ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទម្លាប់ឪពុកម្តាយកាន់រំពាត់វាយកូនដើម្បីដាក់ពិន័យ ប្រហែលជាលែងមានទៀតហើយក្នុងសង្គមកម្ពុជានៅអនាគតដ៏ខ្លីខាងមុខនេះ។ តាមរបាយការណ៍ស្ទង់មតិថ្មីមួយចេញផ្សាយដោយអង្គការយូនីសេហ្វ ឪពុកម្តាយកម្ពុជាភាគច្រើនបានយល់ដឹងពីវិធីសាស្រ្តចិញ្ចឹមកូនបែបវិជ្ជមាន ដូច្នេះពួកគាត់នឹងលែងប្រើហិង្សាក្នុងគ្រួសារ ហើយងាកមកប្រើសេចក្តីស្រឡាញ់ ដោយរៀនស្តាប់ និងយល់ពីកូនៗ។
លោកស្រី សុខ ភារុន ដែលជាម្តាយរបស់កូនពីរនាក់បាននិយាយថា លោកស្រីបានចូលរួមវគ្គបណ្តុះបណ្តាលពីការប្រើប្រាស់បច្ចេកទេសចិញ្ចឹមកូនបែបវិជ្ជមាន, ក្នុងវគ្គនេះលោកស្រីបានរៀនមេរៀនសំខាន់ៗជាច្រើនដូចជា ការស្តាប់កូនៗ ការយកចិត្តទុកដាក់ចំពោះតម្រូវការកូនៗ ការប្រើប្រាស់ពាក្យសម្តីវិជ្ជមានដើម្បីលើកទឹកចិត្តចំពោះអាកប្បកិរិយាល្អ ការជៀសវាងការបន្ទោស និងការជេរ ព្រមទាំងការគ្រប់គ្រងកំហឹង និងភាពតានតឹងក្នុងចិត្ត។
“ខ្ញុំមានភាពភ្ញាក់ផ្អើលដោយបានរៀនថា យើងអាចចិញ្ចឹមកូនដោយមិនចាំបាច់មានអំពើហិង្សា”
ក្រៅតែពីលែងប្រើអំពើហិង្សាទៅលើកូនៗ លោកស្រី ភារុន ក៏បានកត់សម្គាល់ឃើញពីភាពល្អប្រសើរឡើងចំពោះទំនាក់ទំនងរបស់គាត់ជាមួយប្តីគាត់ផងដែរ, លោកស្រីថា “យើងលែងបន្ទោសគ្នាទៅវិញទៅមកទៀតហើយ។ ច្បាប់ទីមួយនៅក្នុងគ្រួសាររបស់ខ្ញុំ គឺត្រូវស្ដាប់គ្នា”។
ក្រសួងកិច្ចការនារី ដោយមានការគាំទ្រពីយូនីសេហ្វ តាមរយៈមូលនិធិពីទីភ្នាក់ងារជំនួយអាមេរិក USAID បានដាក់ឱ្យអនុវត្តកម្មវិធីការចិញ្ចឹមកូនបែបវិជ្ជមាននៅឆ្នាំ២០១៨។ គំនិតផ្ដួចផ្ដើមនេះ អប់រំឪពុកម្ដាយអំពីការចិញ្ចឹមកូនដោយគ្មានអំពើហិង្សា ដែលជាការឆ្លើយតបជាចាំបាច់ចំពោះរបកគំហើញពី CDHS ឆ្នាំ២០២៣ ដែលបានបង្ហាញថា កុមារកម្ពុជាអាយុចន្លោះពី១ ទៅ១៤ឆ្នាំ ចំនួន ៦៦% បានប្រឈមមុខនឹងអំពើហិង្សាលើរាងកាយនៅផ្ទះ។
កិច្ចខិតខំប្រឹងប្រែងទាំងនេះបានផ្ដល់ផលប្រយោជន៍ដល់កុមារប្រមាណ ៨២.០០០នាក់ ក្នុងនោះកុមារីចំនួន ៣៩.០០០នាក់ និងកុមារមានពិការភាពចំនួន ៧០នាក់។ វគ្គបណ្ដុះបណ្ដាលគ្រប់ជ្រុងជ្រោយនៃគំនិតផ្ដួចផ្ដើមនេះ មានបំណងបង្រៀនឪពុកម្ដាយនូវជំនាញ ដែលចាំបាច់ក្នុងការប្រើប្រាស់បច្ចេកទេសចិញ្ចឹមកូនបែបវិជ្ជមាន។
យូនីសេហ្វ បានលើកឡើងថា កម្មវិធីការចិញ្ចឹមបីបាច់កូនតាមបែបវិជ្ជមាន មិនត្រឹមតែធ្វើបរិវត្តកម្មគ្រួសារនីមួយៗប៉ុណ្ណោះឡើយ ប៉ុន្តែក៏កំពុងបំបែកវដ្ដនៃអំពើហិង្សាលើរាងកាយ ដែលបានបន្តមកជាច្រើនជំនាន់មកហើយ។ យោងតាមការអង្កេតនៅក្នុងអំឡុងពេលនៃការអនុវត្តកម្មវិធីនេះ អ្នកចូលរួមចំនួន ៧៥ភាគរយ បានបង្ហាញការមិនយល់ស្របយ៉ាងខ្លាំងក្លាដែលថា ភាពតានតឹងក្នុងចិត្តអាចធូរស្រាលតាមរយៈការទទួលទានគ្រឿងស្រវឹង ការលេងល្បែងស៊ីសង ឬការវាយ ឬ ការស្រែកដាក់កូនៗ ដោយពួកគេបានបង្ហាញអំពីការផ្លាស់ប្ដូរទៅរកយន្តការទប់ទល់បែបអហិង្សាវិញ។ បន្ថែមលើនេះ ចម្លើយត្រឹមត្រូវពាក់ព័ន្ធនឹងការដាក់វិន័យវិជ្ជមានបានកើនឡើងពី ៦០ភាគរយ នៅក្នុងសំណួរសាកល្បងមុនវគ្គទៅ ៩៥ភាគរយ នៅក្នុងការធ្វើតេស្តបន្ទាប់ពីចប់វគ្គ។
យ៉ាងណាក៏ដោយ ដើម្បីជួយបង្កើនការយល់ដឹងដល់ឪពុកម្តាយកម្ពុជាគ្រប់គ្នាពីការចិញ្ចឹមកូនបែបវិជ្ជមាន ក្រសួងកិច្ចការនារី និងគណៈកម្មាធិការជាតិគាំពារ និងការអភិវឌ្ឍកុមារតូច ជាមួយនឹងការគាំទ្រហិរញ្ញវត្ថុ និងបច្ចេកទេសពីយូនីសេហ្វ បានបង្កើត ឆាតប៊តអំពីការចិញ្ចឹមកូនបែបវិជ្ជមាន ដោយឪពុកម្តាយ ឬអ្នកថែទាំអាចទទួលបានគន្លឹះភ្លាមៗអំពីការដាក់វិន័យវិជ្ជមាន ការប្រាស្រ័យទាក់ទង និងការអភិវឌ្ឍរបស់កុមារតាមរយៈតេឡេក្រាម។ ឆាតប៊តនេះងាយស្រួលប្រើ ដោយផ្ដល់ទាំងជម្រើសជាអត្ថបទ និងជម្រើសជាសំឡេង និងលើកទឹកចិត្តឪពុកម្ដាយឱ្យចិញ្ចឹមបីបាច់កូនៗរបស់ខ្លួន នៅក្នុងបរិយាកាសមួយដែលមានសុវត្ថិភាព និងការគាំទ្រ៕
