ថែទាំសុខភាពខួរក្បាលប្រៀបដូចជាយកចិត្តទុកដាក់ចំពោះសុខភាពផ្លូវចិត្ត ឬសុខុមាលភាពទូទៅដោយការប្រព្រឹត្តសកម្មភាពល្អៗប្រចាំថ្ងៃ ។ តាមរយៈគេហទំព័រ Yourtango បានចែករំលែកគន្លឹះប្រាំបួនចំណុចដើម្បីផ្ទៀងផ្ទាត់ឱ្យឃើញថា តើលោកអ្នកបានយកចិត្តទុកដាក់ចំពោះការថែទាំសុខភាពខួរក្បាលកម្រិតណា។

១. សុភមង្គល ៖ យកចិត្តទុកដាក់ចំពោះសុភមង្គលផ្ទាល់ខ្លួន។ ជាធម្មតា មនុស្សតែងរំពឹងសុភមង្គលក្នុងការរស់នៅប្រចាំថ្ងៃ ស្របពេលកត្តាទាំងនេះក៏ជាចំណែកនាំចិត្តគំនិត ឬខួរក្បាលឱ្យមានផាសុកភាព និងភាពរីករាយជារៀងរាល់ថ្ងៃ។ ប៉ុន្តែការឈ្មុសឈ្មុលរុករកសុភមង្គលគឺមានភាពមន្ទិលយ៉ាងអានេក ហើយការឱ្យនិយមន័យនៃសុភមង្គលទៀតសោធក៏មានភាពខុសប្លែកគ្នាទៅតាមបុគ្គលម្នាក់ៗ ឬទៅតាមការកំណត់របស់ក្រុមមនុស្សណាមួយ ។ អ្វីដែលគួរឱ្យកត់សម្គាល់បន្ថែមនោះនៅត្រង់ថា សុភមង្គមមិនមែនចង់បានភ្លាមក៏កើតឡើងភ្លាមៗនោះទេ គឺតម្រូវឱ្យមានការហាត់ពត់លត់ដំស្មារតី និងការស្គាល់ពីអ្វីដែលខ្លួនប៉ងប្រាថ្នា រួមទាំងការចេះស្កប់ស្កល់ចំពោះអ្វីដែលកំពុងមាននៅពេលបច្ចុប្បន្ននេះ។

២. ភាពបត់បែន ៖ ភាពបត់បែនត្រង់ចំណុចនេះ មិនមែនសំដៅលើការបត់បែនផ្នែករាងកាយតែមួយចំណុចនោះទេ ប៉ុន្តែចង់សំដៅទៅដល់ការចេះសម្របខ្លួនទៅនឹងបរិបទថ្មីៗ ជាពិសេសនោះគឺការរៀនរស់នៅក្នុងស្ថានភាពជាក់ស្តែង ឬកាលៈទេសៈបច្ចុប្បន្ន មិនថាកំពុងតែស្ថិតក្នុងស្ថានការលំបាកបែបណានោះទេ ការចេះទទួលស្គាល់ការអំពីបច្ចុប្បន្នភាព គឺជាចំណែកជួយឱ្យមនុស្សអាចកាត់បន្ថយអាការៈស្រ្តេស បន្ថយអាការៈថប់បារម្ភ និងជៀសអំពីជំងឺធ្លាក់ទឹកចិត្ត រួមទាំងជំរុញស្មារតីឱ្យមានការផ្តោត។

៣. ចេះប្រើប្រាស់អារម្មណ៍ ៖ ធម្មជាតិរបស់មនុស្ស ឬអារម្មណ៍របស់មនុស្សគឺមានការប្រែប្រួលឡើងចុះឥតឈប់ឈរ ជួនកាលក៏សប្បាយចិត្តខ្លាំង ជួនកាលក៏កើតទុក្ខខ្លាំង រំជើបរំជួលខ្លាំង ឬខឹងខ្លាំងជាដើម។ ដូច្នេះការយកចិត្តទុកដាក់អំពីការឆ្លើយតបប្រកបដោយវិជ្ជមាននៅពេលមានកំហឹង ឬការប្រើប្រាស់អារម្មណ៍ឱ្យត្រូវនឹងស្ថានការណ៍ គឺជាចំណែកសំខាន់ដែលអាចនាំផលវិជ្ជមានក្នុងការរស់នៅ។

៤. ទំនាក់ទំនងល្អ ៖ ទំនាក់ទំនងល្អក្នុងចំណុចនេះ គឺគិតទាំងទំនាក់ទំនងជាមួយមនុស្សស្និទ្ធស្នាលណាម្នាក់ ឬក៏ជាមួយមនុស្សទូទៅ​ ដែលមានលក្ខណៈប្រកបដោយក្ដីមេត្តា ករុណា ឧបេក្ខា និងមុទិតា ក៏ដូចជាការយល់ចិត្តគ្នាទៅវិញទៅមកនៅក្នុងទំនាក់ទំនងនីមួយៗ។​

៥. បង្កើនប្រាជ្ញា និងបទពិសោធល្អៗ ៖ ដំណើរជីវិតគឺពឹងផ្អែកទៅលើការសម្រេចចិត្ត ហើយសមត្ថភាពនៃការសម្រេចចិត្តក្នុងដំណាក់កាលនីមួយៗក៏អាស្រ័យទៅលើសកម្មភាព ឬការពង្រឹងប្រាជ្ញាក្នុងការរស់នៅប្រចាំថ្ងៃយ៉ាងដូច្នោះដែរ។ ​ការសម្រេចចិត្តដែលល្អតិច ឬល្អច្រើន ក៏អាស្រ័យលើបទពិសោធន៍ ចំណេះដឹងវិភាគថ្លឹងថ្លែង ដែលចំណុចទាំងនេះសុទ្ធសឹងតែពាក់ព័ន្ធនឹងការប្រើប្រាស់សមត្ថភាពខួរក្បាលរួមបញ្ចូលជាមួយគ្នាដែរ។ ដែលនេះបង្ហាញថាសុខុមាលភាពល្អ នាំទៅរកការសម្រេចចិតត្តបានល្អ។

៦. ស្វែងយល់មនុស្សជុំវិញខ្លួន ៖ កាលដែលមានសុខភាពផ្លូវចិត្តល្អ មនុស្សក៏មានថាមពលគ្រប់គ្រាន់ក្នុងការចែកចាយអារម្មណ៍ល្អ និងរឿងប្រពៃ ទៅកាន់អ្នកដទៃបានដូចគ្នាដែរ ក្នុងហេតុផលមួយនេះអាចបញ្ជាក់បានថា ការចេះយល់ចិត្តអ្នកដទៃ យល់ពីអារម្មណ៍អ្នកដទៃ មានសេចក្ដីអនុគ្រោះតាមរយៈការបណ្តុះទឹកចិត្តល្អៗ ការបារម្ភ និងព្រមជួយអ្នកដទៃទៅតាមលទ្ធភាពដែលមាន គឺជាមូលដ្ឋានគ្រឹះក្នុងការពង្រឹងសុខុមាលភាពរស់នៅ។

៧. មានសីលធម៌ស្គាល់ខុសស្គាល់ត្រូវ ៖ តើអ្នកនៅតែអាចរក្សាស្មារតីឱ្យធ្វើរឿងត្រឹមត្រូវបានដែរឬទេ បើទោះបីជានៅម្នាក់ឯងក៏ដោយ ការរំពឹងទុកពីសង្គមគឺទាមទារឱ្យបុគ្គលម្នាក់ៗប្រព្រឹត្តសកម្មភាពមិនឃ្លាតចាកពីសីលធម៌ និងមានសមត្ថភាពមិនត្រឹមតែផ្តល់ប្រយោជន៍ចំពោះបុគ្គលខ្លួនឯងប៉ុណ្ណោះទេ ប៉ុន្តែទន្ទឹមគ្នានោះក៏ត្រូវផ្តល់ផលប្រយោជន៍ទៅកាន់អ្នកដទៃតាមដែលអាចធ្វើបាន​។ កាលដែលប្រតិបត្តិទៅតាមការចង់បានរបស់សង្គមប្រកបដោយហេតុផល ក៏ជាចំណែកមួយក្នុងចំណុចជាច្រើនដែលនាំឱ្យសុខភាពខួរក្បាលមានភាពប្រសើរឡើង។

៨. ស្គាល់នូវអត្ថន័យជីវិត ៖ ការរកឱ្យឃើញនិយមន័យជីវិតផ្ទាល់ខ្លួន ជាវិថីនាំទៅរកសុខដុមរមនា ឬការបង្កើនសុខុមាលភាពក្នុងដំណើររស់នៅប្រចាំថ្ងៃ ដោយហេតុថាបទពិសោធន៍ និងការរស់នៅរបស់មនុស្សម្នាក់ៗ មានភាពខុសប្លែកគ្នា​។ ដូច្នេះនិយមន័យជីវិត ឬរបៀបទទួលបានសុភមង្គលក៏មានភាពខុសគ្នាទៅតាមស្ថានភាពនៃមនុស្សម្នាក់ៗ។

៩. មានការពិចារណាជារឿយៗ ៖ ការពិចារណាអំពីការរស់នៅជាប្រចាំ ក៏ដូចជាការឆ្លុះបញ្ចាំងជារឿយៗអំពីការរស់នៅប្រចាំថ្ងៃ ជាកត្តាមួយដែលអាចកាត់បន្ថយភាពស្មុគស្មាញនៃសុខភាពផ្លូវចិត្ត។ ពីព្រោះសុខភាពផ្លូវចិត្តតភ្ជាប់នឹងរបៀបនៃការគិត។ ដូច្នេះត្រូវទុកចន្លោះខ្លះដើម្បីផ្តល់ឱកាសឱ្យមានពេលនៅជាមួយខ្លួនឯង ស្វែងយល់ពីតម្រូវការ ចំណូលចិត្ត និងអ្វីដែលគួរតែបំពេញបន្ថែម៕