ការសិក្សានៅក្នុងសាលា ក្រៅពីទទួលបានជំនាញវិជ្ជាជីវៈ ដែលអ្នកអាចប្រើប្រាស់ជាអាជីព ឬមុខរបរចិញ្ចឹមជីវិត អ្នកក៏ទទួលបានជំនាញជីវិតជាច្រើន ដើម្បីយកមកប្រើប្រាស់ក្នុងការរស់នៅប្រចាំថ្ងៃផងដែរ។ ជាទូទៅ មនុស្សគ្រប់គ្នាប្រហែលជាគិតដល់ជំនាញ ការគិតត្រិះរិះ ការទំនាក់ទំនង និងជំនាញយល់ចិត្តអ្នកដទៃ។ យោងតាម SKILLS YOU NEED បានបង្ហាញពីជំនាញសំខាន់ៗចំនួន ៦ បន្ថែមលើជំនាញរៀបរាប់ខាងលើ ដែលអ្នកទទួលបានពីក្នុងសាលា ហើយអាចយកមកអនុវត្តក្នុងជីវិតជាក់ស្ដែង។

១. ជំនាញបំពេញការងារជាក្រុម ៖ ក្នុងអំឡុងពេល ដែលអ្នកសិក្សានៅសាលា ឬសាកលវិទ្យាល័យ អ្នកប្រហែលជាត្រូវចូលរួមធ្វើការងារក្រុមជាច្រើន ដើម្បីបំពេញកិច្ចការ ឬគម្រោងមួយ។ សកម្មភាពនេះ នឹងធ្វើឱ្យអ្នកយល់ដឹងអំពីវិធីជំរុញ និងលើកទឹកចិត្តអ្នកដទៃ ឬសមាជិកក្រុម និងវិធីស្វែងយល់ពីអារម្មណ៍ ភាពខ្លាំង និងចំណុចខ្សោយរបស់សមាជិក ដើម្បីបញ្ចប់គម្រោងដោយរលូន។

បទពិសោធដែលអ្នកទទួលបានពីសកម្មភាពនេះ គឺមានតម្លៃយ៉ាងខ្លាំងនៅពេលដែលអ្នកត្រូវប្រឡូកក្នុងសង្គមការងារ ឬការធ្វើអាជីវកម្ម។ ព្រោះវានឹងជួយឱ្យអ្នកអាចសម្របខ្លួនបានល្អ នៅពេលធ្វើការងារជាក្រុម មិនថាអ្នកធ្វើជាមេដឹកនាំ ឬសមាជិកក្រុមក៏ដោយ។

២. ជំនាញគ្រប់គ្រងលុយ ៖ មូលហេតុដែលអ្នកអាចរៀនជំនាញគ្រប់គ្រងលុយនៅអំឡុងពេលរៀននៅសាកលវិទ្យាល័យ ព្រោះអំឡុងពេលនេះ អ្នកមានថវិកាតិចតួច និងមិនអាចចំណាយផ្ដេសផ្ដាសបាននោះទេ។ ដូច្នេះ ចង់មិនចង់ អ្នកត្រូវតែស្វែងយល់អំពីរបៀបគ្រប់គ្រងការចំណាយឱ្យបានត្រឹមត្រូវ។ អ្នកនឹងយល់ច្បាស់អំពីអ្វីជាភាពខុសគ្នារវាង តម្រូវការ និងចំណង់ ហើយរបស់ណាដែលគួរចំណាយលុយទិញ និងរបស់ណាដែលមិនគួរ។

៣. ជំនាញលើកទឹកចិត្ត ៖ ពេលវេលានៅសាកលវិទ្យាល័យ នឹងបង្វឹកអ្នកឱ្យពង្រឹងភាពខ្លាំង វិន័យ និងយល់ពីរបៀបលើកទឹកចិត្តខ្លួនឯង។ ព្រោះអំឡុងពេលនេះ នឹងមានការងារសាលា និងកិច្ចការស្រាវជ្រាវជាច្រើន ដែលអ្នកត្រូវធ្វើឱ្យចប់ទៅតាមពេលវេលាកំណត់។ ហេតុនេះ អ្នកត្រូវតែមានកម្លាំងជំរុញពីខាងក្នុងខ្លួន ដើម្បីបំពេញកិច្ចការទាំងនោះ បើទោះជាអ្នកមិនសប្បាយចិត្ត កំពុងមានបញ្ហា ឬមិនចង់ធ្វើកិច្ចទាំងនោះក៏ដោយ។ ជំនាញលើកទឹកចិត្តខ្លួនឯង និងអ្នកដទៃ ជាជំនាញដ៏សំខាន់ ដែលអ្នកទទួលបានពីសាលា មុនពេលដែលអ្នកចេញទៅធ្វើការ ហើយអ្នកនឹងត្រូវប្រើជំនាញនេះពេញមួយជីវិត។

៤. ជំនាញស្វែងរកជំនួយ និងគ្រប់គ្រងធនធាន ៖ ពិតណាស់នៅពេលដែលបញ្ហាលំបាកៗនៅអំឡុងពេលសិក្សារៀនសូត្រ សិស្សនិស្សិតត្រូវស្វែងយល់អំពីរបៀបស្នើសុំជំនួយផ្សេងៗពីសាស្ត្រាចារ្យ សិស្សច្បង ឬមិត្តរួមថ្នាក់ជាដើម។ ជំនាញនេះ មានសារៈសំខាន់ ដែលអាចជួយអ្នកឱ្យដោះស្រាយបញ្ហាបាន និងអាចជួយអ្នកសម្របខ្លួនទៅនឹងបញ្ហាចំពោះមុខ។ នៅពេលធ្វើអាជីវកម្ម ឬបំពេញការងារ សមត្ថភាពប្រើប្រាស់ធនធានខាងក្រៅ ដើម្បីសម្រេចកិច្ចការ ឬគម្រោងផ្សេងៗពិតជាសំខាន់ ហើយមិនមែនមនុស្សគ្រប់គ្នាសុទ្ធតែអាចធ្វើបាននោះទេ។

៥. ជំនាញរៀបចំផែនការ និងកំណត់កិច្ចការអាទិភាព ៖ អំឡុងពេលរៀននៅសាកលវិទ្យាល័យ អ្នកទំនងជានឹងមានកិច្ចការជាច្រើន ដែលត្រូវធ្វើជារៀងរាល់ថ្ងៃ មិនថាកិច្ចការផ្ទាល់ខ្លួន ការងារសាលា ឬការងារផ្ទះនោះទេ។ ដូច្នេះ នៅក្នុងស្ថានការនេះ អ្នកត្រូវតែមានផែនការច្បាស់លាស់ ដើម្បីគ្រប់គ្រងពេលវេលា និងកំណត់កិច្ចការអាទិភាព ដែលអ្នកត្រូវធ្វើ។ ជំនាញនេះ ពិតជាមានសារៈសំខាន់ណាស់ ទាំងក្នុងការសិក្សា ការងារ និងជីវិតរស់នៅប្រចាំថ្ងៃ។

៦. ជំនាញក្នុងការគិតខុសពីអ្នកដទៃ (Think Differently) ៖ ការឈានចូលសាកលវិទ្យាល័យ អ្នកនឹងស្ថិតនៅក្នុងកន្លែងមួយ ដែលមានមនុស្សមានពីគ្រប់ទិសទី ដែលមានរបៀបគិត និងទស្សនៈខុសៗគ្នា ដែលផ្ដល់ឱ្យអ្នកនូវឱកាសជាច្រើន ដើម្បីរៀនសូត្រពីមនុស្សទាំងអស់នោះ។ ប្រសិនបើអ្នកជាបុគ្គលិក ដែលបើកចិត្តក្នុងការរៀនសូត្រ ស្វែងយល់ពីររៀបគិតថ្មីៗ អ្នកនឹងអាចរៀនសូត្របានច្រើនពីមនុស្សជុំវិញខ្លួន ហើយបង្កើនការគិតបែបច្នៃប្រឌិត និងអាចគិតខុសពីអ្វី ដែលអ្នកដទៃយល់ឃើញ៕