ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មានការវែកញែកពាក់ព័ន្ធនឹងភាពខុសគ្នារវាងផលិតភាព និងភាពមមាញឹក ក្នុងនោះភាពមមាញឹកច្រើនលើសលប់បានបង្កនូវផលប៉ះពាល់មួយចំនួនទៅកាន់សុខភាព។ មិនមែនរាល់ការមមាញឹកខ្លាំង សុទ្ធតែមិនល្អនោះទេ! ជាទូទៅបុគ្គលម្នាក់ៗ សុទ្ធតែមានហេតុផលរៀងៗខ្លួនថា តើហេតុអ្វីបានជាពួកគេត្រូវប្រើប្រាស់ជីវិតបែបរវល់ជានិច្ច? យ៉ាងណាមិញ បើសង្កេតឃើញថា ខ្លួនហាក់មានស្ថានភាពស្រ្តេស ប៉ះពាល់ដល់តុល្យភាព នៃការរស់នៅ និងត្រូវការថាមពលត្រឡប់មកវិញ គឺដល់ពេលដែលត្រូវរកវិធីដើម្បីបន្ធូរបន្ថយស្ថានការណ៍បែបនេះឱ្យបាន។ តាមរយៈគេហទំព័រ Verywellmind បង្ហាញជូនគន្លឹះ១០ចំណុច ក្នុងការថែទាំសុខភាពផ្លូវចិត្ត កំឡុងពេលរវល់ច្រើន។
១. អប់រំចិត្ត និងពង្រឹងស្មារតី ៖ សកម្មភាពអប់រំចិត្ត មានច្រើនបែប និងច្រើនរូបភាព មិនថាអានសៀវភៅ សមាធិ ស្តាប់ភ្លេង និងការដឹងអំពីរបៀបដកដង្ហើមជាដើម។ ដែលសកម្មភាពទាំងនេះ បានរួមចំណែកឱ្យមានការផ្សារភ្ជាប់ជាមួយនឹងខ្លួនឯង និងដឹងតម្រូវការផ្ទាល់ខ្លួនដោយគ្មានការវាយតម្លៃពីមជ្ឈដ្ឋានខាងក្រៅ។ បន្ថែមពីនោះ សកម្មភាពអប់រំចិត្ត ក៏បានជួយឱ្យស្ថានភាពផ្លូវចិត្តមានឱកាសបានសម្រាក ជាពិសេសក្នុងកាលៈទេសៈដែលមមាញឹកខ្លាំង។
២. មានផែនការសម្រាប់វិស្សមកាល ឬក៏ឆ្លៀតពេលសម្រាក ៖ ប្រសិនបើអាច គួរតែមានពេលសម្រាក ឬក៏ប្រើប្រាស់ពេលសម្រាកប្រកបដោយប្រសិទ្ធភាព ដោយទុកកិច្ចការផ្សេងៗនូវមួយឡែកសិន ហើយសង្កេតបរិយាកាសជុំវិញខ្លួនដែលធ្វើយ៉ាងណាឱ្យខ្លួនឯងស្ថិតក្នុងបច្ចុប្បន្នភាព អនុវត្តន៍បែបនេះបានរឿយៗ ជាកត្តារួមចំណែកទាញថាមពលត្រឡប់មកវិញ។
៣. ចំណាយពេលជាមួយមនុស្សស្និទ្ធស្នាល ៖ ក្នុងដំណើរការរស់នៅ ការចំណាយពេលជាមួយមនុស្សដែលខ្លួនឯងទុកចិត្ត ឬស្និទ្ធស្នាល គួរតែចាត់ទុកជាអាទិភាព ដោយសារការនៅក្បែរមនុស្សស្និទ្ធស្នាល ឬជាទីស្រឡាញ់ គឺទទួលបានអារម្មណ៍កក់ក្តៅ ទទួលបានការស្រឡាញ់ ជាពិសេសនោះគឺថាមពលផ្លូវចិត្ត។
៤. ឆ្លុះបញ្ចាំងពីខ្លួនឯង ៖ ទោះបីជាមានពេលតិចតួចក៏ដោយ គួរតែទុកចន្លោះខ្លះ ដើម្បីរកឱ្យឃើញអ្វីទៅជាមោទនភាពចំពោះខ្លួនឯង? មោទនភាពទាំងនោះ រួមបញ្ចូលទាំងការនិយាយពាក្យល្អទៅកាន់ខ្លួនឯង ឬក៏សរសេរកំណត់ហេតុ ដែលពាក់ព័ន្ធនឹងអ្វីដែលខ្លួនពេញចិត្តជាងគេក្នុងមួយថ្ងៃនេះ។
៥. ផ្តោតលើអ្វីដែលត្រូវសម្រេចឱ្យបាន ៖ ក្នុងមួយថ្ងៃៗ មានរឿងរ៉ាវ ច្រើនណាស់កើតមានក្នុងជីវិតរបស់យើង ទាំងការព្រៀងទុក ឬកើតមានដោយចៃដន្យ ដែលជាហេតុគួរតែឧស្សាហ៍ប្រាប់ខ្លួនឯងរាល់ថ្ងៃថា ផលិតភាព ឬក៏គុណតម្លៃជាមនុស្ស ឬការងារ មិនមែនស្ថិតលើភាពមមាញឹកជាប់ជានិច្ចរហូតនោះទេ គឺស្ថិតនៅលើបានធ្វើសកម្មភាពមានអត្ថន័យ ឬក៏សម្រេចតាមក្ដីរំពឹងទុក និងគោលដៅ។ គួរជម្រាបជូនថា ការរំឮកខ្លួនឯងឱ្យបានញឹកញាប់អំពីអ្វីដែលត្រូវសម្រេចឱ្យបាន។
៦. ដាស់តឿន ៖ ធ្វើទម្លាប់ផ្តល់នូវឯករាជ្យភាពចំពោះខ្លួនឯង ដោយក្នុងការវិភាគ ត្រូវមានសកម្មភាពដែលផ្តល់ឱកាសឱ្យខ្លួនឯងមានពេលដកដង្ហើមវែងៗ ឬក៏ការរស់នៅជាមួយខ្លួនឯងដើម្បីត្រិះរិះពិចារណាប្រើប្រាស់ពេលវេលាខាងមុខបែបណាទើបមានប្រសិទ្ធភាព? ហើយការរំឮកខ្លួនឯងទៀតសោធ អាចធ្វើបានតាមរយៈសកម្មភាពជាច្រើនដូចជា ឧបករណ៍អេឡិចត្រូនិច ឬកម្មវិធីឌីជីថល និងសរសេរបិទនៅលើទីតាំងណាមួយដែលងាយស្រួលក្នុងការក្រឡេកទៅឃើញ។
៧. ប្រឹក្សាជាមួយអ្នកជំនាញសុខភាពផ្លូវចិត្ត ៖ ស្ថិតក្នុងស្ថានភាពតានតឹងរ៉ាំរ៉ៃ ឬក៏ពិបាកក្នុងការប្រឈមនឹងអាការអស់កម្លាំងក្នុងរយៈពេលយូរ នោះការទំនាក់ទំនងទៅអ្នកជំនាញ មានភាពចាំបាច់ក្នុងការពង្រឹងគុណភាព នៃការរស់នៅប្រចាំថ្ងៃ។
៨. ការរំពឹងទុកក្នុងទំហំមួយអាចធ្វើបាន ៖ មិនថាការងារ ឬក៏ការសិក្សា បើគ្មានការរំពឹងទុក នោះក៏ពិបាកនឹងធ្វើឱ្យគោលដៅបញ្ចប់ដែរ តែយ៉ាងណាត្រូវការឱ្យការរំពឹងទុកនោះ មានភាពសមទំនងក្នុងការសម្រេចដូចគ្នាដែរ មិនធំពេក មិនតូចពេក ដោយស្របទៅតាមលទ្ធភាព និងសមត្ថភាព។
៩. ស្វែងយល់ពីភាពមិនប្រក្រតីជាប្រចាំ ៖ ប្រសិនបើផ្ទៀងផ្ទាត់រាល់កិច្ចការ ដែលសម្រេចបានមានចំនួនតិច ប៉ុន្តែភាពមមាញឹកមានចំនួនច្រើន គួរមានការឆ្លុះបញ្ចាំងចំពោះខ្លួនឯង និងយកចិត្តទុកដាក់ចំពោះភាពអវិជ្ជមាន ក៏ដូចជាអារម្មណ៍គ្មានផាសុកភាព ដោយជ្រើសរើសមនុស្សដែលទុកចិត្ត ឬក៏អ្នកជំនាញដើម្បីសាកសួរអំពីដំណោះស្រាយបន្ថែម។
១០. បង្កើតកាលវិភាគ ៖ សម្រាកពីការងារ ពីទំនួលខុសត្រូវធ្ងន់ៗ ឬពីបន្ទុកគ្រួសារខ្លះដើម្បីទុកពេលឱ្យខ្លួនឯងមានឱកាសសញ្ជឹងគិត ទោះបីជាពេលវេលាតិចតួចក៏ដោយ ប៉ុន្តែវាមានន័យ និងមានសារៈសំខាន់ចំពោះសុខភាព៕
