ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការស្តាប់សកម្ម គឺជាជំនាញដ៏សំខាន់សម្រាប់ការរៀនប្រកបដោយប្រសិទ្ធភាព ហើយពាក់ព័ន្ធនឹងការបង្កើនជំនាញស្តាប់ទៀតសោត មានដូចជា ធ្វើយ៉ាងណាកុំឱ្យខ្លួនឯងចែករំលែកចំណាប់អារម្មណ៍ជាមួយឧបករណ៍អេឡិចត្រូនិចអំឡុងពេលរៀន ស្តាប់តែមួយមុខមិនថា អ្នកនិយាយនោះជាមិត្តរួមថ្នាក់ ឬគ្រូនោះទេ។ បន្ថែមពីនោះ ការរួមចំណែកក្នុងនាមជាសិស្សនៅកន្លែងរៀន ដោយប្រើប្រាស់ភាសាកាយវិកា ឬការបង្ហាញពីចំណាប់អារម្មណ៍ សួរផ្ទៀងផ្ទាត់ជាសំណួរបន្ថែម និងសំយោគឬសង្ខេប គឺជាផ្នែកមួយនៃការស្តាប់ដ៏សកម្មផងដែរ។
តាមរយៈគេហទំព័រ GreatBooks Foundation បានបង្ហាញគន្លឹះមួយចំនួន ក្នុងការពង្រឹងជំនាញស្តាប់ដើម្បីរក្សាប្រសិទ្ធភាពក្នុងការសិក្សា ដោយមានរៀបរាប់នៅខាងក្រោម ៖
ភាសាកាយវិការ ៖ ការស្តាប់សកម្ម គឺជាការរួមចំណែកគ្នា នាំឱ្យផលិភាពនៃការសិក្សាកាន់តែមានប្រសិទ្ធភាព ក្រៅតែពីការប្រើប្រាស់ត្រចៀកក្នុងការផ្ទៀងផ្ទាត់ស្តាប់ នៅមានសកម្មភាពជាច្រើនទៀតដើម្បីរួមចំណែកដល់ការស្តាប់ដ៏សកម្មដែលមានដូចជាការសម្លឹងមើលទៅកាន់មនុស្សដែលកំពុងនិយាយ ព្យាយាមរង់ចាំទាល់តែគ្រូ ឬមិត្តរួមថ្នាក់និយាយចប់ សឹមចោទសួរ ឬក៏ឆ្លើយឆ្លងពាក្យសម្តី មិនលើកដៃនៅពេលកំពុងមានប្រធានបទសំខាន់ដែលគ្រូនិយាយ ឬក៏ប្រើប្រាស់សកម្មភាពទាំងឡាយណាដែលរំខានដល់ការនិយាយ។
ធ្វើជាបុគ្គលគំរូនៅក្នុងថ្នាក់ ៖ ស្រមៃទៅដល់ក្រុមមនុស្សដែលខ្លួនឯងចង់ក្លាយទៅជាបែបនោះ ហើយចាប់ផ្តើមបង្កើតសកម្មភាពឱ្យក្លាយជាសិស្សដែលស្ថិតក្នុងក្ដីស្រមៃទាំងនោះតាមរយៈសកម្មភាពដូចជា ការសួរសំណួរផ្ទៀងផ្ទាត់ត្រឡប់ទៅកាន់គ្រូ ទោះបីជាយល់ក៏ដោយ ក៏ការដែលមានទម្លាប់សួរបញ្ជាក់បានបង្កើនផលិតភាពក្នុងការសិក្សា បន្ទាប់ពីសួរហើយជាសកម្មភាពបន្ទាប់គឺសង្ខេបរាល់អត្ថន័យដែលបានសួរ និងកត់ត្រា ឬឆ្លុះបញ្ចាំង។
ការផ្តោត និងឆ្លើយតប ៖ ស្តាប់ដ៏សកម្មនៅក្នុងថ្នាក់ ក្រៅពីការប្រើប្រាស់វិធីសាស្រ្តផ្តោត សិស្សពុំអាចមើលរំលងអំពីភាពខុសគ្នារវាងការប្រតិកម្ម និងការឆ្លើយតបបាននោះទេ ដោយធ្វើយ៉ាងណាបង្ហាញឱ្យឃើញពីការយកចិត្តទុកដាក់ទៅកាន់គ្រប់គ្នាដែលមាននៅក្នុងថ្នាក់៕
