ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ — អ្នកជំនាញបានព្រមានថា កម្ពុជាកំពុងប្រឈមមុខនឹងគម្លាតជំនាញ និងបញ្ហាប្រឈមក្នុងការទទួលយកបច្ចេកវិទ្យា បញ្ញាសិប្បនិម្មិត (Artificial Intelligence – AI) ខណៈដែលពួកគេអំពាវនាវឱ្យមានការសម្របសម្រួលកាន់តែរឹងមាំរវាងវិស័យអប់រំ និងវិស័យឧស្សាហកម្ម។
ការលើកឡើងនេះធ្វើឡើងក្នុងឱកាសវេទិកាធនធានមនុស្សឆ្នាំ២០២៦ ដែលរៀបចំដោយសភាពាណិជ្ជកម្មអឺរ៉ុបប្រចាំកម្ពុជា (EuroCham) កាលពីថ្ងៃទី៣ ខែមេសា នៅរាជធានីភ្នំពេញ។ វេទិកានេះជាព្រឹត្តិការណ៍ប្រចាំឆ្នាំដែលប្រមូលផ្តុំមន្ត្រីជាន់ខ្ពស់រាជរដ្ឋាភិបាល តំណាងវិស័យឯកជន និងភាគីពាក់ព័ន្ធ ដើម្បីពិភាក្សាអំពីការអភិវឌ្ឍធនធានមនុស្សក្នុងបរិបទបច្ចេកវិទ្យាកំពុងផ្លាស់ប្តូរយ៉ាងឆាប់រហ័ស។
លោក Tassilo Brinzer ប្រធានសភាពាណិជ្ជកម្មអឺរ៉ុបប្រចាំកម្ពុជា បានលើកឡើងថា កម្លាំងពលកម្មកម្ពុជាកំពុងឈានចូលដំណាក់កាលអន្តរកាលសំខាន់មួយ ខណៈបច្ចេកវិទ្យា AI កំពុងរីកចម្រើនយ៉ាងលឿននៅក្នុងវិស័យឧស្សាហកម្មជាច្រើន។
លោកបញ្ជាក់ថា គម្លាតជំនាញ កម្រិតការយល់ដឹងអំពី AI នៅមានកម្រិត និងការសម្របសម្រួលមិនទាន់ល្អរវាងវិស័យអប់រំ និងឧស្សាហកម្ម នៅតែជាបញ្ហាប្រឈមសំខាន់សម្រាប់សមត្ថភាពប្រកួតប្រជែងរយៈពេលវែងរបស់ប្រទេស។
លោកបន្ថែមថា សម្ពាធលើថ្នាក់ដឹកនាំផ្នែកធនធានមនុស្សកំពុងកើនឡើង ដើម្បីឆ្លើយតបនឹងការផ្លាស់ប្តូរឌីជីថល ខណៈដែលត្រូវរក្សាការអនុវត្តតាមច្បាប់ និងបន្តពង្រឹងសមត្ថភាពកម្លាំងពលកម្ម។
ជាមួយគ្នានេះ ឯកឧត្តម សោម ចំណាន រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការធ្វើឱ្យគោលនយោបាយការងារស្របតាមការអភិវឌ្ឍបច្ចេកវិទ្យា។ ការខិតខំទាំងនេះរួមមានការធ្វើបច្ចុប្បន្នភាពបទប្បញ្ញត្តិ និងការផ្តោតលើការអភិវឌ្ឍជំនាញជាបន្តបន្ទាប់។
ទោះជាយ៉ាងណា ឯកឧត្តមបានទទួលស្គាល់ថា កម្ពុជានៅតែប្រឈមនឹងបញ្ហារចនាសម្ព័ន្ធក្នុងការរៀបចំកម្លាំងពលកម្មឱ្យសមស្របសម្រាប់សេដ្ឋកិច្ចឌីជីថល និងការកើនឡើងនៃស្វ័យប្រវត្តិកម្មក្នុងវិស័យសេដ្ឋកិច្ច។
លោក ឈាវ ណារ៉ាត ប្រធានគណៈកម្មាធិការធនធានមនុស្ស នៃ EuroCham ក៏បានសង្កត់ធ្ងន់ពីសារៈសំខាន់នៃការធ្វើឱ្យមានតុល្យភាពរវាងការប្រើប្រាស់បច្ចេកវិទ្យា និងការត្រួតពិនិត្យដោយមនុស្ស។
លោកបានមានប្រសាសន៍ថា «AI អាចផ្តល់អត្ថប្រយោជន៍យ៉ាងច្រើនដល់វិស័យធនធានមនុស្ស និងការអប់រំ ដោយជួយឱ្យការងារធ្វើបានលឿន និងមានប្រសិទ្ធភាព។ ប៉ុន្តែ ក៏នៅមានក្តីបារម្ភពាក់ព័ន្ធនឹងសុវត្ថិភាពទិន្នន័យ ក្រមសីលធម៌ និងកម្រិតការយល់ដឹងអំពីការប្រើប្រាស់ឧបករណ៍ទាំងនេះឱ្យបានត្រឹមត្រូវ»៕
