« យើងចង់ឃើញយុវជន​របស់យើងមាន​ចំណេះដឹងហិរញ្ញវត្ថុ និង​សហគ្រិនភាព​ក្រោយ​បញ្ចប់ថ្នាក់វិទ្យាល័យ… នៅពេលគាត់មានគំនិតសហគ្រិនភាពក្នុងការកែច្នៃ ក្នុង​ការ​ធ្វើអ្វីមយយ​ដើម្បីអភិវឌ្ឍ នោះជាការបង្កើនគុណតម្លៃសេដ្ឋកិច្ច​របស់យើង», នេះជាប្រសាសន៍​លើក​ឡើងរបស់​លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ក្នុងពិធីបើកសន្និបាតពាក់កណ្តាលឆ្នាំ និង​សិក្ខាសាលាអប់រំ របស់សហព័ន្ធសេវាអប់រំ​នៅ​កម្ពុជា កាលពីពេលថ្មីៗនេះ។

លោកឧកញ៉ា ប៉ិច បូឡែន លើក​ឡើងថា បច្ចុប្បន្នជា​ការ​កត់សម្គាល់ យុវជន​យើង​​មាន​បញ្ហា​ប្រឈម​ខាងហិរញ្ញវត្ថុ ដោយ​មិន​ទាន់ចេះ​ក្នុង​ការ​ប្រើប្រាស់ និង​គ្រប់គ្រង​លុយកាក់​បាន​ល្អ​នៅ​ឡើយ ។ ដូច្នេះ ការបណ្តុះបណ្តាលចំណេះដឹងហិរញ្ញវត្ថុ​ និងសហគ្រិនភាពទៅ​ដល់យុវជន គឺជា​រឿងដែលចាំបាច់បំផុត។

ប្រទេសណាក៏ដោយ មិន​អាច​រីកចម្រើន​ដោយ​មិន​មានឆ្លងកាត់គុណភាពអប់រំ​ដ៏​ល្អមួយ​ទេ… សិស្សវិទ្យាល័យយើងពេលប្រឡងបាក់ឌុបជាប់ជារឿងមួយ​ហើយ ប៉ុន្តែទន្ទឹមគ្នាជាមួយ​លទ្ធផលរបស់គាត់ យើងចង់ឃើញគាត់មានចំណេះដឹងហិរញ្ញវត្ថុ និង​សហគ្រិនភាពមួយ…

លោកឧកញ៉ា ប៉ិច បូឡែន

តាមប្រសាសន៍​របស់លោកឧកញ៉ា ប៉ិច បូឡែន អ្នកធ្វើការងារក្នុងវិស័យអប់រំដើរតួយ៉ាងសំខាន់ ក្នុងការចូលរួមចំណែកអភិវឌ្ឍធនធានមនុស្សសម្រាប់សង្គមជាតិ ជាពិសេសបាននិងកំពុងចូលរួមបង្កើតប្រព័ន្ធ និងបង្កើនគុណភាពអប់រំមួយ ដើម្បីធានា និងផ្តល់ឱកាសដល់យុវជនអាចមានការងារសមរម្យមួយ ឬអាចចេញប្រកបមុខរបរអាជីវកម្មទទួលបានជោគជ័យរួមនឹងប្រាក់ចំណូលខ្ពស់។ ដូចនេះ ការបង្កើនប្រាក់ចំណូលដែលបានមកពី អាជីពការងារ អាជីវកម្ម និងសហគ្រិនភាពនេះហើយ ដែលជាលទ្ធផលនៃការអប់រំបាញ់ឆ្ពោះទៅរកការរីកចម្រើនសេដ្ឋកិច្ច ដើម្បីជំរុញប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។

សូមបញ្ជាក់ថា ចំណេះដឹងហិរញ្ញវត្ថុវាដើរតួនាទីយ៉ាងសំខាន់នៅក្នុងជីវិតប្រចាំថ្ងៃរបស់យើង ឬក៏​អាចនិយាយ​បានថា គឺជាបំណិនជីវិត​ដែលមនុស្ស​ម្នាក់ៗ​ត្រូវ​យកមក​ប្រើប្រាស់ រៀបចំចាត់ចែងធនធានលុយកាក់ ទ្រព្យសម្បត្តិដែលមានឱ្យមានប្រសិទ្ធភាពនិងធ្វើឱ្យជីវិតរបស់នៅប្រចាំថ្ងៃកាន់តែប្រសើរ ។ បើតាមអ្នកជំនាញ ប្រសិន​បើយុវជន​មិន​មានចំណេះដឹងហិរញ្ញវត្ថុ នោះការចាយវាយរបស់ពួកគេ​នឹង​មិន​មានគោលដៅ ដែលនាំឱ្យ​ជួប​នូវ​វិបត្តិ ឬអាចធ្លាក់ចូលទៅ​ក្នុងបំណុល តែប្រសិនបើ​យុវជន​យើងមានចំណេះដឹងហិរញ្ញវត្ថុ គឺបានន័យថា ពួកគេ​អាច​ជួយ​ខ្លួនឯង ជួយគ្រួសារ ហើយ​អាចជួយ​សេដ្ឋកិច្ចប្រទេស​ជាតិឱ្យ​មានភាពរីកចម្រើន៕