ធនាគារអភិវឌ្ឍអាស៊ី ដែលហៅកាត់ថា ADB បានអ​នុម័តកម្ចីចំនួន ១០០លានដុល្លារ ដើម្បីជួយ​លើក​កម្ពស់​សមត្ថភាព​កម្លាំងពលកម្ម​នៅ​កម្ពុជា តាមរយៈ​ការ​ធ្វើកំណែទម្រង់ និង​ការវិនិយោគ​លើវិស័យអប់រំ និងបណ្តុះបណ្តាលបច្ចេកទេស និងវិជ្ជាជីវៈ (TVET) ។

លោកស្រី Jyotsana Varma នាយិកាធនាគារ​អភិវឌ្ឍន៍អាស៊ីប្រចាំប្រទេស​កម្ពុជា បាននិយាយថា ការកែទម្រង់កម្លាំងពលកម្ម និង​ការ​ធ្វើទំនើបកម្មសេដ្ឋកិច្ចរបស់កម្ពុជា ទាមទារ​ឱ្យ​មានកំណែទម្រង់​ជាបន្ត នៃប្រព័ន្ធ TVET តាមរយៈយុទ្ធសាស្រ្តស៊ីជម្រៅ និង​ការវិនិយោគជាបន្តបន្ទាប់ឱ្យទាន់ពេលវេលា ។ កំណែទម្រង់រចនាសម្ព័ន្ធ និង​ស្ថាប័ន TVET ទាំងនេះ មានសារសំខាន់សម្រាប់​ការរៀបចំ​កម្មវិធី​បណ្តុះបណ្តាលដែលឆ្លើយតបនឹង​តម្រូវ​ការ​ទីផ្សារ ធ្វើ​ឱ្យ​ប្រសើរ​ឡើងនូវ​ទីតាំង និង​ឧបករណ៍​បណ្តុះបណ្តាល និង​ពង្រីកមូលនិធិអភិវឌ្ឍន៍​ជំនាញ (SDF)។

គួរ​បញ្ជាក់ថា មូលនិធិអភិវឌ្ឍន៍​ជំនាញ ត្រូវ​បាន​សាកល្បង​ដោយ​រាជរដ្ឋាភិបាល ក្រោម​គម្រោងជំនាញ​សម្រាប់​ភាពប្រកួតឈ្នះ ផ្តល់ហិរញ្ញប្បទានដោយ ADB ដែលត្រូវ​បានអនុម័ត​ក្នុង​ឆ្នាំ​២០១៩ ដើម្បី​បង្កើនជំនាញ និង​សមត្ថភាព​ប្រកួតប្រជែង នៃកម្លាំង​ពលកម្ម​ដែល​កំពុង​កើន​ឡើង​របស់កម្ពុជា។ ការ​ដាក់​សាកល្បង SDF នេះ បាន​នឹង​កំពុងឆ្លើយតប​ទៅនឹងតម្រូវការ​បណ្តុះបណ្តាល​ជំនាញ​សម្រាប់​វិស័យ​ឧស្សាហកម្ម តាមរយៈ​ភាពជាដៃគូសហហិរញ្ញប្បទាន​ជាមួយ​ស្ថាប័នរាជរដ្ឋាភិបាល ផ្នែកឧស្សាហកម្ម ភ្នាក់ងារ​ផ្តល់​ការ​បណ្តុះបណ្តាល និង​ដៃគូ​អភិវឌ្ឍន៍​នានា។

យោ​ងតាមរបាយការណ៍របស់មូលនិធិអភិវឌ្ឍជំនាញបាន​ឱ្យដឹងថា បន្ទាប់ពី​អនុវត្ត​អស់រយៈពេល​៥ឆ្នាំ គម្រោងនេះ​ត្រូវ​បានវាយតម្លៃ និង​អនុម័តផ្តល់ថវិកា​បដិភាគ​សម្រាប់គម្រោង​បណ្តុះបណ្តាល​ជំនាញសរុបចំនួន ១០០គម្រោង ដោយ​បណ្តុះបណ្តាលសិក្ខាកាមសរុប​ចំនួន ១១ ៣០៩ នាក់ ក្នុងនោះ ៤១៤៤ ឬ ៣៧% ជាស្រ្តី។

យ៉ាងណាក៏​ដោយ​បើយោងតាមទិន្នន័យ បច្ចុប្បន្ន​ទីផ្សារ​ការងារ​នៅ​កម្ពុជា​មានអ្នកធ្វើ​ការ​ប្រមាណ ៩លាននាក់ ដែលក្នុងនោះ​មានស្រ្តី ៤៩% ។ គិត​ត្រឹម​ឆ្នាំ​២០២១ ប្រជាពលរដ្ឋ​កម្ពុជា ៥៤%​មានអាយុក្រោម ៣០ឆ្នាំ ដែលបង្ហាញពីឱកាស​ពិសេស​មួយ​សម្រាប់​ប្រទេស​ក្នុង​ការ​បង្កើន​ការ​វិនិយោគ​លើ​ការ​អភិវឌ្ឍធនធាន​មនុស្ស ដើម្បី​បង្កើន​ជំនាញ​សម្រាប់​និយោជិតថ្មីចូលទៅ​ក្នុង​ទីផ្សារ​ការងារ និង​លើក​កម្ពស់​ជំនាញ​របស់និយោជិត ដែលកំពុង​បំពេញ​ការងារ​ទៅតាម​តម្រូវ​ការ​ឧស្សាហកម្ម​ផងដែរ៕