វិបត្តិហិរញ្ញវត្ថុក៏ជាមូលហេតុចម្បង នៃជំងឺថប់បារម្ភ និង​ភាពតានតឹងដែរ ។ ហេតុនេះ ការគ្រប់គ្រងហិរញ្ញវត្ថុបានល្អ គឺជាមធ្យោបាយដ៏មានប្រសិទ្ធភាពមួយ ដែលអាចជួយលើកកម្ពស់សុខុមាលភាពក្នុងការរស់នៅ។ ដូច្នេះ យើងគួរមានគណនីសន្សំ ៤ប្រភេទ ដើម្បីគ្រប់គ្រងការបែងចែកលុយឱ្យកាន់តែមានប្រសិទ្ធភាព៖

១. ការសន្សំសម្រាប់ស្ថានភាពបន្ទាន់ (Saving for emergencies) ៖ គ្មាននរណាម្នាក់អាចព្យាករណ៍ពីរឿង ដែលកើតឡើងនៅថ្ងៃខាងមុខនោះទេ ។ ហេតុផលនេះហើយ បានជាយើងចាំបាច់ត្រូវត្រៀមខ្លួនប្រឈមមុខនឹងរឿងរ៉ាវផ្សេងៗ ដែលអាចកើតឡើងដោយចៃដន្យ។ ដូច្នេះ ប្រសិនបើមានរឿងមិននឹងស្មានដល់អាចកើតឡើង យើងក៏អាចមានវិធីដោះស្រាយទុកជាមុន។

ស្ថានភាពបន្ទាន់ក្នុងន័យនេះ រួមបញ្ចូលនូវព្រឹត្តិការណ៍ដែលកើតឡើង ដោយមិនបានដឹងមុន ជាស្ថានភាពលំបាក ដែលមិននឹកស្មានដល់ និងទាមទារឱ្យមានការឆ្លើយតបភ្លាមៗ។ ស្ថានការណ៍នោះទៀតសោតមានដូចជា ការធ្លាក់ខ្លួនឈឺរយៈពេលវែង គ្រោះថ្នាក់ធ្ងន់ធ្ងរ ការបាត់បង់ការងារ និងគ្រោះមហន្តរាយធម្មជាតិជាដើម។ ដើម្បីអាចដោះស្រាយវិបត្តិទាំងនេះ យើងចាំបាច់ត្រូវការប្រាក់ច្រើនមែនទែន។

២. ការសន្សំសម្រាប់ការការចូលនិវត្តន៍ (Saving for Retirement)៖ នៅក្នុងវ័យចំណាស់ យើងគួររស់នៅក្នុងជីវិតមួយដែលមានភាពរីករាយ ដោយអាចធ្វើអ្វីដែលយើងចង់ធ្វើ មិនចាំបាច់ខ្វល់ខ្វាយពីការធ្វើការងារ និងការចំណាយផ្សេងៗ ឬពឹងពាក់កូនចៅ។ យ៉ាងណាមិញ ពេលវេលា ដែលគួរតែទទួលបានភាពរីករាយ និងសុភមង្គលនេះ អាចក្លាយជាពេលវេលាដ៏តានតឹងវិញ ប្រសិនបើយើងមិនមានកញ្ចប់ទឹកប្រាក់សម្រាប់ចំណាយពេលចូលនិវត្តន៍។ ដើម្បីអាចរស់នៅក្នុងវ័យចាស់បានសុខស្រួល យើងត្រូវមានកញ្ចប់ទឹកប្រាក់សម្រាប់ចំណាយគ្រប់គ្រាន់។ ដូច្នេះ អ្នកអាចចាប់ផ្ដើមសន្សំប្រាក់សម្រាប់ការចូលនិវត្តន៍ចាប់ពីពេលនេះ ដើម្បីធានាថាជីវិតក្រោយចូលនិវត្តន៍របស់អ្នក អាចរស់នៅដោយមានសេចក្ដីសុខ។

៣. ការសន្សំសម្រាប់ការចំណាយមិនមែនទម្លាប់ ៖ ការចំណាយមួយចំនួនមិនបានកើតឡើងជារៀងរាល់ខែទេ ប៉ុន្តែប្រហែលជារៀងរាល់ ៣ខែ ៦ខែ ឬ១ឆ្នាំ។ ការចំណាយមិនទៀងទាត់ទាំងនោះរួមមាន អាំងប៉ាវក្នុងឱកាសបុណ្យចូលឆ្នាំចិន ទឹកប្រាក់ធ្វើបុណ្យក្នុងឱកាសចូលឆ្នាំខ្មែរ អំណោយក្នុងពិធីបុណ្យផ្សេងៗ និងការបង់ថ្លៃធានារ៉ាប់រងជាដើម។ ដើម្បីជៀសវាងការមិនមានលុយ សម្រាប់ចំណាយក្នុងឱកាសទាំងនេះ យើងក៏គួរមានកញ្ចប់ប្រាក់សន្សំសម្រាប់ចំណាយមិនមែនជាទម្លាប់ជាចាំបាច់។

៤. ការសន្សំសម្រាប់គោលដៅរយៈពេលខ្លី និងវែង ៖ ប្រសិនបើអ្នកត្រូវការទិញឧបករណ៍ថ្មីប្រើប្រាស់ ចំណាយសម្រាប់ការសិក្សា ឬធ្វើដំណើរកម្សាន្ត។ អ្នកចាំបាច់ត្រូវការកញ្ចប់ទឹកប្រាក់សន្សំពិសេស សម្រាប់គោលដៅរយៈពេលខ្លី និងវែង។ នៅពេលដែលអ្នកមិនមានកញ្ចប់ទឹកប្រាក់នេះ អ្នកមិនចាំបាច់ត្រូវដកទឹកប្រាក់ពីកញ្ចប់ផ្សេងៗ ដើម្បីចំណាយនោះទេ។ ដូច្នេះ ប្រព័ន្ធគ្រប់គ្រងហិរញ្ញវត្ថុក្នុងការរស់នៅរបស់អ្នក នឹងមានរបៀបរៀបរយជាងមុន ព្រមទាំងអាចកាត់បន្ថយវិបត្តិជាច្រើន៕