ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
វ័យជំទង់ ជាក្រុមមនុស្សស្ថិតក្នុងស្ថានភាពមមាញឹកច្រើន ចូលចិត្តធ្វើសកម្មភាពលឿនៗ ហើយមិនបានគិតអំពីប្រភេទអាហារដែលផ្តល់សារធាតុចិញ្ចឹមទៅកាន់រាងកាយប៉ុន្មាននោះទេ។ ទោះបីជាពួកគេបានទទួលទានអាហារ ចំនួនបីពេលក្នុងមួយថ្ងៃក៏ដោយ ក៏ពួកគេនៅតែមានអារម្មណ៍ថាឃ្លាន នៅរវាងចន្លោះអាហារទាំងបីពេលនោះដែរ។ ហើយដើម្បីបំពេញចំណង់ទាំងនេះបាន មនុស្សវ័យជំទង់មានទំនោរញាំរបស់ដែលមានភាពងាយស្រួល លឿនរហ័ស ដូចជាអាហារកញ្ចប់ ឬអាហារដែលធ្វើលក់ស្រាប់ៗ ឬអាហារនៅតាមផ្សារជាដើម។
តាមរយៈគេហទំព័រ kidshealth បានប្រាប់អំពី វិធីសាស្រ្តដែលបង្កើនភាពឈ្លាសវៃ នៃការជំរុញខ្លួនឯង ឱ្យទទួលទានអាហារសម្រន់ដែលមានសារធាតុចិញ្ចឹម ដូចជា អាហារដែលផ្សំពីបន្លែបង្ការ ផ្លែឈើ គ្រាប់ធញ្ញជាតិ, ទឹកដោះគោ, ឬក៏អាហារដទៃៗ ទៀតដែលមានតួនាទីទ្រទ្រង់ទៅកាន់សុខភាព នៃរាងកាយទាំងមូល។
១. នៅក្នុងទូរទឹកកក ៖ រក្សាទុកតែអាហារដែលមានសារធាតុចិញ្ចឹមប៉ុណ្ណោះ ដើម្បីផ្តល់ជម្រើសដែលល្អចំពោះសុខភាព ដែលវិធីនេះជាការបង្កើនភាពទាក់ទាញចំពោះខ្លួនឯងឱ្យមានចិត្តចង់ទទួលទានអាហារល្អៗ ជាពិសេសនៅពេលឃ្លានខ្លាំង។
២. កាត់បន្ថយម្តងបន្តិច ៖ ការផ្តាច់អាហារផ្អែម ឬអាហារសម្រន់ដែលខ្លួនចូលចិត្តភ្លាមៗ អាចនឹងពិបាក ដូច្នេះការបង្កើនជម្រើសបន្ថែម ឬក៏អនុញ្ញាតឱ្យទទួលទានម្តងម្កាល នូវអាហារដែលខ្លួនចង់ញាំ ដោយគ្រាន់តែញាំអាហារដែលមានជីវជាតិបន្ថែមឱ្យច្រើនជាងអាហារ ដែលមិនផ្តល់ប្រយោជន៍ទៅកាន់រាងកាយ។
៣. កាលវិភាគ ៖ ការធ្វើកាលវិភាគទៀតសោត គួររៀបចំ ទាំងអាហារប្រចាំថ្ងៃ និងអាហារសម្រន់ នៅពេលដែលមានផែនការ និងការបរិភោគបានត្រឹមត្រូវ ជួយឱ្យខ្លួនឯងមិនមើលរំលង នៃតម្រូវការ នៅពេលណាមួយនោះទេ! មិនថាអាហារពេលព្រឹក ឬអាហារពេលថ្ងៃ! ហើយគុណវិបត្តិ នៃការមើលរំលងពេលវេលាដែលត្រូវទទួលទានអាហារ រឹងរឹតតែជំរុញឱ្យឃ្លានខ្លាំងលើសដើម រួមទាំងនាំឱ្យការទទួលទានអាហារដែលមិនចាំបាច់កើតមានជាហូរហៀរ! ព្រោះពេលឃ្លានខ្លាំង មិនសូវជាបានពិចារណាលម្អិត អំពីគុណភាពនៃអាហារនោះទេ។
៤. ការបរិភោគដោយមានសតិរឭកដឹង ៖ កាលដែលទទួលទានដោយមានសតិនៅនឹងខ្លួន ជួយកុំឱ្យខ្លួនឯងហូបតិចពេក ឬច្រើនពេក រួមទាំងជួយរំលឹកផងដែរថា តើអ្វីដែលកំពុងតែហូបនៅពេលបច្ចុប្បន្ននេះ បានផ្តល់គុណតម្លៃទៅកាន់សុខភាពផ្លូវកាយរបស់ខ្លួនឯងបានកម្រិតណា? ដើម្បីឱ្យមានសតិ រឭកដឹងអំឡុងពេលកំពុងញាំទៅបាន គួរកាត់បន្ថយការញាំបណ្តើរ ចុចទូរស័ព្ទបណ្តើរ ញាំបណ្តើរមើលទូរទស្សន៍បណ្តើរ រួមទាំងកាត់បន្ថយសកម្មភាពដទៃៗទៀត ដែលបង្កបាននូវការរំខានអំឡុងពេលទទួលទានអាហារ។
៥. អានអំពីធាតុផ្សំមុនពេលទិញអាហារកញ្ចប់នៅទីផ្សារ ៖ រៀងរាល់ពេលទិញទំនិញស្រាប់ៗ ដែលមានលក់នៅតាមផ្សារ សូមកុំមើលរំលងនៅត្រង់ចំណុចនេះ អាហារដែលមានការផលិតតាមស្តង់ដា តែងតែមានការបញ្ជាក់នៅលើកញ្ចប់ ឬកំប៉ុងថា មានធាតុផ្សំដែលផលិតអាហារនីមួយៗមានអ្វីខ្លះ ដូចជា តើមានជាតិស្ករប៉ុន្មាន មានប្រូតេអ៊ីនប៉ុន្មាន មានកាល់ស្យូមប៉ុន្មាន រួមទាំងមានការរៀបរាប់លម្អិតបន្ថែមជាច្រើនទៀត កាលដែលមានទម្លាប់អាន ក៏ជាឱកាសក្នុងការផ្ទៀងផ្ទាត់ អំពីប្រភេទអាហារដែលខ្លួនអាឡែរហ្ស៊ី ដែលនេះមិនត្រឹមតែជួយឱ្យសុខភាពល្អតែប៉ុណ្ណោះទេ ប៉ុន្តែជាការបង្ការហានិភ័យ នៃអាការធ្ងន់ធ្ងរណាមួយកើតមាន។
៦. ខ្ចប់អាហារល្អៗយកមកតាមខ្លួនជានិច្ច ៖ ការខ្ចប់អាហារល្អៗតាមខ្លួន គួរតែធ្វើឱ្យក្លាយជាទម្លាប់ប្រចាំថ្ងៃ ដូចដែលទម្លាប់រក្សាអាហារល្អៗនៅក្នុងទូរទឹកកកដូចគ្នាដែរ ដោយយកតាមខ្លួនដូចជា ផ្លែឈើ និងគ្រាប់ធញ្ញជាតិជាដើម ព្រោះរបស់ទាំងនេះ ងាយស្រួលដាក់តាមខ្លួន ហើយផ្តល់អត្ថប្រយោជន៍ចំពោះថាមពលរាងកាយ និងសុខភាពក្នុងរយៈពេលវែង៕
