ការសម្រេចចិត្តផ្នែកហិរញ្ញវត្ថុមួយចំនួន មើលទៅហាក់ដូចជារឿងធម្មតាក្នុងពេលបច្ចុប្បន្ន។ ប៉ុន្តែវាអាចបង្ករជាហានិភ័យនៅថ្ងៃអនាគតរបស់អ្នកយ៉ាងខ្លាំង នឹកស្មានមិនដល់ ព្រមទាំងអាចបង្កើតឱ្យមានវិបត្តិរយៈពេលវែងទៀតផង។ ហេតុដូច្នេះហើយ បានជាយើងត្រូវស្វែងយល់ពីកំហុសហរិញ្ញវត្ថុចំនួន ៦ដែលយុវជន តែងតែធ្វើដោយមិនដឹងខ្លួន ។

១. ចំណាយលើសចំណូល ៖ គ្រប់ពេលដែលមានពាក្យថា «ពេក» គឺមិនមែនជារឿងល្អនោះទេ ដូចជា ស្រឡាញ់ពេក ស្អប់ពេក ខំពេក ហូបច្រើនពេក សុទ្ធតែបង្កើតឱ្យមានបញ្ហា។ ទន្ទឹមនឹងនេះ ចាយលុយច្រើនពេករឹតតែជាកំហុសថែមទៀត បើទោះជាអ្នកមានប្រាក់ចំណូល ឬប្រាក់ខែខ្ពស់ក៏ដោយ ប្រសិនបើអ្នកមិនមានទម្លាប់គ្រប់គ្រងការចំណាយឱ្យតិចជាងចំណូល អ្នកនឹងមិនងាយមានសុវត្ថិភាពហិរញ្ញវត្ថុនោះទេ។ លើសពីនេះ ទម្លាប់ចំណាយច្រើន ក៏អាចបង្ករជាហានិភ័យសម្រាប់អនាគតផងដែរ។

២. រស់ឱ្យតែដល់ថ្ងៃបើកលុយ ៖ យុវជនមួយចំនួនកំពុងមានទម្លាប់មួយនេះ ដោយសារតែឧស្សាហ៍ចំណាយលើរបស់មិនចាំបាច់ និងមិនមានទម្លាប់សន្សំ។ ជាទូទៅ ពិបាកចាយលុយឱ្យបានសល់ក្នុងមួយខែៗណាស់ ប៉ុន្តែសូមអ្នកចងចាំថា អនាគតនៃហិរញ្ញវត្ថុរបស់អ្នក គឺពឹងលើទម្លាប់គ្រប់គ្រងលុយរបស់អ្នកក្នុងពេលបច្ចុប្បន្ន។ ម្ល៉ោះហើយ អ្នកគួរកាត់បន្ថយការចំណាយលើរបស់មិនចាំបាច់ និងធ្វើយ៉ាងណាឱ្យចំណូលប្រចាំខែរបស់អ្នកនៅសល់ឱ្យបានច្រើនតាមដែលអាចធ្វើទៅបាន។

៣. ទម្លាប់ខ្ចីលុយមិត្តភក្តិរាល់ខែ ៖ តើអ្នកតែងតែខ្ចីលុយមិត្តភក្តិ ឬអ្នកជិតដិត ដើម្បីផ្គត់ផ្គង់ការចំណាយរាល់ខែមែនទេ? បើពិតមែន សូមសួរខ្លួនឯងថា ហេតុអ្វីបានជានៅតែបន្តទម្លាប់បែបនេះ? ហើយអាចបញ្ឈប់វាបាននៅពេលណា? មែនទែនទៅ ការរស់នៅដោយអាងការខ្ចីគេរាល់ខែ គឺបង្ហាញភាពអសមត្ថភាពក្នុងការគ្រប់គ្រងចំណូលខ្លួនឯង ជាពិសេស ធ្វើឱ្យអ្នកចំណាយកាន់តែច្រើនដោយមិនដឹងខ្លួន។

៤. មិនបង្កើតកញ្ចប់ប្រាក់សង្គ្រោះបន្ទាន់ ៖ ការបង្កើតកញ្ចប់ប្រាក់ក្នុងករណីបន្ទាប់គឺជារឿងសំខាន់ខ្លាំងណាស់ ប៉ុន្តែជាអកុសលមានមនុស្សមិនច្រើនទេ ដែលមានវា ជាពិសេសយុវជនតែម្ដង ។ យ៉ាងណាមិញ សូមកុំភ្លេចថា អ្នកមិនអាចព្យាករណ៍អំពីបញ្ហាដែលអាចកើតឡើងដោយចៃដន្យនោះទេ ហើយច្បាស់ណាស់បញ្ហាមួយចំនួនដូចជា បង់ថ្លៃពេទ្យ ជួសជុលម៉ូតូ ឬជួលជុលទូរស័ព្ទ សុទ្ធត្រូវការលុយបន្ទាន់ទាំងអស់។ ហេតុនេះ ប្រសិនបើអ្នកមានកញ្ចប់ទឹកប្រាក់ត្រៀមទុកជាមុនសម្រាប់ប្រឈមនឹងបញ្ហាទាំងនេះ វានឹងជួយឱ្យអ្នកដោះស្រាយបញ្ហាដោយរលូន។

៥. មិនមានគោលដៅហិរញ្ញវត្ថុ ៖ ការចាយលុយដោយមិនខ្វល់ពីអនាគត បានបង្ហាញថា អ្នកមិនបានគ្រប់គ្រងលុយត្រឹមត្រូវនោះទេ។ ជាពិសេស វាអាចនាំឱ្យអ្នកធ្លាក់ក្នុងវិបត្តិហិរញ្ញវត្ថុនាពេលអនាគតទៀតផង។ ដូច្នេះ ការរៀបចំផែនការ និងយុទ្ធសាស្ត្រ ដើម្បីសម្រេចគោលដៅហិរញ្ញវត្ថុពិតជាសំខាន់ណាស់ ព្រោះការអនុវត្តវិធីនេះ នាំឱ្យអ្នកអាចកសាងទ្រព្យសម្បត្តិ និងមានសុវត្ថិភាពហិរញ្ញវត្ថុនាពេលអនាគត។

៦. មិនឆ្លៀតវិនិយោគ ៖ ប្រសិនបើអ្នកចង់មានជីវិតក្រោយចូលនិវត្តន៍ដែលមានភាពរីករាយ និងសុភមង្គលពិតប្រាកដ ព្រមទាំងមិនចាំបាច់បារម្ភបញ្ហាចំណាយ អ្នកគួរគិតគូរពីការវិនិយោគឱ្យបានឆាប់ចាប់ពីពេលនេះ។ ការវិនិយោគ គឺជាមធ្យោបាយមួយដែលអាចជួយឱ្យអ្នកមានសេរីភាពហិរញ្ញវត្ថុនៅថ្ងៃអនាគត ជាពិសេសអាចផ្គត់ផ្គងការចំណាយពេលមានគ្រួសារ និងក្រោយចូលនិវត្តន៍។

សរុបមក ការគិតគូរអំពីបញ្ហាហិរញ្ញវត្ថុគឺជាកត្តាចម្បងបំផុតមួយ ដែលយុវជន និងមនុស្សគ្រប់វ័យ មិនអាចមើលរំលង និងត្រូវចិត្តទុកដាក់ជៀសវៀងរាល់ទម្លាប់មិនល្អ ជាពិសេសគឺទម្លាប់ដែលបានរៀបរាប់ខាងលើទាំងប្រាំមួយ។ ព្រោះវាគឺជាប្រភពនៃការរស់នៅដោយមិនចាំបាច់ខ្វល់ខ្វាយពីបញ្ហាបំណុល និងជៀសផុតពីវិបត្តិហិរញ្ញវត្ថុក្នុងការរស់នៅប្រចាំថ្ងៃ ពេលមានគ្រួសារ និងក្រោយពេលចូលនិវត្តន៍៕