ក្រុម ហ្វូណន វ័ររៀ (Funan Warrior) ដែលមានសមាជិក៣រូបសុទ្ធសឹងតែជាយុវជន និង​ក៏​ជាបងប្អូនបង្កើតនឹងគ្នា បានរួមគ្នាបង្កើត​រ៉ូបូតប្រយុទ្ធទម្ងន់ ១៤គីឡូក្រាមប្រកបដោយភាពច្នៃប្រឌិត ចូលរួមក្នុងការ​ប្រកួត​រ៉ូបូត​ចម្បាំង នៅ​ក្នុង​កម្មវិធី​តាំងពិព័រណ៌​យន្តហោះ និង​បច្ចេកវិទ្យា ឆ្នាំ២០២៤ រហូត​ឈ្នះជ័យលាភីលេខ១។

លោក ហេង ប៊ុនឡេង បច្ចុប្បន្ន​ជាវិស្វករក្នុងក្រុមហ៊ុនមួយ និងជាប្រធានក្រុម Funan Warrior បានប្រាប់ឱ្យដឹងថា ការចូលរួមប្រកួតរ៉ូបូតចម្បាំង ក្នុងកម្មវិធីតាំងពិព័រណ៌យន្តហោះ និងបច្ចេកវិទ្យា ២០២៤ ព្រោះមើលឃើញវិស័យបច្ចេកវិទ្យានៅកម្ពុជាកំពុងរីកចម្រើនទៅមុខ ហើយចង់យកចំណេះដឹងផ្នែករ៉ូបូតចូលរួមប្រកួតបង្ហាញស្នាដៃ ដើម្បីកែលម្អចំណុចខ្វះខាត។

ប្រធានក្រុមជ័យលាភីលេខ១ រូបនេះ បន្ថែមថា រ៉ូបូតចម្បាំងដែលដាក់ប្រកួត មានឈ្មោះថា ហ្វូណន វ័ររៀ (Funan Warrior) មានន័យថា ខ្មែរជាអ្នកខ្លាំង ជាអ្នកប្រយុទ្ធ។ រ៉ូបូតនេះ បង្កើតឡើងដោយចំណាយពេលប្រហែល ៣ខែ និងប្រើថវិកាអស់ជាង ១ពាន់ដុល្លារ ទៅលើសម្ភារៈចំនួនទិញមកពីក្រៅប្រទេសដូចជា ម៉ូទ័រ ថ្ម ហើយយកមកផ្គុំឱ្យចេញជារូបរាងរ៉ូបូត តាមរយៈការរចនា ការកាត់ និងកែច្នៃដោយខ្លួនឯង។

យុវជនវ័យ២៧ឆ្នាំរូបនេះ បញ្ជាក់បន្ថែមថា កត្តាដែលជំរុញឱ្យក្រុមរបស់ខ្លួន ទទួលបានជ័យលាភីលេខ១ ក្នុងការប្រកួត គឺ ទី១.ផ្ដោតទៅលើការរចនាម៉ូតរ៉ូបូតថ្មីប្លែកពីគេ, ទី២.ការប្រើប្រាស់ Spar part ដោយគិតទៅលើអាវុធ (ផ្លែវិល) ធ្វើយ៉ាងណាឱ្យដំណើរការល្អ និង ទី៣.ប្រើម៉ូទ័រមានគុណភាពល្អកម្លាំងខ្លាំង ផ្គួបផ្សំអ្នកបញ្ជារ៉ូបូតមានជំនាញដឹងចំណុចខ្សោយរបស់ដៃគូប្រកួត។

យុវជនអ្នកខេត្តតាកែវ រូបនេះ បន្ថែមទៀតថា ក្រុមរបស់ខ្លួនធ្លាប់រំពឹងថានឹងអាចជាប់ជ័យលាភីឆ្នើមក្នុងការប្រកួតនេះ​ ដោយសារក្រុមបានឆ្លងកាត់វិញ្ញាសាជាច្រើនតំណាក់កាល និងធ្លាប់មានបទពិសោធន៍ច្រើនក្នុងការប្រកួតរ៉ូបូតកន្លងមក។ ទន្ទឹមគ្នានេះ ​នៅពេលដឹងថាក្រុមជាប់ជ័យលាភីលេខ១ គឺពិតជាមានអារម្មណ៍រំភើប និងមានមោទនាភាពសម្រាប់ខ្លួនឯង។

លោក ហេង ប៊ុនឡេង លើកឡើងដែរថា ទម្រាំក្រុមអាចទទួលបានលទ្ធផលល្អក្នុងការប្រកួត គឺបានឆ្លងកាត់ឧបសគ្គជាច្រើន ក្នុងនោះក្រុមជួបប្រទះបញ្ហាចម្បងទៅលើផ្នែកថវិកា និងការទិញសម្ភារៈខុស។ ទោះជាបែបនេះ ក៏ក្រុមនៅតែជំនះ និងព្យាយាមស្វែងរកដំណោះស្រាយ។ ចំណែកការធ្វើការជាក្រុម លោក ហេង ប៊ុនឡេង មានការបែកចែកប្រភេទការងារបានល្អ ដោយលោកជាប្រធានក្រុម ផ្ដោតលើការរចនាម៉ូតរ៉ូបូត ការសរសេរកូដ និងការផ្ដល់យោបល់ ចំណែកសមាជិក២រូបទៀត គឺលោក ហេង ប៊ុណ្ណា ជានិស្សិតឆ្នាំទី៣ ជំនាញមេកានិចរថយន្ត នៃវិទ្យាស្ថាន NPIC និងប្អូនពៅ លោក ហេង ម៉េងស្រ៊ុន ជាសិស្សថ្នាក់ទី១១ ផ្ដោតទៅលើការផ្សារ កាត់ដែក និងការផ្គុំរ៉ូបូត។

ក្នុងនាមជារៀបច្បងក្នុងក្រុម លោក ហេង ប៊ុនឡេង រៀនសូត្របានច្រើនពីកម្មវិធីប្រកួតរ៉ូបូតចម្បាំងនេះ គឺទី១. គំនិតច្នៃប្រឌិតបង្កើតថ្មី កាត់តែស្រឡាញ់ កាន់តែចង់ស្រាវជ្រាវពីបច្ចេកវិទ្យាថ្មីៗ ជាពិសេសរ៉ូបូត ទី២. ចេះធ្វើការងារជាក្រុម និងដឹងពីរបៀបដឹកនាំក្រុម ទី៣. កម្លាំងសាមគ្គីជាក្រុម នៅពេលរ៉ូបូតមានបញ្ហាមានក្រុម TeamX ដែលជាសិស្សថ្នាក់ទី១០ ទី១១ មកជួយជួសជុលភ្លាមៗ។

ដើម្បីឱ្យវិស័យបច្ចេកវិទ្យាកាន់តែដើរទៅមុខ លោក ហេង ប៊ុនឡេង យល់ថា ត្រូវមានការចូលរួមពីយុវជន ក៏ដូចជាមានកន្លែងសម្រាប់យុវជនបង្ហាញសមត្ថភាព ព្រោះបច្ចុប្បន្នមានយុវជនខ្មែរ ចេះច្រើន និងពូកែច្រើន ប៉ុន្តែគ្មានឱកាសបង្ហាញសក្កដានុពលរបស់ខ្លួន។ ទន្ទឹមគ្នានេះ លោក ហេង ប៊ុនឡេង ក៏សំណូមពរឱ្យបង្កើតព្រឹត្តិការណ៍ប្រកួតបែបនេះឱ្យបានច្រើន ដើម្បីឱ្យយុវជនបានចូលរួមបង្ហាញសមត្ថភាព និងគំនិតច្នៃប្រឌិដ្ឋផ្នែកបច្ចេកវិទ្យារបស់ខ្លួន។

លោក ហេង ប៊ុនឡេង បញ្ជាក់ទៀតថា ជាគោលដៅបន្ទាប់ ក្រុមរបស់ខ្លួននឹងបន្តទៅប្រកួតរ៉ូបូតនៅកម្រិតអន្តរជាតិ ព្រោះក្រុមរបស់ខ្លួនមានចំណេះ ជំនាញ និងឆន្ទៈ ប៉ុន្តែក៏ទាមទារឱ្យមានការចូលរួមគាំទ្រពីថ្នាក់ដឹកនាំ ស្ថាប័ន ប្រជាពលរដ្ឋ ដើម្បីបំផុសគំនិតក្មេងជំនាន់ក្រោយឱ្យឃើញថា យុវជនខ្មែរខ្លាំងពូកែ​ផ្នែកបច្ចេកវិទ្យាមិនចាញ់បរទេស។

និយាយដោយក្ដីរីករាយ លោក ហេង ប៊ុនឡេង ចង់ឱ្យយុវជនជាសិស្សនុសិស្សងាកមកស្វែងយល់ពីវិស័យបច្ចេកវិទ្យា មិនថាតែផ្នែករ៉ូបូតនោះទេ​អាចជំនាញផ្សេងៗដែលទាក់ទងនឹងបច្ចេកវិទ្យា សុទ្ធសឹងតែអាចជួយខ្លួនឯង និងជួយប្រទេសជាតិបាន លើកលែងចំណាយពេលធ្វើរឿងអត់ប្រយោជន៍ដែលសង្គមមិនទទួលស្គាល់។

គួរជម្រាបជូនថា ក្រុម Funan Warrior ក៏​ធ្លាប់បានទទួលបានជ័យលាភីលេខ២ ក្នុងកម្មវិធីប្រកួត BATTLEBOTx រដូវកាលទី៣ កាលពីខែវិច្ឆិកា ឆ្នាំ២០២៤ផងដែរ៕