ភ្នំពេញ – បើនិយាយពីហិរញ្ញវត្ថុគឺពិតជាសំខាន់សម្រាប់គ្រប់វ័យ ប៉ុន្តែក្នុងភាពជាយុវវ័យការមានចំណេះដឹងផ្នែកហិរញ្ញវត្ថុនឹងជួយឱ្យយុវជនរៀបចំផែនការហិរញ្ញវត្ថុកាន់តែចំគោលដៅ ប្រកបដោយប្រសិទ្ធភាព និងអាចធានានូវការអនុវត្តដោយជោគជ័យ។ បើតាមឯកសារណែនាំ សម្រាប់ការត្រៀមចូលទីផ្សារការងារ របស់ទីភ្នាក់ងារជាតិ និងមុខរបរ ខាងក្រោមនេះជាគន្លឹះមួយចំនួនដែលជួយឱ្យយុវជនមានទំនុកចិត្ត និងអាចគ្រប់គ្រងហិរញ្ញវត្ថុផ្ទាល់ខ្លួនបានយ៉ាងល្អប្រសើរ រួមមាន៖

ទី១. ការរៀបគោលដៅហិរញ្ញវត្ថុលម្អិត ៖ ត្រូវចំណាយពេលដើម្បីសរសេរកំណត់ពីគោលដៅជាក់លាក់ និងរយៈពេលវែងសម្រាប់ហិរញ្ញវត្ថុរបស់អ្នក ។ ឧទាហរណ៍ គោលដៅចូលនិវត្តន៍មុនកាលកំណត់គឺត្រូវពឹងលើប្រាក់សន្សំ។ ចំណែកគោលដៅផ្សេងទៀតដូចជាការទិញផ្ទះ, ការកសាងគ្រួសារ, ការផ្លាស់ប្ដូរអាជីព គឺពាក់ព័ន្ធជិតស្និទ្ធជាមួយការគ្រប់គ្រងហិរញ្ញវត្ថុ។

ទី២. ការរៀបចំផែនការលម្អិត ៖ ការរៀបចំផែនការត្រូវមានច្រើនដំណាក់កាលដូចជាការចំណាយប្រចាំខែ ឆ្នាំ និងរយៈពេលវែង ឬការរំលោះបំណុល។ ការកំណត់ផែនការថវិកាច្បាស់លាស់ គឺជាគន្លឹះក្នុងការគ្រប់គ្រងស្ថានភាពថវិកាពេលអនាគត។ ម្យ៉ាងទៀត អ្នកគួរតែបន្តបន្ថែមការសន្សំសម្រាប់គោលដៅរយៈពេលវែងដូចជា ការសន្សំសម្រាប់ពេលចូលនិវត្តន៍។ លើសពីនេះ ការបង្កើតមូលនិធិសម្រាប់ដោះស្រាយបញ្ហាពេលជួបគ្រោះអាសន្នក៏អាចជួយដល់ភាពជោគជ័យផ្នែកហិរញ្ញវត្ថុ និងកាត់បន្ថយភាពតានតឹងក្នុងការរស់នៅផងដែរ។

ទី៣. ការរៀបផែនការថវិកា និងអនុវត្តដោយម៉ត់ចត់៖ អ្នកអាចរៀបចំផែនការថវិកាលម្អិតឱ្យស្របតាមគោលដៅនៃការចំណាយតិចជាងចំណូល ការខិតខំសងបំណុល និងការសន្សំប្រាក់សម្រាប់អនាគត។

ទី៤. ការសងបំណុល៖ បំណុលគឺជាឧបសគ្គធំបំផុតក្នុងការឈានដល់គោលដៅនៃការរៀបចំផែនការហិរញ្ញវត្ថុ។ ដូច្នេះ អ្នកត្រូវរៀបចំផែនការបង់ឬលុបបំណុលឱ្យកាន់តែតូច ដើម្បីអាចសងបំណុលបានលឿន។ ឧទាហរណ៍ ការលក់វត្ថុមិនចាំបាច់ ឬមិនប្រើប្រាស់ដើម្បីបង្កើនចំណូលបន្ថែមនិងអាចសងបំណុលបានឆាប់។ ការស្វែងរកការងារបន្ថែមដើម្បីបង្កើនរំលោះចំណូល ហើយការកាត់បន្ថយចំណាយមិនចាំបាច់ដើម្បីសន្សំទុន និងអាចសងបំណុល។ទី៥. ស្វះស្វែងរកការពិគ្រោះយោបល់៖ បន្ទាប់ពីអ្នកសន្សំប្រាក់បានច្រើន និងចង់វិនិយោគ ឬប្រកបអាជីវកម្មអ្វីមួយ អ្នកគួរតែពិគ្រោះយោបល់ជាមួយអ្នកជំនាញផ្នែករៀបចំផែនការហិរញ្ញវត្ថុដើម្បីសម្រេចចិត្តបានត្រឹមត្រូវស្របតាមលក្ខខណ្ឌផ្ទាល់ខ្លួនរបស់អ្នក។ ម្យ៉ាងទៀត ការពិគ្រោះយោបល់អាចកាត់បន្ថយហានិភ័យនៅតាមដំណាក់កាលនីមួយៗនៃការវិនិយោគ ឬប្រកបអាជីវកម្មផងដែរ៕