ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការត្រៀមខ្លួនទុកជាមុនបានបង្កភាពងាយស្រួល និងបង្កើនការផ្តោត តួយ៉ាងដូចជាការត្រៀមខ្លួន មុននឹងបន្តការសិក្សាថ្នាក់បរិញ្ញាបត្រជាន់ខ្ពស់ គឺជាការសម្រួចនូវគោលដៅ ហើយដំណើរនៃការសិក្សានឹងកាន់តែឆ្លើយតបនឹងការរំពឹងទុក។ ការបន្តការសិក្សាថ្នាក់ក្រោយឧត្តមគឺជាការបោះជំហានសំខាន់មួយក្នុងជីវិតអាជីពនិងផ្ទាល់ខ្លួន ដែលទាមទារទាំងការលះបង់ពេលវេលាខ្ពស់ និងការចំណាយហិរញ្ញវត្ថុ។ ដូច្នេះការរៀបចំខ្លួនឱ្យបានល្អិតល្អន់ជាមុន គឺជាកត្តាស្នូលដែលនាំទៅរកភាពជោគជ័យក្នុងការសិក្សា។
តាមរយៈ Durham University បានបង្ហាញគន្លឹះសំខាន់ៗមួយចំនួនដើម្បីត្រៀមខ្លួនបណ្តើរៗ មុនពេលបន្តបរិញ្ញាបត្រជាន់ខ្ពស់ ដើម្បីជួយឱ្យសិស្សនិស្សិតអាចចាប់ផ្តើមដំណើរផ្លូវនៃការសិក្សាប្រកបដោយទំនុកចិត្ត និងប្រសិទ្ធភាពខ្ពស់ ដោយមានរៀបរាប់នៅខាងក្រោម ៖
ពិចារណាពីហេតុផល ៖ ការចោទជាសំណួរ និងពិចារណាអំពីមូលហេតុដែលត្រូវរៀនថ្នាក់ក្រោយឧត្តម ជាកិច្ចដំបូងបំផុតដែលត្រូវធ្វើក្នុងការត្រៀមខ្លួន ព្រោះវាពាក់ព័ន្ធនឹងការចាយវាយ និងការលះបង់នៅពេលវេលាខ្ពស់ផងដែរ ត្បិតចំណាយពេលតិចជាងបរិញ្ញាបត្រប៉ុន្តែទំហំនៃការស្រាវជ្រាវមានបន្ទុកធ្ងន់ជាងមុន។ មួយវិញទៀតការសិក្សាថ្នាក់បរិញ្ញាបត្រជាន់ខ្ពស់គឺជាការសម្រួចជំនាញដែលកំពុងតែធ្វើស្រាប់ឱ្យកាន់តែពូកែជាងមុន ដូច្នេះការរកឱ្យឃើញនូវឬសគល់បានដើរតួរនាទីសំខាន់ក្នុងការជួយជ្រើសរើសជំនាញឆ្លើយតបនឹងឱកាសការងារ ក៏ដូចជាការធ្វើអាជីវកម្ម និងទស្សនៈវិស័យផ្ទាល់ខ្លួនជាដើម។
ពង្រឹងជំនាញគ្រប់គ្រងពេលវេលា ៖ តុល្យភាពនៃការងារ គ្រួសារ និងជីវិតផ្ទាល់ខ្លួន ក្លាយជាចំណោទបញ្ហាមួយចំពោះអ្នកមានភាពមមាញឹក ដែលត្រូវការឱ្យមានការបែងចែកពេលវេលា ក៏ដូចជាអាទិភាពចំពោះភារកិច្ចដែលចាំបាច់ៗ តួយ៉ាងបរិញ្ញាបត្រជាន់ខ្ពស់ទាមទារឱ្យមានការលត់ដំខ្លួនខ្ពស់ទៅលើការគ្រប់គ្រងពេល ព្រោះទំនួលខុសត្រូវនៅត្រង់កម្រិតនេះក៏ខ្ពស់ខុសពីមុនដូចគ្នា ដែលជាហេតុត្រូវត្រៀម ឬពង្រឹងបន្ថែមអំពីការគ្រប់គ្រងពេល ក៏ដូចជាការប្រើប្រាស់បច្ចេកវិទ្យាដើម្បីសម្រួលជាដើម។
អានទុកមុន ៖ បរិញ្ញាបត្រជាន់ខ្ពស់ត្រូវការជំនាញនៃការស្តាប់ និយាយ និងសរសេរ ការជជែកពិភាក្សា រួមទាំងមូលដ្ឋានគ្រឹះនៃការស្រាវជ្រាវត្រូវតែមានស្រាប់ ដូចនេះការអានឯកសារដែលពាក់ព័ន្ធទុកជាមុនបានផ្តល់ភាពងាយស្រួលនៅពេលដែលត្រូវវិភាគលើប្រធានបទណាមួយ ក៏ដូចជាការដឹងឱ្យកាន់តែស៊ីជម្រៅទៅលើមុខវិជ្ជាមុននឹងសម្រេចចិត្តជ្រើសរើស។ មួយវិញទៀតក្នុងកម្រិតនេះតម្រូវឱ្យស្វ័យសិក្សាដោយខ្លួនឯងច្រើនជាងមុន ដូច្នេះអាចទិញសៀវភៅ ឬក៏អានតាមអ៊ីនធឺណិតដើម្បីបានជាចំណេះដឹងត្រៀមទុកមុន៕
