៃការដោះស្រាយអាការអស់កម្លាំងចិត្តកម្លាំងកាយ៕