ភ្នំពេញ – អង្គការភ្លែនអន្តរជាតិកម្ពុជា បានចុះហត្ថលេខាលើកិច្ចព្រមព្រៀង និងប្រកាសជាផ្លូវការទូតសុឆន្ទៈរបស់យុទ្ធនាការក្មេងស្រីត្រូវមានឱកាសស្មើគ្នា។ ព្រឹត្តិការណ៍នេះ បានធ្វើឡើងតាមរយៈប្រព័ន្ធហ្សូមកាលពីព្រឹកថ្ងៃពុធ (២០ ធ្នូ) ។ គោលបំណងនៃការទទួលស្គាល់នេះ ដើម្បីធានាថា ក្មេងស្រី និងស្ត្រីវ័យក្មេង មានអំណាចលើជីវិតផ្ទាល់ខ្លួន ការសម្រេចចិត្ត និងអាចរៀបចំពិភពលោកជុំវិញខ្លួនពួកគេ ។

តាមការបញ្ជាក់ពីអង្គការភ្លែនអន្តរជាតិកម្ពុជា យុវជនបីរូបត្រូវបានជ្រើសរើសជាទូតសុឆន្ទៈយុទ្ធនាការក្មេងស្រីត្រូវមានឱកាសស្មើគ្នា មានកញ្ញា ពៅ ស្រីណូ, កញ្ញា លេខ ការី, និងលោក ហេន សុភាព ជាយុវជនមកពីខេត្តសៀមរាប រតនគិរី និងស្ទឹងត្រែង ។ យុវជនទាំងបីរូបនេះ បានចូលរួមយ៉ាងសកម្មនៅក្នុងសហគមន៍ ដែលធ្វើឱ្យសហគមន៍របស់ពួកគេក្លាយជាកន្លែងប្រសើរ ។

លោក យី គីមថាន នាយករងប្រចាំប្រទេស នៃអង្គការភ្លែនអន្តរជាតិកម្ពុជា បញ្ជាក់ថា ទូតសុឆន្ទៈ យុទ្ធនាការក្មេងស្រីត្រូវមានឱកាសស្មើគ្នា ជាយុវជនសកម្មនៅក្នុងសហគមន៍របស់ពួកគេ និងបានឆ្លងកាត់ដំណើរការជ្រើសរើសតាំងពីខែកក្កដានៅឆ្នាំនេះ ។ ក្នុងរយៈពេលមួយឆ្នាំទូតសុឆន្ទៈយុទ្ធនាការក្មេងស្រីត្រូវមានឱកាសស្មើគ្នា នឹងចូលរួមនៅក្នុងសកម្មភាពនានាទាំងផ្ទាល់ និងអនឡាញ ដើម្បីសិទ្ធិកុមារី និងសមភាពយេនឌ័រ។ ពួកគេក្លាយជាគំរូ និងភ្នាក់ងារនៃការផ្លាស់ប្តូរនាពេលបច្ចុប្បន្ន និងអនាគត។

លោកមានប្រសាសន៍បន្តទៀតថា

“ក្នុងអំឡុងពេលនៃការជ្រើសរើស ពួកគេបីនាក់បានបង្ហាញពីការប្តេជ្ញាចិត្ត និងភាពជាអ្នកដឹកនាំដ៏ល្អរបស់ពួកគេនៅក្នុងការងារសហគមន៍ដែលពួកគេបានធ្វើដើម្បីលើកកម្ពស់សមភាពសម្រាប់ក្មេងស្រី និងស្ត្រី”

នាយករងប្រចាំប្រទេសនៃអង្គការភ្លែនអន្តរជាតិកម្ពុជា បានបញ្ជាក់បន្តថា អង្គការភ្លែនអន្តរជាតិកម្ពុជាកំពុងដើរក្នុងដំណើរឆ្ពោះទៅរកសិទ្ធិស្មើគ្នារបស់កុមារី និងស្ត្រី ។ ការចូលរួមរបស់យុវជនក្នុងនាមជាទូតសុឆន្ទៈយុទ្ធនាការក្មេងស្រីត្រូវមានឱកាសស្មើគ្នា នឹងបន្ថែមគុណតម្លៃនៃការចូលរួមរបស់យុវជននៅក្នុងការងាររបស់យើង ហើយនាំមកនូវគំនិត និងវិធីសាស្រ្តថ្មីៗ ដើម្បីឈានទៅដល់គោលដៅរបស់យើងដែលផ្តល់ប្រយោជន៍ដល់ក្មេងស្រី និងស្ត្រីវ័យក្មេង ២,៥ លាននាក់នៅកម្ពុជា ដើម្បីឱ្យពួកគេបំពេញសិទ្ធិ និងសម្រេចបានសក្តានុពលពេញលេញរបស់ពួកគេ ។

កញ្ញា ពៅ ស្រីណូ ទូតសុឆន្ទៈយុទ្ធនាការក្មេងស្រីត្រូវមានឱកាសស្មើគ្នា មកពីខេត្តសៀមរាប បានពន្យល់ថា វាជាមហិច្ឆតារបស់នាងតាំងពីតូចមកម្ល៉េះ ជាពិសេសនាងចង់បំបែករបាំងនៃវិសមភាពយេនឌ័រ និងឧបសគ្គដែលរារាំងក្មេងស្រីមិនឱ្យធ្វើសេចក្តីសម្រេចចិត្ត។ ស្រីណូបាននិយាយថា “យើង នឹងមិនឈប់ទេ លុះណាតែស្រ្តី និងក្មេងស្រីទទួលបានសិទ្ធិពេញលេញ”។

ចំណែកកញ្ញា លេខ ការី ទូតសុឆន្ទៈរបស់យុទ្ធនាការក្មេងស្រីត្រូវមានឱកាសស្មើគ្នាមកពីខេត្តរតនគិរី បង្ហាញពីការប្តេជ្ញាចិត្ត និងការបំផុសគំនិត ព្រមទាំងផ្តល់កម្លាំងចិត្តដល់ក្មេងស្រីឱ្យហ៊ានបង្កើតក្តីស្រមៃ និងក្រោកឈរ ដើម្បីសិទ្ធិដែលពួកគេសមនឹងទទួលបាន ។

កញ្ញា លេខ ការី និយាយថា

“ក្នុងនាមជាទូតសុឆន្ទៈ យុទ្ធនាការក្មេងស្រីត្រូវមានឱកាសស្មើគ្នា ខ្ញុំជឿថាក្មេងស្រីត្រូវតែមានឱកាសស្មើគ្នា ។ ខ្ញុំប្ដេជ្ញាចិត្តថានឹងខិតខំរៀនសូត្រ និងប្រើប្រាស់នូវសមត្ថភាព និងសម្លេងរបស់ខ្ញុំ ដើម្បីលើកទឹកចិត្ត និងគោរពសិទ្ធិដល់ស្រ្ដី និងក្មេងស្រី ដើម្បីឱ្យក្ដីស្រមៃជាអ្នកដឹកនាំ របស់ពួកគេ ក្លាយជាពិត”

សូមជម្រាបថា យុទ្ធនាការក្មេងស្រីត្រូវមានឱកាសស្មើគ្នា ជាផ្នែកនៃយុទ្ធនាការសកលរបស់អង្គការភ្លែនអន្តរជាតិមានគោលបំណងធានាថា កុមារី និងស្ត្រីវ័យក្មេងមានអំណាចលើជីវិតផ្ទាល់ខ្លួន ការសម្រេចចិត្ត និងអាចរៀបចំពិភពលោកជុំវិញខ្លួនពួកគេ ។ នៅប្រទេសកម្ពុជា យុទ្ធនាការក្មេងស្រីត្រូវមានឱកាសស្មើគ្នា បានដំណើរការយ៉ាងសកម្មតាំងពីឆ្នាំ២០១៨ តាមរយៈសកម្មភាពជាច្រើន ដូចជា យុទ្ធនាការ #FREETOBEONLINE ការប្រារព្ធទិវាក្មេងស្រីអន្តរជាតិ និងគំនិតផ្តួចផ្តើមក្មេងស្រីកាន់តួនាទីជំនួស៕