បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប (WEG) ដែលបានចាប់ផ្តើមពីសាលាឯកជនដ៏តូចមួយកាលពីឆ្នាំ២០០៨ មានចំនួនសិស្សតែប្រមាណ៤០០នាក់ និងសាលារៀនចំនួន២ ពេលនេះបានក្លាយទៅជាបណ្តាញសាលារៀនធំមួយ ដែលមានសិស្សប្រមាណជិត២ម៉ឺននាក់ និងបណ្តាញសាលារៀនចំនួន២៧ ព្រមទាំងបាននាំមុខគេក្នុងការចូលរួមលើកស្ទួយវិស័យអប់រំ តាមរយៈការបង្កើតសហព័ន្ធសេវាអប់រំនៅកម្ពុជា ដែលបានជួយសមាជិករាប់រយសាលានៅទូទាំងប្រទេសទទួលបានផលវិជ្ជមានក្នុងវិស័យអប់រំ។

ក្នុងឱកាសប្រារព្ធខួប១៧ឆ្នាំ នៃការបង្កើត WEG លោកឧកញ៉ា ប៉ិច បូឡែន អគ្គនាយកបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប លើកឡើងថា សមិទ្ធផល នៃការប្រែប្រួលការអប់រំទូទាំងប្រទេស អាចនិយាយបានថា មានការចូលរួមពី WEG, លោកឧកញ៉ាបន្តថា WEG ខុសពីសាលាដទៃត្រង់ថា មិនចាត់ទុកសាលាផ្សេងដែលមានមុខរបរដូចគ្នាជាសត្រូវ ហើយផ្ទុយទៅវិញមានតែការរួមគ្នាប្រឹងប្រែងអភិវឌ្ឍ និងរកវិធីដើម្បីជួយលើកស្ទួយវិស័យអប់រំនៅកម្ពុជា។ ជាមួយគ្នា WEG ក៏បានចូលរួមក្នុងការបណ្តុះបណ្តាលដល់សាលាឯកជនដទៃទៀតរាប់រយកន្លែង តាមរយៈការចែកចាយកម្មវិធីទម្លាប់ល្អទាំង៧ សម្រាប់បុគ្គលឆ្នើម (7 habits) ព្រមទាំងកម្មវិធីសំខាន់ៗជាច្រើនទៀត ធ្វើឱ្យមានការទទួលស្គាល់ពីសហគមន៍។

ក្រៅពីនេះ WEG ក៏បានរួមចំណែកក្នុងការផ្តល់ធាតុចូលជាមួយក្រសួងអប់រំ យុវជន និងកីឡា ក៏ដូចជាក្រសួងការងារ និងបណ្តុះបណ្តាលវិជ្ជាជីវៈ ហើយពិសេសជាងនេះទៅទៀតនោះ WEG ក៏ជាតួអង្គដ៏សំខាន់ ក្នុងការជំរុញការអនុវត្តគោលនយោបាយមិនយកពន្ធលើវិស័យអប់រំ ដែលបានជួយដល់ស្ថាប័នអប់រំនៅទូទាំងប្រទេស ទទួលបានផលប្រយោជន៍ពីរាជរដ្ឋាភិបាល។

យ៉ាងណាក៏ដោយសម្រាប់ផែនការទៅថ្ងៃអនាគត WEG បានបង្ហាញមហិច្ឆតា ក្នុងការរួមកម្លាំងជាមួយសាលារៀនឯកជនផ្សេងទៀត ដោយលែងមានការប្រកួតប្រជែងគ្នា ហើយរួមគ្នាអភិវឌ្ឍការបណ្តុះបណ្តាលឱ្យកាន់តែទូលំទូលាយប្រកបដោយគុណភាពក្នុងបរិបទបច្ចេកវិទ្យា​ដែលកំពុងវិវឌ្ឍទៅមុខ។

គួរជំរាបជូនថា ចាប់តាំងពីឆ្នាំ២០០៨មក បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប មានការរីកចម្រើន និងបានបន្តពង្រីកខ្លួនជាបន្តបន្ទាប់ ដែលរហូតមកដល់ពេលនេះ WEG បានដាក់ដំណើរការសេវាកម្មអប់រំចំណុះជាង២៧សាខា ក្នុងនោះសាលារៀនវ៉េស្ទឡាញន៍ មានចំនួន១៣សាខា, សាលារៀនណត្សឡាញន៍ មានចំនួន២សាខា, វិទ្យាស្ថានអភិវឌ្ឍន៍វិស័យអប់រំ ១សាខា, សាលាអន្តរជាតិហ្វររ៉េសហៀល ១សាខា, សាលាអង់គ្លេសលីដឺលែន ២សាខា និងសាលារៀនសហគមន៍២១ ចំនួន៩សាខា ដោយមានសិស្សកំពុងសិក្សាសរុបប្រមាណ ១ម៉ឺន៥ពាន់នាក់ និងគ្រូបង្រៀនប្រមាណជាង១ពាន់៤រយនាក់៕