ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីរួមចំណែកបណ្តុះបណ្តាលធនធានមនុស្សនៅកម្ពុជា ក្នុងវិស័យឧត្តមសិក្សាប្រកបដោយស្តង់ដារ ជាគន្លឹះកសាងមូលធនមនុស្សដែលមានសក្តានុពលនិងមានសមត្ថភាពក្នុងការអភិវឌ្ឍន៍ជាតិ ទាំងចំណេះដឹងផ្នែកបច្ចេកទេស និងក្រមសីលធម៌វិជ្ជាជីវៈ សាកលវិទ្យាល័យអន្តរជាតិ ផារ៉ាហ្គន បានប្រកាសពីការបន្តផ្តល់អាហារូបករណ៍ជាច្រើនកន្លែងដល់សិស្សានុសិស្សនិទ្ទេស A និង B ជាង២០០កន្លែង គ្រប់មុខជំនាញ សម្រាប់ឆ្នាំសិក្សាថ្មី២០២៤-២០២៥។
អាហារូបករណ៍នេះគឺជាការលើកទឹកចិត្តចំពោះកិច្ចខិតខំប្រឹងប្រែងរបស់សិស្សានុសិស្សដែលបានទទួលលទ្ធផលល្អពីការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនាឆ្នាំ២០២៤ កន្លងទៅ ដែលសាលានឹងផ្តល់ជូនការបញ្ចុះតម្លៃសិក្សាចំនួន ៥០% ដល់សិស្សនិទ្ទេស A ចំនួន១១០កន្លែង និង ២៥% ដល់សិស្សនិទ្ទេស B ចំនួន១១០កន្លែង ដោយក្នុងនោះមួយដឺប៉ាដេម៉ង់ ផ្តល់ជូនចំនួន ១០រូបសម្រាប់និទ្ទេស A និង១០រូប សម្រាប់និទ្ទេស B ខណៈមុខជំនាញសិក្សាទាំងអស់បច្ចុប្បន្នមានចំនួន ១១មុខជំនាញ លើវិស័យវិស្វកម្ម, បច្ចេកវិទ្យាព័ត៌មាន, វិទ្យាសាស្ត្រសង្គម, មនុស្សសាស្ត្រ, ជំនួញ, ការរចនាជាដើម។
ចំពោះលក្ខខណ្ឌក្នុងការទទួលបានអាហារូបករណ៍នេះ បេក្ខជនដែលជាសិស្សានុសិស្សទើបប្រឡងបញ្ចប់បាក់ឌុបដែលមាននិទ្ទេស A និង B ក្នុងឆ្នាំ២០២៤ ថ្មីៗនេះ ត្រូវមកសាកលវិទ្យាល័យអន្តរជាតិ ផារ៉ាហ្គន ដោយផ្ទាល់ ដែលមានទីតាំងនៅខណ្ឌទួលគោក រាជធានីភ្នំពេញ ដើម្បីស្វែងយល់បន្ថែម និងទទួលការណែនាំលើការដាក់ពាក្យទទួលស្នើសុំអាហារូបករណ៍ចាប់ពីការផ្សាយដំណឹងនេះតទៅ រហូតដល់ថ្ងៃទី១៦ ខែធ្នូ ឆ្នាំ២០២៤ ខាងមុខ ដែលជាថ្ងៃចាប់ផ្តើមដំណើរការឆ្នាំសិក្សាថ្មីនៃថ្នាក់មូលដ្ឋាន។
សូមបញ្ជាក់ថា ជំនាញទាំង១១ ដែលសាកលវិទ្យាល័យផារ៉ាហ្គន នឹងបណ្តុះបណ្តាលក្នុងកម្រិតបរិញ្ញាបត្រ មានមហាវិទ្យាល័យចំនួន៣ ក្នុងនោះមហាវិទ្យាល័យវិស្វកម្មមានមុខជំនាញដូចជា ស្ថាបត្យកម្ម, វិស្វកម្មឧស្សាហកម្ម និងវិស្វកម្មសំណង់ស៊ីវិល។ មហាវិទ្យាល័យព័ត៌មាន និងបច្ចេកវិទ្យាកុំព្យូទ័រ រួមមាន ជំនាញវិទ្យាសាស្ត្រកុំព្យូទ័រ, សិល្បៈឌីជីថល និងការរចនា និងគ្រប់គ្រងប្រព័ន្ធព័ត៌មាន និងមហាវិទ្យាល័យវិទ្យាសាស្ត្រសង្គម និងសេដ្ឋកិច្ច រួមមាន ជំនាញធនាគារ និងហិរញ្ញវត្ថុ, គ្រប់គ្រងពាណិជ្ជកម្ម, សេដ្ឋកិច្ច, ទំនាក់ទំនងអន្តរជាតិ ព្រមទាំង ភ័ស្តុភារ និងពាណិជ្ជកម្មអន្តរជាតិ៕
