ភ្នំពេញ​ – ថ្លែងក្នុងពិធីប្រកាសដាក់ឱ្យអនុវត្តគោលការណ៍ណែនាំស្តីពីកិច្ចការពារកុមារលើប្រព័ន្ធអនឡាញសម្រាប់ក្រុមហ៊ុនបចេ្ចកវិទ្យាឌីជីថល នាព្រឹកថ្ងៃទី០៦ ខែកក្កដា ឆ្នាំ២០២៣ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ មានប្រសាសន៍ថា ការរក្សាសុវត្ថិភាពកុមារលើប្រព័ន្ធអនឡាញប្រកបដោយប្រសិទ្ធភាព គឺទាមទារឱ្យមានការចូលរួមរបស់យើងទាំងអស់គ្នា។

ឯកឧត្តម ជា វ៉ាន់ដេត មានប្រសាសន៍បន្ថែមថា ការចូលរួមរបស់ក្រុមហ៊ុនបច្ចេកវិទ្យាឌីជីថលក្នុងការអនុវត្តតាមគោលការណ៍ណែនាំ “ស្តីពីកិច្ចការពារកុមារលើប្រព័ន្ធអនឡាញសម្រាប់ក្រុមហ៊ុនបចេ្ចកវិទ្យាឌីជីថល” គឺជាការចូលរួមធានាសុវត្ថិភាពកុមារកម្ពុជា និងជាការឆ្លើយតបឱ្យបានទាន់ពេលវេលាទៅនឹងគ្រោះថ្នាក់ដែលអាចកើតមានឡើងលើប្រព័ន្ធអនឡាញ។

ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍

” ប្រសិនបើគ្មានការចូលរួមពីបណ្តាក្រុមហ៊ុនបច្ចេកវិទ្យាឌីជីថលនោះកិច្ចការពារកុមារលើប្រព័ន្ធអនឡាញនឹងជួបប្រទះនូវបញ្ហាលំបាក មិនអាចប្រព្រឹត្តិទៅដោយរលូន និងមិនអាចទទួលលទ្ធផលជោគជ័យបានឡើយ “

រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បញ្ជាក់បន្ថែមថា ក្រៅពីក្រុមហ៊ុនបច្ចេកវិទ្យាឌីជីថល អ្នកពាក់ព័ន្ធដទៃទៀតដូចជា ឪពុកម្ដាយ អាណាព្យាបាល និងកុមារខ្លួនឯងផ្ទាល់ក៏មានតួនាទីសំខាន់ដូចគ្នាអំពីការយល់ដឹង ការមានបំណិនវិជ្ជាជីវៈឌីជីថល និងការមានចំណេះដឹងមូលដ្ឋានពីបញ្ហាសុវត្ថិភាពគឺជារឿងចាំបាច់ក្នុងយុគសម័យឌីជីថល។ ស្របគ្នានេះ បើតាមគោលការណ៍របស់សហភាពទូរគមនាគមន៍អន្តរជាតិ (ITU) ការការពារកុមារ គឺជាទំនួលខុសត្រូវរួមរបស់ភាគីពាក់ព័ន្ធទាំងអស់រាប់បញ្ចូលទាំងអ្នកធ្វើគោលនយោបាយ វិស័យឯកជន ឪពុកម្តាយ អាណាព្យាបាល អ្នកធ្វើការក្នុងវិស័យអប់រំ ។ល។

ឯកឧត្តម ជា វ៉ាន់ដេត ក៏បានជំរុញឱ្យប្រតិបត្តិករហេដ្ឋារចនាសម្ព័ន្ធទូរគមនាគមន៍និងអ៊ីនធឺណិត ប្រតិបត្តិករផលិតឧបករណ៍សម្ភារៈបរិក្ខារបច្ចេកវិទ្យានិងសុសវែរ ប្រតិបត្តិករផ្តល់សេវាផ្ទុកទិន្នន័យ-សេវាថា្នលឌីជីថល និងអ្នកបង្កើតមាតិកាព័ត៌មានត្រូវអនុវត្តយន្តការអប្បបរមា ៦ ចំណុចសំខាន់ៗ ដូចជា ១. វាយតម្លៃផលប៉ះពាល់សិទ្ធិកុមារនៅក្នុងប្រព័ន្ធក្រុមហ៊ុន ផលិតផល និងសេវា ២. គិតគូរដាក់បញ្ចូលការគោរពសិទ្ធិកុមារនៅក្នុងប្រតិបត្តិការអាជីវកម្មរបស់ខ្លួន ៣.រចនាសេវា និងផលិតផលប្រកបដោយសុវត្ថិភាព ៤. ចូលរួមលើកកម្ពស់ការយល់ដឹង ការផ្លាស់ប្តូរឥរិយាបថនឹងអក្ខរកម្មឌីជីថល ៥. បង្កើតបរិស្ថានសុវត្ថិភាពលើប្រព័ន្ធអនឡាញ និង៦. ទប់ស្កាត់និងឆ្លើយតបទៅនឹងរូបភាពសម្ភារៈរំលោភបំពានផ្លូវភេទកុមារលើប្រព័ន្ធអនឡាញ។

គួរជម្រាបជូនថា គោលការណ៍ណែនាំស្តីពីកិច្ចការពារកុមារលើប្រព័ន្ធអនឡាញសម្រាប់ក្រុមហ៊ុនបច្ចេកវិទ្យាឌីជីថលនៅកម្ពុជា គឺជាសមិទ្ធផលថ្មីមួយរៀបចំឡើងដោយក្រុមការងារនៃក្រសួងប្រៃសណីយ៍និងទូរគមនាគមន៍សហការជាមួយអង្គការយូនីសេហ្វប្រចាំកម្ពុជា និងភាគីពាក់ព័ន្ធនានា ក្នុងគោលដៅរៀបចំនូវវិធានការច្បាស់លាស់ដើម្បីថែរក្សាសុវត្ថិភាពរបស់កុមារនៅលើប្រព័ន្ធអនឡាញ និងនៅពេលពួកគេប្រើប្រាស់បច្ចេកវិទ្យាឌីជីថល រួមទាំងឧបករណ៍ដំណើរការដោយបញ្ញាសិប្បនិម្មិត (AI) ឬម៉ាស៊ីនស្វ័យសិក្សា (Machine-Learning) និងដើម្បីឆ្លើយតបឱ្យបានរហ័សប្រកបដោយប្រសិទ្ធផលនៅពេលដែលកុមារជួបប្រទះហានិភ័យ៕