ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការយកចិត្តទុកដាក់ ឬក៏ការរំលឹកខ្លួនឯងឱ្យចាយត្រូវនឹងទំហំទឹកប្រាក់ដែលខ្លួនមាន ឬឱ្យស្របនឹងតម្រូវការជាក់ស្តែង បានជះឥទ្ធិពលទៅកាន់ការសម្រេចចិត្ត ការបង្កើតទម្លាប់ល្អប្រចាំថ្ងៃ និងភាពរឹងមាំទៅកាន់សុខភាពផ្លូវចិត្តផងដែរ។ ដើម្បីជំរុញឱ្យមានស្មារតីខ្ពស់ក្នុងការចាយវាយ ត្រូវផ្តោតលើបច្ចុប្បន្នភាព ពុំមែនត្រឡប់ទៅសោកស្តាយរាល់សាច់ប្រាក់ ឬទឹកប្រាក់ដែលបានចំណាយអស់កាលពីមុនៗនោះទេ។
តាមរយៈ Fulton Bank បានបង្ហាញគន្លឹះចំនួន៤ ក្នុងការដាស់សតិខ្លួនឯង ឱ្យយកចិត្តទុកដាក់ក្នុងការចំណាយ ឬមានសតិរឭកដឹងក្នុងការចាយវាយប្រចាំថ្ងៃ ៖
ផ្នត់គំនិត ៖ ស្មារតីរឭកដឹងពុំអាចសម្រេចបាននោះទេ ប្រសិនបើមិនមានផ្នត់គំនិតជឿជាក់លើការចាវាយដោយហ្មត់ចត់ថា អាចជួយឱ្យគុណភាពនៃការរស់នៅមានភាពរីកចម្រើន ដូចនេះសូមក្រឡេកមើលអ្វីដែលលោកអ្នកឱ្យតម្លៃ និងអ្វីដែលជាអាទិភាពក្នុងការរស់នៅ ហើយអ្វីដែលអាចបំពេញសេចក្ដីត្រូវការ និងធ្វើឱ្យការរស់នៅរបស់អ្នកមានអត្ថន័យពេញលេញ។ ឧទាហរណ៍ ការជួបជុំគ្រួសារ ការស្គាល់មនុស្សថ្មី និងទៅកន្លែងដែលពុំធ្លាប់ស្គាល់ជាដើម។ ដោយសារតែតម្រូវការរបស់មនុស្សមានច្រើន ដូច្នេះគួរកត់ត្រាទុកមួយឡែក បើក្នុងករណីត្រូវកាត់បន្ថយចំណាយ នោះនឹងងាយស្រួលក្នុងការជ្រើសយកភាពសំខាន់ៗដែលត្រូវចំណាយ និងប្រើពេលតិចក្នុងការកាត់ចោលនូវចំណុចណាដែលមិនចាំបាច់។
ឆ្លុះបញ្ចាំងបទពិសោធន៍កន្លងមក ៖ ត្បិតថាមិនចាំបាច់ក្នុងការសោកស្តាយរាល់កំហុសដែលធ្លាប់បង្កពាក់ព័ន្ធនឹងការចំណាយដែលមិនល្អកាលពីមុនៗ ប៉ុន្តែក៏ត្រូវការក្រឡេកទៅមើលទម្លាប់នៃការចាយវាយចាស់ៗ ដែលនេះជាចំណែកមួយជួយឱ្យជៀសវាង ក្នុងការចាយខុសខ្ទង់សម្រាប់ពេលបច្ចុប្បន្ន និងការរំលឹកដាស់តឿនស្មារតីឱ្យបានរឿយៗទៀតផង។ ឧទាហរណ៍ការនឹកទៅដល់ពេលទិញសម្ភារៈ! សម្ភារៈនិយមច្រើនបានធ្វើឱ្យអារម្មណ៍ល្អមួយភ្លែតៗ ប៉ុន្តែវាក៏នឹងធ្លាក់ចុះទៅវិញនៅពេលមានសម្ភារៈប្លែកៗថ្មីៗចេញលក់លើទីផ្សារជាបន្តបន្ទាប់។
សម្ភារៈដែលគួរទិញ ៖ សម្ភារៈដែលគួរមានបន្ថែម គួរតែជាសម្ភារៈទាំងឡាយណាដែលបង្កភាពងាយស្រួលទៅកាន់ការរស់នៅប្រចាំថ្ងៃ សម្ភារៈដែលជួយបង្កើនចំណូល សម្ភារៈដែលជួយសម្រាលបន្ទុក និងបង្កើនផលិតភាពក្នុងការសិក្សាឬការងារ។
គោលដៅចំណាយ ៖ ក្នុងចំណេះដឹងមូលដ្ឋានគ្រឹះ នៃហិរញ្ញវត្ថុ មានការជជែកជាច្រើនអំពីគោលដៅនៃការសន្សំ! ចុះគោលដៅនៃការចំណាយវិញ តើមានរូបភាពបែបណា ហើយគ្រាន់តែចំណាយដែលជាសកម្មភាពដ៏ងាយស្រួល ហេតុអ្វីត្រូវមានគោលដៅ? មូលហេតុនោះ គឺ កាលដែលបានគិតទុកមុនអំពីអ្វីដែលគួរចំណាយ វាក៏បានជះឥទ្ធិពលវិជ្ជមានទៅកាន់ការសន្សំដូចគ្នា ការគិតទុកមុន ជួយកុំឱ្យចាយលើរបស់ដែលអត់ក៏បានមានក៏បាន និងជាការសម្រួចខ្ទង់ចំណាយឱ្យស្របតាមលទ្ធភាពនិងតម្រូវការជាក់ស្តែង៕
